اضرار كثرة الادويه على الاطفال

ادوية الاطفال علم مش عبيله واديله استرجل واعمل الصح ???
ياجماعه الطب مفيهوش عايز ادي الواد فيتامين وميجراش حاجه اما ناخد مضاد حيوي? وفيها ايه اما اديله حقنتين بنسلين احتياطي?وحبه دوا حساسية احترازي ? وعايز اديله دوا كذا واديته كذا ?… الطب مفيهوش علاج يتاخد احتياطي او اما نجرب او مفيهاش حاجه ولا فيها ايه لما اديله بعض الحديد وكوبشه فيتامينات و اوميجا واوقيه من زيت كبد الحوت وشويه من زيت التوت ومعرفش ايه?….
اللي احنا فيه ده في مصر اسمه عبث وتهريج ومخاطره بصحة الانسان ?… الدوا ميتاخدش الا بداعي طبي وجيه غير كده الطفل مياخدش اي ادويه بتاتا … وعلاج اي حاجه هو اننا ندور علي سبب المشكله ونعالجه … عمر ما كان الحل هو عبيله واديله وكل اما تتزنق ارقعه مضاد حيوي … ركزي معايا كده في الكلام المهم ده ?
1- المطهرات المعويه لطفل اقل من سنه هتعمل مشاكل كارثيه وهتموت البكتريا النافعه اللي بتساعده علي الهضم والطفل هيدخل في اسهال من نوع تاني هو اسهال عدم القدره علي هضم اللاكتوز والموضوع هيطول … معظم اسباب الاسهال في طفل اقل من سنه بتكون ثانويه يعني بسبب التهاب في الجهاز التتفسي العلوي او السفلي او التهاب حلق وبيبلع بلغم بسبب الاسهال ده ومش محتاج اي مطهرات معويه محتاج نعالج السبب فقط … بس كده يا دكتوره ؟؟ اه بس كده يا سنيه ?
2- مش كل ما يجيلك مزاج تعبي ابنك كالسيوم وخلاص? … الطفل من سن 4 شهور رسمي ( وممكن من سن يوم) بيحتاج فيتامين د بس وللمره المليون مش محتاحين كالسيوم مش محتاحين كالسيوم مش محتاجين كالسيوم … الكالسيوم ميتاخدش الا لو قليل في الدم ونعرف بالتحليل او يكون عامل اعراض وتشنجات …… والكالسيوم في الاكل والرضاعه اكتر من كافي وكل اللي احنا بنعمله اننا بنعمل حمل علي الكلي بالكالسيوم اللي بنديه وممكن نعمله حصوات من نغير ما نحس … مش محتاجين كالسيوم والله ??… اقول كمان مش محتاجين كالسيوم ….
3- مينفعش كل ما ابنك يسخن ترقعه مضاد حيوي من نفسك? معظم الامراض بتكون فيروسيه ومش محتاجه مضاد حيوي اصلا المفروض ندي سيتال او باراسيتامول ونصبر علي الولد ونعمل كمادات … ايه مش فاضي وعايز تخلص? …. عندك ايه اهم من ابنك يا اخي؟؟
4- متقعدش تهبد ابنك كل ما يجيله شويه سخونيه حقن ورا حقن ورا حقن? وبعدين ترجع تشتكي ان مناعته ضعيفه وبيعيا كتير …
5- لو ابنك بهتان وتحت عنيه اسود? متقعدش ترقعه في فيتامينات وحديد وتجيبله زكايب ادويه … لازم نعمل تحاليل ونشوف الديدان والطفيليات وتحليل براز ونعالجها صح وبعد كده لو في انيميا نعالجها ?
6- لو ابنك مبيركزش وبينام كتير متقوليش نديله اوميجا وزيت القرش والدولفن ومعرفش ايه المفروض ندور علي الانيميا والطفيليات والمشاكل النفسيه وكل الاسباب العضويه زي حساسية الصدر والانف واللحميه ونعالجها ولو طلع كله مظبوط نبقي ندي ساعتها ✌…
7- علي فكره في الاطفال في اول سنه مش محتاحين كالسيوم …. اقسم بالله ما محتاجينه فيتامين د بيكون كفايه جدا جدا ??
