اكتساب القوه العضليه بدون اوزان ثقيله
اكتساب القوه العضليه بدون اوزان ثقيله
منتشر فى عالم بناء الاجسام فكرة ان بناء عضلات أقوى بيتطلب رفع اوزان أتقل ، الا ان سلسله من الابحاث الحديثه بدأت سنة 2010 اظهرت نتايج بتتحدى الفكره دى واثبتت ان رفع أوزان أخف بتكرارات اكتر بيعادل كفاءة رفع أوزان أتقل بتكرارت أقل لأن بيتساوى مقدار الاجهاد فى الحالتين ومش لخفة الاوزان او تقلها مادامت العضله بتوصل لمرحلة الارهاق فى الحالتين .
قسمت عينة الدراسه مجموعتين من الرجاله المتمرسين فى رفع الاثقال وخضعوا لنظام تدريب شمل كامل الجسم لمدة 12 أسبوع وطلبوا من مجموعه منهم رفع أوزان خفيفه تعادل 50% من قوتهم العضليه القصوى مع عدد تكرارات بيتراوح مابين 20 لـ 25 ، وطلبوا من المجموعه التانيه يرفعوا اوزان أتقل تعادل نسبة 90% من قوتهم القصوى مع عدد تكرارات أقل يتراوح بين 8 لـ 12 ، ولازم على كل مجموعه تستمر بالتمرين لحد ماتوصل للأرهاق العضلى التام ، يعنى يرفعوا اوزانهم للحد اللى تكون العضله مش قادره على اداء اى تكرار اضافى وعند النقطه دى بيكون على كل الفريقين محاولة تنشيط اليافهم العضليه عشان توليد القوه.
بعد فحص العضله وتحليل عينات الدم اكتشف الباحثين تطابق فى المقادير اللى بتمثل معيار رئيسى لقياس القوه عند الفريقين وهي الكتله العضليه وحجم الالياف العضليه ، وخرج البحث بنتيجه تانيه مهمه جدا وهي ان القوه العضليه ونمو العضله مش بيعتمدوا على هرمون التستوستيرون أو هرمون النمو ، اللى بينسب ليهم اشخاص كتير مسؤولية اكساب العضله حجمها وقوتها ، يعنى اعتبار الارتفاع المؤقت لهرمون التستوستيرون أو هرمون النمو من اسباب نمو العضله مغالطه كبيره وحان الوقت لتعديلها .
رغم ان الباحيثين مش معتقدين ان النخبه الرياضيه هتتقبل تبنى النظام ده الا انهم بيشددوا على مدى فعاليته فى اكتساب القوه وتحسين الصحه ، أما بالنسبه للمبتدئين اللى عايزين يزودوا قوتهم يقدروا دلوقتى يريحوا نفسهم من الاوزان التقيله من غير مايكون ده مقايضه على حساب مكاسبهم العضليه .
وعلى كل حال ، لسه قدام الباحثين المزيد لمعرفتهم حولين المجال ده والمزيد من الدراسات اللى بيعملوها ولازم نصوب خطانا دلوقتى على سيبل المثال نحو معرفة ايه هيا الاليات الكامنه وراء النتايج دى وايه هيا الفئات اللى تتنطبق عليها .
