طرق خفض حرارة الاطفال
طرق خفض حرارة الاطفال
ارتفاع الحراره مش مرض بحد ذاته انما بيشير ان الجسم بيواجه الفيروسات اللى بتهاجم جهاز المناعه وممكن يكون ارتفاع الحراره عرض مصاحب لامراض معينه ،علشان كده عليكوا متابعة الطفل وتروحوا للدكتور لو محتاج وممكن كمان تتبعوا النصايح دى لخفض الحراره عند الاطفال :
الاحساس العام للطفل :
خلى بالكوا من الاحساس العام للطفل ومتحصروش انتباهكوا فى الحراره العاليه فلو كان الطفل واضح ان حالته كويسه وبيتجاوب معاكوا وبيتصرف عادى ممكن تستنوا لأن الحراره ممكن تقل لوحدها تلقائى قبل ماتروحوا للدكتور.
درجة حرارة الأوضه :
حاولوا تكون حرارة الاوضه الموجود فيها الطفل مش مرتفعه بمعدل 20 درجه مئويه واهتموا بتهوية الاوضه بشكل دايم حتى لو كان الجو برد.
الغطا واللبس :
متلفوش الطفل بطبقات من الغطا والهدوم لان الهدوم والغطا الزياده ممكن يساهم فى زيادة درجة حرارة جسمه ، والبيئه الدافيه اكتر من الازم بتوفر ظروف مناسبه لتكاثر الجراثيم,
الاكثار من السوايل :
اهتموا انه يشرب الطفل سوايل كتير وخصوصا الميه لمنع اصابته بالجفاف وممكن تديله السوايل المسكره برضه زى عصير الفواكه المحلى والسوايل المالحه زى الشوربه وخصوصا لما يكون فى اسهال مع ارتفاع الحراره وابعدوا عن اللبن فى الحاله دى بس لو مفيش اسهال اديله اللبن عادى.
تتبع درجة الحراره :
لازم مراقبة وقياس الحراره بشكل دورى ومنتظم علشان لو حصل انخفاض ليها فدى حاجه كويسه ، انما لو استمرت الحراره بالارتفاع بيقا هتضطروا تستعملوا السوايل التانيه لخفض الحراره اللى هنقول عليها كمان شويه.
مغطس الميه :
املوا الطشت ميه او البانيو ونزلوا الطفل فيه لمدة 15 دقيقه ، فمغطس الميه بينعش الطفل واستخدموا الميه الفاتره بس واتجنبوا الميه الساقعه لانها ممكن تسبب فى هبوط درجة حرارته بشكل كبير وكده ممكن يسبب ليه اضرار كبيره.
كمادات الميه الساقعه :
حطوا على راسه كمادات مبلوله بالميه وممكن تحطوا شوية خل للميه وحطوا الكمادات كمان على الايدين والرجلين لأن الطريقه دى هتساعد على خفض الحراره المرتفعه والكمادات هتمتص الحراره.
استخدام خافضات الحراره :
فى حاله لو كانت حرارة الطفل اكتر من 38.5 درجه مئويه ومش عارفين تروحوا للدكتور ممكن تدوله دوا خافض للحراره خاص بالاطفال ، لكن ضرورى قراءة وفهم النشره الطبيه اللى بتكون مع الدوا قبل استخدامه وده علشان الحفاظ على مده زمنيه كافيه بين الجرعات وتدوله الجرعات الموصى بيها على حسب وزنه منعا لظهور الاثار الجانبيه.
مراجعة الدكتور :
لو استمرت الحراره لأكتر من يومين وكانت فوق الـ40 درجه مئويه يبقا لازم تروحوا للدكتور فورا ولو كانت حرارته اقل من الـ40 لكنه كان بيعانى من اعراض زى ضيق التنفس والاضطراب وصعوبة فى تحريك الاطراف يبقا فى الحاله دى لازم تتوجهوا للدكتور فورا.
