تطعيم الانفلونزا الموسمى ومدى فعاليته
تطعيم الانفلونزا الموسمى ومدى فعاليته
لقاح التطعيم ضد مرض الانفلونزا الموسميه هو لقاح بناخده كل سنه قبل دخول فصل الشتا او مع بداية فصل الخريف واللقاح ده من انجح الوسايل لتقليل الاصابه بالانفلونزا لانه بينشط الجهاز المناعى وبينتج اجسام مضادة للفيروس واللقاح ده مفعوله بيشتغل بعد ماناخده بحوالى اسبوعين وممكن يتغير التطعيم كل سنه لتغيير الفيروس المنتشر فى السنه ، وفى عندنا نوعين من التطعيم واحد عن طريق حقنه والتانى بخاخ أنف.
ليه بننصحكوا بالتطعيم ضد الانفلونزا كل سنه ؟
اول حاجه بسبب التغير المستمر فى أنواع الفيروسات وعلشان الاجسام المضادة القديمه مبتتعرفش على الفيروس الجديد والعدوى تحصل تانى.
تانى حاجه لأن الاجسام المضادة اللى فى الجسم بتقل كل مامر عليها الوقت وبتقل معدلاتها بعد سنه من التطعيم علشان كده لازم ناخد التطعيم كل سنه.
ممكن حد يسأل ايه هو تأثير لقاح تطعيم الانفلونزا الموسميه؟
بيختلف تأثير التطعيم من سنه لتانيه ومن عمر للتانى وعلى حسب صحة الشخص اللى هياخد التطعيم لكن كدا كدا التطعيم بيفيد بشكل عام :
1. بيمنع من اصابة الانسان بالانفلونزا وبالتالى حماية الناس اللى حواليه.
2. بيخفف التطعيم من مضاعفات المرض.
3. بيقلل فترة المرض والعلاج.
طيب ايه فاعلية تطعيم الانفلونزا؟
صعب اننا نعرف مدى فاعلية التطعيم لانه بيختلف من موسم للتانى فلو كان الفيروس المنتشر فى البيئه شبه فيروسات اللقاح يبقا الجسم بينجح فى مكافحة الفيروس فى الموسم ده أما لو كان الفيروس المنتشر مش من نوعية الفيروسات اللى تم تحضير اللقاح منها فمش هيكون فعال بشكل كامل.
وكمان بتختلف فاعلية اللقاح من شخص للتانى زى مثلا استجابة الشباب او الصغيرين فى السن مابين 70 لـ 90% مبيتصابوش بالانفلونزا بعد التطعيم ، انما كبار السن والمرضى بحالات مزمنة اللقاح بيكون أقل فاعليه ومبيتعداش اكتر من انه يمنع مضاعفات المرض عند الاصابه بيه او يخفف شدة الاعراض.
طيب سؤال كمان ياترى فى عيوب لتطعيم الانفلونزا الموسميه؟
1. فى ناس كتير فاكرين بان التطعيم ليه عيوب واثار جانبيه بس الحقيقه غير كده الا انه فى حالات نادره مبنصحش بيه للناس اللى عندهم حساسيه شديده من البيض او الناس اللى قبل كده حصلهم حساسية من التطعيم فى جرعات سابقة أو المصابين بعدوى الجهاز العصبى.
2. أقل من تلت الناس اللى خدوا التطعيم عانوا من احتقان فى الجلد مكان التطعيم وحوالى من 5 لـ 10% بيعانوا من اثار جانبيه بسيطه زى الصداع أو حرارة بسيطه أو غثيان لمدة يوم بعد التطعيم ، وبننصح بتأجيل تطعيم الناس اللى بيعانوا من ارتفاع درجة حرارة اجسامهم مهما كان السبب.
3. لازم نتأكد من المكان اللى هناخد منه التطعيم ومكان تخزينه بشكل كويس علشان ميسببش فى حدوث اثار جانبيه.
وببنصح الأم فى النهايه انها تدى تطعيم الانفلونزا لأولادها وعيلتها وده علشان تقلل من مخاطر التعرض للعدوى بالانفلونزا وخصوصا فى حالة لو ولادك بيروحوا المدرسه ، ولازم كمان تعرفيهم الارشادات الصحيه الخاصه بقواعد النضافه للحد من امكانية الاصابه بالمرض.