8- لو ابنك عنده ديدان متقعدش تديله هو لوحده دوا وتقعد تقول مبيخفش وتشتكي انك رحت بيه القمر ومخفش … استرجل واعمل الصح وادي كل البيت علاج✌ … ايه مكسوف تاخد دوا ديدان وانت كبير ؟؟ طيب مش خايف علي ابنك? ؟؟
9- مينفعش ابنك في اول شهور يكون هاري نفسه حزق وبقاله شهور بيتلوي وبيرجع وانت عمال تعبيه في ادويه انتفاخ واكوا معرفش ايه وماء معرفش مين …لازم نفكر في الارتجاع او حساسية الالبان او اللاكتوز او مشاكل الامتصاص وحساسية القمح والطعام? …
10- الطفل اللي بيجيله لوز خمسين مره في السنه ده لازم ياخد علاج صح 10 ايام مضاد حيوي وجرعه معقوله وبالفم مش حقن علشان نقضي علي الميكروب السبحي اللي بيسبب التهاب الحلق المزمن وهيتحسن صدقني وهتبطل تجيله كتير… متقعدش تشتكي انه علطول لوزه ملتهبه وانت كل اما يتعب تديله حقنتين ويخف فتكبر دماغك فتلاقيه تعبلك تاني بعد يومين.?
11- مينفعش تقعد تنفخ ابنك في حقن بنسلين طويل المفعول ?وتسود عيشته كل اما يجيله شويه لوز … البنسلين طويل المفعول للوقايه من الحمي الروماتيزميه .
12- مينفعش ابنك يبقي عنده حساسية جلد جامده ومطوله شهور وتقعد تهريه في مراهم كيناكومب وتعبيه فنستيل وخلاص…. المفروض نعمله تحاليل حساسيه ضد مكونات البيئه والاكل ونشوف الحساسية من ايه ونعمل الصح …
13- وبرضو في الاطفال في اول سنه مش محتاجين كالسيوم اقسم بالله وفيتامين د لوحده بيكون كافي جدا جدا جدا ??
14- الطفل اللي بيجيله 5 ولا عشر ادوار كحه في السنه ده? مش طفل عنده نزلات شعبيه وعلاجه مش اننا نعبيه مضاد حيوي لازم نشوف الحساسية بتاعة صدره ونعالجها صح ونمشيه علي كورس مظبوط✌.
15- التسلخات اللي بتقعد بالشهور مينفعش نقعد نهري الواد في مراهم كورتيزون وخلاص ومنفكرش في نقص الزنك او الفيتامينات او في الحساسية المزمنه وحساسية الطعام والقمح …
16- اي دوا في الدنيا اديته شهر واتنين ومجابش نتيجه هنفضل نديه ليه متوقع يحصل ايه وانت بقالك شهور بتاخده ومفيش تحسن ؟؟؟؟ ايه اللي هيتغير وايه رد فعلك الجديد اللي مستنيله نتيجه ؟؟؟ … اعمل الصح وشوف ابنك عنده ايه واكشف عليه وندور ورا السبب ونعالجه …
17- علي فكره في الاطفال اقل من سنه مش محتاجين كالسيوم وفيتامين د كفايه … سمعتوني ؟؟؟ ??
18- الرشح اللي بيقعد بالشهور ميبقاش رشح عادي ولا انفلونزا ده يبقي حساسية انف ومحتاجه تقييم وعلاج صح ✌.
19- مينفعش طفل بيسخن كتير جدا وبيطول ومعندوش اي اعراض غير السخونيه ومنفكرش في سبب السخونيه دي ايه؟؟؟ ونفكر في العدوي المزمنه وحمي البحر المتوسط ونعمل تحاليل وافيه علشان نشوف ايه المشكله ونحلها ….
20 – اخر حاجه حلفتك بالله مش محتاحين كالسيوم وفيتامين د لوحده بيكون كافي جدا جدا جدا ?????
طيب بقولك ايه يا دكتوره متعرفش نوع كالسيوم كويس اصلي عايز ادي الواد كالسيوم اصله عنده شهرين وضعيف و ??

#دكتور_مفيد
#روشتة_دوت_كوم
#الدواء_بقى_أونلاين