متى تكون العصائر الطبيعيه غير صحيه؟
متى تكون العصائر الطبيعيه غير صحيه؟
كلنا متخيلين ان جميع انواع العصاير صحيه ومفيده وده بسبب ارتباطها بالفواكهه وفوايدها العظيمه ، لكن فى الحقيقه ان بعض الدراسات اللى اتعملت حولين الموضوع ده واثبتت ان العصاير الطبيعيه مش صحيه دايما ، وهقولكوا دلوقتى بعض الحقايق المدهشه عن العصاير :
العصائر خالية من الألياف:
العصاير مليانه كتير من المعادن والفيتامينات ومضادات الأكسدة، ولكنها خاليه من الالياف ولما بنعصر الفاكهه وبنقدمها فى صورة عصير بتفقد نسبه كبيره من قيمتها الغذائيه ، مثلا لما بنعصر برتقانه بنلاقى ان العصير بيحتوى على نفس المعادن والفيتامينات الموجوده فى البرتقانه بس خالى من الالياف ومليان نسبة سكر عاليه .
وعدم وجود الالياف فى العصاير بيسبب مشاكل صحيه كتير لأن الجسم بيمتص السكر بسرعه كبيره ويوصل للكبد ويحوله الكبد لصورة دهون واللى بيسبب فى ارتفاع نسبة الكوليسترول فى الدم.
العصائر تجعلك تتناول كميات أكبر من السكر:
لما بناكل حبات الفاكهه الكامله كده بنساعد فى ابطاء عملية امتصاص الجسم للسكر ، وسبب ده اننا لما بناكل حباية الفاكهه بنستهلك وقت وطاقه وكمان حباية الفاكهه الكامله بتحتوى على الالياف اللى بتساعد على الاحساس بالشبع ، يعنى مثلا لو بتاكل برتقانه هتكتفى بواحده او اتنين انما بقا لو هتشربه عصير ممكن تكون شربت 4 وحدات من غير ماتحس بالشبع.
العصائر تضر بصحة الأسنان:
اكدت بعض الدراسات الحديثه ان طبقة المينا اللى موجوده فى السنان ممكن تتعرض للضرر والتلف بسبب تناول كميات كبيره من العصاير وده بيرجع لان بعض العصاير فيها نسبه عاليه من الاحماض اللى بتنتجها البكتيريا اللى بتتغذى على السكر ، علشان كده لازم نهتم بصحة السنان وغسيلها بالفرشه بعد شرب العصير ونقلل من شرب العصاير ونبدلها بأكل الفاكهه كامله.
العصائر تؤدي إلى زيادة الوزن وأمراض القلب:
الدراسات اثبتت ان السعرات الحراريه اللى بياخدها الجسم من السوايل بتسبب فى زيادة الوزن على عكس السعرات الحراريه اللى بياخدها الجسم من المواد الصلبه اللى بتكون بنسبه أقل ، وكمان اكدت الدراسات ان مخاطر السمنه عند الاطفال بتزيد بنسبة 60% لما بيشربوا العصاير بشكل مستمر ، وكمان ممكن تسبب الاصابه بامراض القلب .
