اضرار الحفاضات مجهولة المصدر على طفلك
اضرار الحفاضات مجهولة المصدر على طفلك
طبعا الاسعار الفترة دى مرتفعه اوى وظهرت حاجات كتير مغشوشة فى الاسواق واكترهم خطر طبعا اللى بيتعرض ليه الاطفال ، كشفوا حفاضات مغشوشه للأطفال اللى بتتباع باسهار رخيصه وبنص سعر الحفاضات العاديه.
ومن الطبيعى ان الامهات اللى بيعانوا من زيادة الاسعار هيروحوا على طول يختاروها من غير مايعرفوا ان ده هيجيب لاولادهم ضرر ممكن يكون صعب شفاؤه وهعرفك النهارده ازاى تقدرى تعرفى الحفاضه المغشوشه دى.
بتتصنع من ايه الحفاضات المغشوشه؟؟
بتتصنع من مواد صناعيه مش مناسبه لبشرة الطفل وبيدخل فيها أوى البلاستيك والنايلون وبيستوردوها من بره ببالات كبيره وبعدين يفككوها وينضفوها ويكوها ويرجعوا تانى يعبوها او يبعوها فردانى على حسب مكان البيع.
وبيستخدم فى اعادة التعبئه طبعا ورش مش معده للتعامل مع منتجات خاصه بالاطفال والناس اللى شغالين فيها معندهمش ادنى اهتمام بقواعد النضافه وبيضاف عليها معطرات للحفاضات علشان يقنعك انها مش مغشوشه واللى بيزود اضرارها على الاطفال.
اضرار الحفاضات المغشوشه :
1. بتسبب الالتهابات للأطفال علشان فيها نسب غير صحيه من النايلون والبلاستيك علشان يقلل من سعرها وتكلفة انتاجها.
2. بتعمل التهابات تناسليه عند البنات بسبب انها مش معقمه.
3. بتعمل عقم عند الاطفال الصغيرين لان النايلون والبلاستيك اللى مصنوعه منه بيرفع درجة حرارة المنطقه التناسليه عندهم وارتفاع درجة حرارة الخصيتين بيقتل الحيوانات المنويه.
4. المواد المصنوعه منها بتسبب اصابة الخصيتين بالحساسيه واللى بيعيق نموها بالشكل الطبيعى.
5. بتؤدى للأصابه بالتهاب المثانه والكلى وفتحة الشرج.
ازاى تقدرى تفرقى بين الحفاضات الأصليه والمغشوشه؟
مفيش طريقه واضحه تقدرى تفرقى بيها بين الحفاضات الاصليه والمغشوشه غير انك تتأكدى من انك تشتريها بسعرها الطبيعى ومش بالسعر اللى يخوف ويقلق لانه بيكون أقل بكتير ويستحسن تشتريها من الصيدليه.
ولازم تعرفى ان الحفاضات المغشوشه بيعبوها فى اكياس شبه اكياس الحفاضات العاديه وبيحطوا كمان ماركات وهميه عليها علشان كده متخليش شكل الغلاف اللى بيلمع يغشك واشترى النوع اللى تعرفيه كويس ومن مكان معروف.
ازاى تقدرى تقللى من تكلفة الحفاضات؟؟
1. عودى ابنك على استخدام النونية أو الحمام بدرى شويه وممكن تبدأى بده بعد ماتعوديه على انه يقعد لوحده على طول ممكن ده يكون مرهق ليكى فى الاول بس النتيجه هتكون فعاله بالنسبه للميزانيه.
2. استعملى الحفاضات القطن بالنهار وجوه البيت بس علشان تتجنبى الاحراج وانتى بره او التسريب بليل والحفاضات القطنيه ليها مميزات كتير ومنها تقليل الالتهابات.
