احترسى من تقديم هذه الاطعمه لطفلك
احترسى من تقديم هذه الاطعمه لطفلك
ولازم تعرفى ان الأكل اللى بتقدميه لولادك هوه اللى بيتحكم فى صحتهم البدنيه والعقليه والنفسيه والاهتمام الاكبر بين الامهات هوه التركيز على أنظمة غذائيه يلتزم بيها الطفل والأهم من ده كله هوه الحذر من بعض الاطعمه اللى لازم بأى حال من الاحوال انه مياكولهاش الطفل بكميات كبيره ولو قدرتى تمنيعها خالص خالص عنه.
المشروبات الغازيه : طبعا انا مش محتاجه أقنعك بعد وجود مئات الدراسات اللى بتحذر منها وخصوصا للأطفال لانها بتسبب السمنه ومرض السكر وبتزود السلوك العدوانى عند الطفل ، يبقا لازم تمنعيها خالص عن الطفل وياريت منشربهاش قدامه ابدا.
العصاير المعلبه : قريتى فى يوم اللى مكتوب على علبة العصير اللى بتشريه لولادك ؟؟
العصير المعلب بيحتوى على كميه هايله من السكر اللى بتضر صحة الطفل ومفيهوش اى فايده وقيمه غذائيه من نكهة الفاكهه الموجوده فيه ومعظم العصاير مش مصنوعه من الفاكهه الطبيعيه اصلا بيستخدموا نكهات عشان يحسسك بطعم الفاكهه فيه ، فياريت تسغنى عن المعلبات دى وتعملى العصير فى البيت وياريت لو من غير سكر وسيبى المجال ليهم يتمتعوا بالطعم الاصلى للفاكهه من غير اضافة كميات كبيره من السكر تخليهم مش قادرين يستطعموا اى طعم طبيعى مع مرور الوقت .
الكاتشب : للأسف الشديد الاطفال بينجذبوا للى بيعملوه باباهم ومامتهم قدامهم لأن الطفل ميعرفش ان الكاتشب بيتحط على البطاطس الا لما يشوف حد منكوا بيعمل ده قدامه ، الصلصات بتحتوى على كميه هايله من السعرات الحراريه وكمان مليانه مواد حافظه اللى بتضر دماغ الطفل على المدى البعيد ، أعملى الكاتشب بنففسك فى البيت وخليهم يستعملوه بحذر ومتسيبيش العلبه كلها قدامهم وحطى شويه صغيره فى طبق كل واحد منهم واعملى كده كمان لنفسك ولباباه.
التونه المعلبه : الاسماك مصدر أساسى للفيتامينات والمعادن والدهون المفيده الازمه لصحة اطفالك ولكن التونه المعلبه أو الطازه على وجه الخصوص بتضر الطفل اكتر مابتفيده لان فيها نسبه عاليه من الزئبق واللى بيأثر بشكل سلبى على الجهاز العصبى للطفل فى مراحله الاولى.
بار الجرانولا: الامهات بتجرى بسرعه تشترى الحاجات اللى بيعلونوا عنها انها صحيه من السوبر ماركت ويدوها لاولادهم بدل الشيبسى والعصاير ، ولكن انتى متأكده من ان الجرانولا اللى بتشتريها هيا فعلا صحيه ؟
لازم تتأكدى كويس اوى وبدقه من المكونات الموجوده فى بار الجرانولا اللى بتديها لأبنك لأن فى كتير منها بيحتوى على فاكهه أو حبوب كامله بنسبه كافيه وبيتكون أغلبه من السكر والمواد الحافظه المضره لصحة الطفل ، بس كل اللى عليكى تتأكدى كويس من المكونات قبل ماتديها للطفل وكمان تقدرى تعمليها فى البيت من الحبوب الكامله والفواكه المجففه والعسل والقرفه.
الكافيين : متسمحيش لابنك يشرب الشاى والقهوه معاكوا لان الكافيين سبب رئيسى فى فرط الحركه وبعد فتره بيتعود عليه الطفل ويدمنه زى الكبار بالظبط واستبدليها بالعصاير الطبيعيه والمشروبات السخنه فى الشتا زى الكاكاو باللبن اللى بيحبه كل الاطفال.
اللحوم المصنعه : اللانشون والهوت دوج والبرجر والناجتس وغيرها من أنواع اللحوم المصنعة اللى بتسبب خطر كبير على الكبار والصغيرين ، متقدميهاش لاولادك بأى حال من الاحوال.
