حواديت ماما .. جوجو وعروستها مستكه
حواديت ماما .. جوجو وعروستها مستكه
اشتريت عرايس ودباديب كتير وضميتها للمجموعة اللي كانت عندي -بحكم إن أنا بنت- علشان جوجو تتعود على وجودهم حواليها وتبدأ تتفاعل معاهم في سن سنة زي ما الكتاب بيقول، بس كالعادة جوجو أحبطتني جداااا وكانت بترميهم أو تقطعهم أو أي حاجة وحشة ممكنتتخيلوها لدرجة إنها مرة رمتها في الشارع!
وبعد فترة فقدت الأمل وحطيت العرايس والدباديب على الرف بس كنت كل يوم أشاور لها على عروسة محددة سميتها مستكة، وأقول لها: “مستكة مستنية تلعب معاكي يا جوجو”، وطبعًا كالعادة مكنتش بتعبرني.
وبعد سنتين، لما عيد ميلادها قرب جوجو طلبت مستكة وبدأت تلعب معاها بشكل سطحي، تعارف يعني، وقعدت 4 شهور على ما أخدوا على بعض، ودلوقتي أنا بيبقى نفسي أرمي مستكة من الشباك الحقيقة.
المسألة مبقتش لعب بس، دلوقتي جوجو بتأكل مستكة وبتزعق لها علشان مش راضية تاكل ومبتفتحش بؤها، وشربتها ميه مرة برضه، وبعدين نشرتها على المنشر علشان تنشف! وبتمرجحها على المرجيحة بتاعتها، وتنيمها لما تزهق منها وتكون عاوزة تلعب لوحدها، والكبيرة بقى إنها عاوزة تغير لها البامبرز!
أكتر موقف فطسني من الضحك لما كانت بتحاول تقعدها على المرجيحة لأول مرة، وكل ما تقعدها وتيجي تمرجحها مستكة تقع بطبيعة الحال وتتزحلق، جوجو تزعق فيها جامد وتقول لها “اأودي” يعني اقعدي بلغتها، وطبعًا مستكة يا عيني مش عارفة تقعد وبتتزحلق، وكانت نهاية القصة إن جوجو مسكتها وحدفتها في آخر الأوضة، وبكل براءة قعدت هي على المرجيحة وبصتلي وقالتلي: “متكة ننه”، يعني مستكة نامت.
ومع كل اللي أنا بشوفه نتيجة تفاعل جوجو مع مستكة من بهدلة ومحاولات إقناع رهيبة إنها مش هتقدر تعمل زيك لأنها ببساطة عروسة ! إلا إني مبسوطة جدًا، مش مبسوطة بس علشان التفاعل اللي هي عملته والفوايد اللي هتعود على شخصيتها من كده إن شاء الله، بس مبسوطة أكتر إني مزهقتش ومملتش لمدة سنة كاملة من إني أفكرها بمستكة من غير ما أضغط عليها إنها تمسكها أو تلعب معاها.
سقفة لمامي يا جوجو علشان الإنجازات الملموسة دي مش بتحصل كتير 
🙂
