اعراض تظهر على رضيعك لا تقلقى منها
اعراض تظهر على رضيعك لا تقلقى منها
هعرضلك النهارده بعض الاعراض اللى بتظهر على الرضع وبتسبب قلق الامهات الجداد من غير مايكون فى مبرر حقيقى
1. افرازات العين :
القنوات الدمعيه لحديثى الولاده بتكون ضيقه ومعرضه دايما للاصابه بالانسداد واللى بيسبب تكون كتل بيضا او صفرا فى زاوية العين ، وكتير من الامهات بيعتقدوا ان ده صديد بسبب التهاب العين ، لكن ده مش صحيح الا لو اتحول لون الافرازات للون الاحمر .
العلاج :
العلاج فى منتهى السهوله وهو عباره عن انك تمسحى التكتلات الموجوده على جانب العين بقطنه مبلوله وكمان تدليك القنوات الدمعيه الموجوده بين العين والانف بخفه مع كل رضعه للطفل .
2. القشط :
سببه الاساسى عدم اكتمال التركيب الوظيفى للعضلات المتحكمه فى الحركات اللااردايه ومنها ابقاء اللبن فى المعده لحد هضمه واللى بيسبب ارتجاع اللبن الفايض من المرئ .
العلاج :
مفيش علاج معين الا انك تهتمى باخراج الهوا الموجود فى المعده بعد كل رضعه وغالبا بيتوقف القشط تلقائى مع قدرة الطفل على انه يقعد فمفيش داعى للقلق نهائى طالما كان الطفل مبسوط ووزنه بيزيد بانتظام .
3. الزغطه :
هي عرض مزعج جدا للكبار لكنه لحسن الحظ مش كده بالنسبه للرضع وهي عباره عن تشنجات خفيفه فى الحجاب الحاجز وممكن تتكرر كذا مره يوميا عند الرضع من غير ماتسبب اى مشكله .
العلاج :
ولاحاجه متحاوليش حتى ترضعى طفلك عشان تتخلصى منها .
4. الحول :
معظم الاطفال بيتصابوا باللى بيشبه الحول على فترات وتظهر كل عين وكأنها بتبص فى اتجاه مختلف وده مش معناه بالضروره اصابة الطفل بالحول فعضلات العين لسه فى مرحلة التطور ولسه طفلك بيتعلم ازاى الاستعمال الامثل ليها .
العلاج :
العلاج قبل ست شهور من العمر مش مطلوب ، ولو استمر الحال بعد بلوغ الرضيع 6 شهور ممكن استشارة دكتور عيون .
5. تغير طبيعة البراز وعادات التبرز عند الطفل :
بالرغم من اعتماد الطفل على اللبن كغذا وحيد فى الشهور السته الاولى فالأم ممكن تلاحظ تغير طبيعة البراز او قلة عدد مراته وده بيرجع لتباطؤ حركة الامعاء بمرور الوقت وممكن يصاحب التبرز تغيير فى تعبيرات وش الطفل وده مش لازم يكون معناه وجود امساك او غيره لان الامساك يعنى براز صلب واحيانا مختلط بدم خفيف .
6. بثرات الشفايف :
بنبه على الام دايما انها محتاجه تعديل تكنيك الرضاعه الطبيعيه الخاصه بيها لان البثور دى بتدل على احتكاك زياده نتيجة ان الحلمه مش بتكون فى بؤ الطفل بطريقه سليمه .
العلاج :
اتاكدى من ادخال مايقلش عن 2.5 سم من الحلمه والمنطقه المحيطه بيها جوه بؤه وقت الرضاعه .
7. حبوب البشره :
بتظهر عادة فى الاسابيع التلاته الاولى من عمر الطفل بسبب تاثير هرمونات الأم اللى لسه موجوده فى جسم الرضيع وبتختفى لوحدها بعد حوالى اسبوعين من غير ماتحتاجى استعمال اى نوع من العلاج .
