فى اسبوع واحد : دربى طفلك على الحمام !
فى اسبوع واحد : دربى طفلك على الحمام !
تدريب الطفل على دخول الحمام من اصعب المراحل اللى بتمر بيها الامهات وبالاضافة للأرهاق والضغط العصبى فيه اطفال مبيقبلوش الفكرة بسهولة ، وفى اساليب كتيرة ومختلفة لتدريب ابنك على دخول الحمام منها الاسلوب التدريجى واسلوب اليوم الواحد لكن من احسن الطرق واسرعها فى الوقت ده هو التدريب عن طريق استراتيجية الاسبوع وبتكون نتايجها كويسه جدا.
ازاى أقدر ادرب ابنى على الحمام فى اسبوع ؟؟؟
فى الاول لازم تختارى الوقت المناسب علشان تعملى كده والوقت ده بيعتمد على ابنك ، هل هو مستعد للتدريب على الحمام ولا لأة ؟ وده بيعتمد على جهدك اللى قبل كده فى انك تخليه فاهم عملية الاخراج بشكل واضح عن طريق القصص والحواديت والطرق التانيه.
بعد كده روحى واشترى القصرية المناسبة لابنك ومن الافضل انك تاخديه معاكى علشان يحس بالمسؤوليه ناحية الموضوع ده وكمان هيختار اللى بيحبة باللون اللى يعجبة.
واخيرا … هوه ده الوقت المناسب علشان تبدأى الخطوات اللى هتستمر لمدة اسبوع :
1- تحديد مواعيد لدخول الحمام:
مهم اوى تزودى نشاط ابنك طول اليوم وتهتمى بحركتة وتقدميله انشطة مختلفة ووجبات منتظمة طول اليوم وتهتمى بشرب الميه والعصير الطازة ، ومع اول الاسبوع لازم تحددى مواعيد معينة لدخول ابنك الحمام لانك لسه فى مرحلة تدريبة على انه يفهم ان دخولة للحمام لما يكون عايز يتبول او يتبرز علشان كده فى اول تلات ايام اعرضى علية كل نص ساعة يقعد على قاعدة الحمام ، وخدية للحمام بس مش بالعافيه والغصب او عنف علشان ميكرهش الموضوع كلة واقلعية الحفاضة وسيبيه يقعد شوية وقت ولبسيه الحفاضة تانى.
الفترة دى بس علشان يفهم اهمية دخولة للحمام لما يكون عايز يعمل حمام.
2- اتركيه عاريًا لبعض الوقت:
بعد مايعدى 3 ايام سيبى ابنك عريان لاوقات مختلفة فى اليوم وطبعا اكيد انا بتكلم عن فصل الصيف وفهميه انه يروح الحمام اول مايحس انه عايز يتبول او يتبرز وطبعا مع مراقبه باستمرار منك طول اليوم وبالتدريج هيتعلم ان فى هناك مكان واحد علشان يعمل فيه ولازم يروحله لما يعوز.
انما بقا فى الشتا متقدريش تعملى كده والبديل انك تحطى القصرية فى كل مكان بيروح ليه فى البيت وفى الوقت ده نقلعه الحفاضة عنه كلها.
3- أسلوب التحفيز:
مع بداية جلوس ابنك على الحمام استخدمى الجوايز على طول وفورا واعملى طرق كتير علشان تشجعية على الاستمرار ومع كل مرة يطلب فيها انه يقعد على الحمام كافئية على طول بحاجة بيحبها.
