كيف تجنب طفلك الشعور بالعطش والجوع خلال الصيام؟
كيف تجنب طفلك الشعور بالعطش والجوع خلال الصيام؟
مفيش شك ان تربية الطفل على صيام شهر رمضان المبارك لازم تبدأ فى سن مبكره وبصوره تدريجيه لحد مايوصل الطفل لمرحلة الصيام الكامل من غير تعب .
ولكن بعض الاطفال وخصوصا فى السنين الأولى للصيام بتواجههم نوبات من الاحساس بالجوع والعطش فى النهار وخصوصا فى الحر ، ودى بعض النصايح اللى هتجنب طفلك الاحساس ده وهتخليه يكمل صيامه بسلام .
السحور :
من أهم عوامل تجنيب طفلك الاحساس بالجوع والعطش هي مسألة تأخير السحور لحد قبل اذان الفجر بنص ساعه وكمان لازم تقديم سوايل ليهم ويفضل انها تكون فى صورة فاكهه أو خضار عشان يقدر جسم الطفل تخزين السوايل لفترة طويله بعكس المشروبات أو الميه ، ولازم تحتوى الوجبه دى على البروتينات والنشويات اللى هتساعد على الاحساس بالشبع لأطول فتره ممكنه وكمان بتمد الجسم بالطاقه الازمه .
الفطار :
لازم تعجيل الفطار بمجرد رفع اذان المغرب عشان يقدر الطفل ياكل التمر والميه ويحس بثمرة مجهوده طول النهار ويعرف ان تأخير السحور وتعجيل الفطار سنه نبويه محببه ، وقدميله الفاكهه اللى فيها سوايل كتيره زى البطيخ عشان يعوض جسمه اللى فقده من ميه طول النهار .
نوعية الأكل :
لازم نهتم بأننا نبعد الطفل عن الأكل المليان بالدهون والسكريات واللى فيه كميات كبيره من الملح لأنها بتسبب الأحساس بالعطش والجفاف كمان فى فترة النهار وده اللى ممكن يسبب ليه أزمه حقيقيه .
الزبادى :
الزبادى من الأغذيه المهمه جدا بشكل عام وخصوصا للأطفال ولازم نهتم بتقديمها ليهم فى السحور لأنها بتهدى المعده بشكل كبير ده غير انه بيساعد فى فقدان الوزن الزائد وخصوصا لو كان الطفل مصاب بالسمنه .
الحلويات :
لازم يكون أكل السكريات والحلويات بعد الفطار بفتره كويسه عشان يقدر جسم الطفل هضم الفطار بشكل كويس تجنبا لاصابته بعسر الهضم اللى هيخليه ميقدرش يتسحر وبالتالى هايحس بالجوع ووالعطش بصوره كبيره بالنهار .
شغل الوقت :
لازم تخليه يشغل وقته بمجموعة حاجات فى فترة الصيام زى العباده وقراءة القران عشان ينسى الأحساس بالجوع والعطش خالص ، وابعديه خالص عن انه يبذل مجهود عشان ميخلصش طاقة جسمه فى ساعات النهار والصيام .
