ازاى تعرفى ان طفلك بيتعرض لمشاكل فى مدرسته
ازاى تعرفى ان طفلك بيتعرض لمشاكل فى مدرسته
ودي مشكلة كبيرة بالذات لأن الطفل بيخاف يقول لأهله خوفا من أنه يزود المشكلة بوجهة نظرة البسيطة , مسئولية الأهل كبيرة إنهم يحسوا بطفلهم ويعرفوا .
هقولك على شوية نصائح تقدري تعرفي من خلالها إذا كان طفلك بيعاني من مشكلة في مدرستة
أول حاجه : لازم تبصي كل يوم على هدوم طفلك هل فيها أي تلف وتشوفي جسمه هل يوجد فيه أي خدوش أو علامات عنف .
تاني حاجه : لو لاحظتي إن ابنك مزاجه مش مظبوط أو بيتنرفز من أي حاجه أو عنده خمول مفاجئ وهدوء كبير في التعامل وردود أفعاله .
تالت حاجه : لو لاحظتي إن إبنك بيحاول يجيب حجج إنه يغيب عن المدرسة سواء إنه تعبان أو عايز ينام ولو أصريتي توديه المدرسة ولقيتيه متضايق .
رابع حاجة والأخيرة : لو إبنك مش عايز يحل الواجب زي زمان ومش عايز يذاكر بشكل مفاجئ بدون ما يبدي سبب .
دلوقتي إحنا عرفنا ان فيه المشكلة .. إزاي نحلها ؟
أول حاجه عشان نحل لازم نعرف إيه بالظبط المشكلة اللي بتقابل إبننا عشان كدا لو لاحظتي أي حاجه من النقاط اللي قولتها فوق لازم الأول تسألي إبنك بكل لطف عن المدرسة وإيه اللي مش عاجبه فيها وهتاخدي منه إجابة وافيه بدون خوف .
دلوقتي جه دورك إنك تكلمي المشرفة في المدرسة عن إبنك وتسأليها عن سلوك إبنك وإنك حاسه إنه فيه حاجه مضايقاه وان فيه حد بيضايقه او مسبب ليه كره للمدرسة .. وبرضوا دا مش كفايه لازم تكلمي كل المدرسين بتوعه عشان لو فيه مدرس بيضايقه او بيضربه يخاف بعد كدا يزعقله او يخوفه حتى لو عنده تقصير في أداء الواجب ويكتفي إنه يبلغك في كراسته .
