حواديت ماما .. مازن وحبيبته آينور
حواديت ماما .. مازن وحبيبته آينور
ورجعنالكوا تاااانى مع فقرة حواديت ماما …
?
قصص مازن الغرامية كتير، أول مرة مازن كان عنده سنة وشوية. في مرة كان نايم جيت اصحيه قعد يقلي بس يا سما، سما دي كانت بنت المُدرسة بتاعته، وتقريبا حبه الأول ساعتها.
في الحضانة التانية صديقته كانت غزل وفضل مخلص ليها حتى لما مشيت من الحضانة وبيسأل عنها دايماً.. لغاية ماجت للحضانة الآنسة آينور.
آينور بنت قمر ورقيقة قوي ومؤدبة وشاطرة وما يتسمعلهاش حس، وما يصدرش عنها غير ابتسامة خجولة تشرح القلب، آينور أكبر من مازن بسنة، والغريب أن دايماً مازن بيحب الأكبر منه عمراً.
لما بحتاج مازن ببقى مش محتاجة أدور عليه، أنا بدور آينور فين فبلاقي مازن قاعد جنبها، وبين ويوم وليلة بقا هو المحامي اللي بيتكلم بلسانها، لو حد خد منها لعبة في العادي آينور بتسكت وتروح تاخد واحدة تانية، لكن مع المحامي مازن بقا مبيسكتش غير لما يرجع لها اللعبة، ممنوع حد يزعلها وممنوع حد يقعد مكانها.
مازن اللي كان بيروح الحضانة بالعافية دلوقت بيصحى يقولي عايز أروح لآينور، ولما اجي اخده بيزعل ويقولي امشي وتعالي بعد ما آينور تمشي.
جدوله اليومي بقا مترتب إن آينور تكون جزء منه، وبصراحة أنا معجبه بيه وبإخلاصه الشديد لصديقته.
رجعنا من الحضانة لقيته بيقولي ماما ممكن تكلمي مامة آينور علشان عايزين نخرج وانتوا معانا، انتوا تقعدوا تتكلموا واحنا نلعب.. ممكن يا ماما
خدنا الميعاد الحقيقة من مامة آينور وجاري تنفيذ رغبات آينور ومازن، المفاجأة كانت لما رحنا عند جدة مازن وكان عمال يتكلم عن آينور فعمه سأله مين آينور يا مازن؟
مازن:” آينور دي صاحبتي اللي بحبها ولما أكبر هتجوزها”.
?
