اشياء تقلل حليب الرضاعه غير متوقعه
اشياء تقلل حليب الرضاعه غير متوقعه
طبعا لبن الأم هوه الغذاء المثالى للطفل وبالأخص فى السنه الاولى من عمره لأنه بيحتوى على جميع العناصر والفيتامينات اللى بيحتاجها الطفل واللى هيا اساس البناء السليم للجسم ، زى ماأثبتت الدراسات ان الاطفال اللى بيعتمدوا على لبن الأم بيكونوا أقل عرضه للأصابه بالعدوى والامراض فى بداية حياتهم ، وده بسبب الاجسام المضاده اللى بيحتوى عليها حليب الثدى ، لكن ممكن تقابلك مشكله فى ادرار اللبن نتيجة بعض الاسباب اللى متتوقعهاش واللى أنا هقولك عليها دلوقتى :
1_ الحساسيه وأدوية البرد :
بتأثر الماده الفعاله فى بعض أدوية البرد والحساسيه على انتاج لبن الثدى ، فلو كنتى من اللى بيعانوا من الحساسيه الموسميه الشديده ، تقدرى بعد استشارة الدكتور تاخدى جرعه واحده بس من الادويه دى وتبعدى عن الاسابيع الأولى بعد الولاده علشان متأثرش على انتاج الللبن عندك.
2_ نزيف مابعد الولاده :
النزيف اللى بعد الولاده مش تجربه سهله وبيسبب فى خسارة الدم بكميات كبيره واللى ممكن يمنع ادرار اللبن لفتره ، وكمان التعب والارهاق بشكل عام وان الأم اللى بترضع مش عارفه ترتاح ده بيكون سبب فى نقص اللبن.
3_ انخفاض اداة الغده الدرقيه:
ساعات بيتأثر اللبن بسبب ضعف اداء الغده الدرقيه واللى بتنظم هرمون انتاج اللبن علشان كده لو لاحظتى نقص فى انتاج اللبن يبقا لازم تتحققى من اداء الغده الدرقيه اللى ممكن تتلهب بعد الولاده.
4_ الأعشاب والتوابل :
فى بعض الاعشاب اللى بتحفز ادرار اللبن وزيادته لكن فى كمان عدد مش قليل من الاعشاب والتوابل اللى ممكن تقلل ادرار اللبن زى النعناع والزعتر والياسمين والبقدونس والميرمية لو أخدتى منها كميات كبيره.
5_ حبوب منع الحمل :
لو كنتى بدأتى تاخدى حبوب منع الحمل فده ممكن يأثر على كمية اللبن عندك ، عشان بعضها بيحتوى على الاستروجين وده الهرمون اللى ممكن يسبب نقص ادرار اللبن.
6_ الحمل مره تانيه :
بيسبب الحمل مره تانيه أثناء الرضاعه لنقص كميات اللبن عشان ممكن هرمونات الحمل تسبب انخفاض فى مخزون اللبن عند الأم اللى بترضع.
7_ التوتر :
الاجهاد النفسى والتوتر بيقللوا ادرار اللبن فى المرحله دى وممكن يأثر القلق فى بدابة التعامل مع الطفل والحاله النفسيه للأم أو اى مشاكل تانيه فى كمية اللبن.
