سنه أولى جواز مابين الرومانسيه والمشكلات الزوجيه
سنه أولى جواز مابين الرومانسيه والمشكلات الزوجيه
أول سنه فى الجواز بتكون حجر الاساس لبناء قوى هيستمر طول العمر ، واكيد هيتعرض لمصاعب وظروف مختلفه وعلى الزوجين انهم يفهموا كده ، ويتصرفوا بحكمه .
تعتبر الخطوبه بداية الاختيار السليم واللى لازم متكنش قصيره بشكل ان كل واحد منهم ميعرفش التانى كويس ، لكن السنه الاولى بتفتح ادامهم جوانب أكبر عشان يعرف كل واحد منهم التانى كويس وممكن تنكشف حاجات مكنتش فى الحسبان وعايزه شوية حكمه فى التعامل معاها وتنازلات من الطرفين سوا والا مش هيقدرالجواز ده انه يستمر .
أنواع المشكلات :
اختلاف الطباع :
يعتبر اختلاف الطباع بين الزوجين اكبر عقبه بيوجهوها وممكن يكون واحد منهم رومانسى بيحب التعبير عن الحب بالكلام والورد ، انما التانى بيكون عملى مش بيهتم بالحاجات دى لكنه ممكن يعبر عن حبه بالأفعال .. وممكن يكون واحد منهم شديد ومنظم أوى والتانى منتهى الفوضى ، وحتى فكرة العصبيه والهدوء والصوت العالى والصوت الواطى وحاجات تانيه كتير .
تسلط واحد منهم واستسلام التانى :
مؤسف جدا يكون واحد منهم متسلط أو متحكم أو أنانى لحد كبير ، ومتفتكروش ان الراجل دايما هو اللى بيكون كده احيانا بتكون الست هي المتسلطه ، والجواز يعنى شراكه كامله وصداقه تامه ومش تسلط خالص أو تحكم من طرف على االتانى .
تدخل الأهل :
تدخل الأهل اوقات كتير اوى بيكون هو المشكله ومينفعش ابدا الاهل يدخلوا الا بالاصلاح أو لو طلب واحد من الزوجين ده ، ومينفعش التحيز لأبنهم أو بنتهم لكن لازم التعامل بحكمه وانصاف اللى معاه الحق وتوجيه الطرف التانى براحه وهدوء .
المقارنه بعلاقه سابقه :
لما بيكون واحد من الطرفين أو حتى الاتنين مر بخطوبه قبل كده أو جواز سابق ، على طول يفضلوا يقارونوا وخصوصا لو كان الطرف مجبر على الفراق ، وكمان يفضل حتى ولو كانت المقارنه ايجابيه ميقولش اسم الخطيب او الزوج او الخطيبه او الزوجه السابقه .
اسباب المشاكل دى :
1_ النظره غير الموضوعيه والتطلعات الخياليه :
بيعيش الشباب احلام ورديه ومش واقعيه وتصورات مش منطقيه عن الجواز وبيحسبوا ان الرومانسيه اللى بنشوفها فى الافلام هى الطريقه للتعبير عن الحب ، انما الحب ممكن التعبير عنه بحاجات كتير منها تحمل مسئولية الجواز ومنها التنازل عن بعض الطباع عشان كسب التكيف والتأقلم بين الزوجين .
2_ الشكوى وافشاء الاسرار بين الزوجين :
من أكتر الاسباب اللى بتكبر المشكله حتى لو كانت للأهل لأن اللى بيسمع بيشوف من وجهة نظر اللى بيحكى وبس وممكن يديك نصيحه مش حكيمه من غير مايقصد ، ده غير ان ممكن يكون فى ناس عندها نوايا سيئه وتكبر المشكله أكتر وأكتر .
3_ التعجل :
الاستعجال فى كل حاجه مشكله وفى الجواز مشكله أكبر ، الاستعجال فى الاختيار غلط وفى الخطوبه غلط لازم التأنى والتفكير والسؤال عن الطرف التانى والاستخاره ، وبعد كده دراسة الشخص وقت الخطوبه كويس اوى ونطفى صوت القلب شويه لامتلاك التفكير الصح وانهم مناسبين لبعض ولا لأ ، انما الجواز لازم تكون السنه الأولى هى سنة البناء والاساس والتعود ودعم الجواز ده .
4_ الرأى السابق عن الراجل أو الست أو عن شكل الجواز أو عن العلاقه بالاهل :
كتير أوى بنلاقى بنات بتبعد عن أهل جوزها وشايفه انهم مش بيحبوها مهما عملت وممكن ده يكون بسبب علاقة والدتها بأهل والدها أو بسبب الاعلام اللى دايما بيسوء صورة الحمى واللى بيأثر سلبا على بناء العلاقه .
5_ التعلق الكبير بالأهل :
من الامور السيئه كمان التعلق الشديد بالأهل وده بيخلى الجواز مش ناضج وهما الاتنين ميمتلكوش الحكمه لادارة الجواز ده ، وتلاقى الجواز والبيت مش مستقر لأن واحد منهم أو هما الاتنين عايز يقضى طول الوقت عند أهله ويحكى ليهم كل حاجه وهكذا .
6_ سوء الاختيار :
سوء الاختيار من البدايه أسوأ الاسباب دى وممكن لو منضجش الزوجين ويحاولوا التأقلم بيسبب فى هدم الجواز ده .
أخطاء قاتله :
بعد الجواز بتنكشف بعض العادات اللى مظهرتش فى الخطوبه لان المخطوبين دايما فى أبهى صورة ادام بعض وللأسف فى عادات تانيه بسيطه لكن مرهقه جدا زى الفوضويه وعادات النضافه العامه والشخصيه والصوت العالى وهكذا .
طيب ازاى بقا يتعاملوا فى السنه الأولى :
_ من الافضل انهم يعرفوا ان الجواز هو شركه قايمه وسله ليها ودنين بيشلها اتنين ، ومش بحب اشبها بالسفينه اللى ليها قبطان واحد لكن حتى قبطان السفينه بيكون عنده نائب بيستشيره وياخد رأيه ، عشان كده مسئولية نجاح الجواز بيتقع على الزوجين مع بعض ومش على واحد منهم ، وان كانت الست هي الأقدر لأنها الأصبر والأكتر حنان .
_ لازم يتعلم الزوجين ان التنازل من غير اهانه هو أساس العلاقه الزوجيه وان التنازل ده لازم يكون من الطرفين ، واى علاقه انسانيه بتتطلب دايما الاخد والعطا ومينفعش يفضل واحد من الطرفين هو المعطاء دايما والتانى أنانى لأن وقتها هتبقى العلاقه تطفليه ومفيهاش شراكه وصداقه وعلاقه لازم تستمر طول العمر .
