طفلك عنيد ؟ لن تتوقعى مميزاته
طفلك عنيد ؟ لن تتوقعى مميزاته
متتضايقيش ، الحقيقه انتى بتملكى كنز من غير ماتعرفى وأحسنى استغلاله .
أظهرت الدراسات ان العناد مؤشر واضح للنجاح والتميز فى الحياه المستقبليه ، والتأثيرات الايجابيه اللى بسبب الصفه دى لو تم التعامل معاها بحكمه من الصغر هتخلق قائد فى المستقبل فى مختلف المجالات .
وعلى رأس التأثيرات الايجابيه دى :
1. المثابره والاصرار :
الانسان بشكل عام محتاج للعناد والاصرار لما يبدأ فى مواجهة العقبات فى حياته ، وبيوصل بفضل ده لأعلى المراتب فى مجاله ، ولو كان من اللى بيستسلموا بسهوله وبيرضوا بالأمر الواقع من غير مثابره واصرار على تخطى العقبات ساعتها هيكون شخص عادى مش متميز على الاطلاق .
طبعا هتلاقى الموضوع صعب ومرهق فى السنين الأولى من عمره وهتلاقى قدامك طفل متجاوزش تلات أو أربع سنين بيناقشك لساعات طويله عشان ينام متأخر أو يقضى عدد ساعات أكبر قدام الايباد .
مع كل ده الموضوع يستحق منك الصبر والمناقشه وطولت البال عشان متخسريش كنز ثمين .
2. الاستقلال :
الطفل العنيد مش بيقلد حد ومش عايز يكون زى حد ودى من أهم مميزات الشخصيه القياديه ، لانك بتملكى شخصيه مستقله ملهاش شبه فى تفكيرها ورغباتها وطموحها حد .
3. الاعتماد على النفس :
لاحظت كتير ان بنتى اللى عندها 3 سنين مش عايزه مساعده منى لما تكون عايزه حاجه يعنى مثلا لو عايزه تجيب ريموت التليفزيون من الرف العالى من المكتبه بتنزل كل الكتب وتتسلق الارفف وتجيب الريموت .
ازاى تتعاملى مع عناد طفلك :
1. مش ممكن التعامل مع الطفل العنيد بطريقه عصبيه أو ترمى الأوامر على راسه من غير ماتفكرى فى العواقب لان الشخصيه دى بتعتمد بشكل كلى على المناقشه والاقناع ، عشان كده لو كان عايز طفلك يروح الحضانه بالبيجامه يبقى مينفعش توقفيه بالأمر والعصبيه ولازم تلاقى حلول مقنعه بديله عن انه يروح بالبيجامه وممكن فى حاجات تفويتيها وتسيبيه يعملها قدام اللى فى راسه مش هيسبب خطوره عليه .
2. حطى حلول واضحه للتعامل مع الطفل العنيد وده أمر أساسى ومهم لتربية شخصيته القياديه وعليه انه يتقبل وجود فكرة الفشل والنجاح ، ومثال على ده :
لو هتخرجى مع ابنك تتفسحوا وطلبتى منه الاستعداد عشان تخرجوا بعد ربع ساعه ووافق ، وبعدها مستجبش للتحذير الأول والتانى ، وقولتيله انك هتخرجى لو مسمعش الكلام ، ولازم تتظاهرى بشكل واقعى انك خارجه لو منفذش الاتفاق .
3. التفهم لمشاعر الطفل وقت تنفيذ الحدود موضوع مهم جدا ، يعنى بدل ماتقولى ” خلاص خلص وقت اللعب وهتتعاقب لو مبطلتش لعب فورا ” ، ممكن تقولى ” انا عارفه انك بتحب اللعبه دى وصعب توقف حاجه بتحبها بس لازم نتحكم فى ده ونرجع نلعب تانى بكره “.
فى الحالتين وصلتى لهدفك ، لكن الطريقه اللى تفهمتى بيها مشاعر طفلك العنيد هتعزز عنده فهم مشاعره وبالتالى التعبير بشكل جيد عن اللى بيدور جواه .
4. التمسك بالهدوء وعدم ابداء اى رد فعل ، لما يبدأ طفلك فى استعراض العند بشكل قوى قدامك ، خدى نفس عميق ومتظهريش رد فعل ايجابى أو سلبى ، بس ابدئى بالمناقشه .
اخيرا ، تربية الطفل العنيد على وجه الخصوص مهمه صعبه جدا فى ظل الاوضاع الاجتماعيه والاقتصاديه اللى بتضغط علينا كلنا ، عشان كده لو غلطتى مره ميهمكيش وعدلى من سلوكك فى المره التانيه ، فتصحيحك لاخطائك أحسن من انك تتوقفى خالص عن فعل الصواب .
