مساعدة طفلك فى كتابة موضوعات التعبير
وهقولك دلوقتى الخطوات اللى ممكن تمشى عليها وتعلمى طفلكالطريقه الصحيحه لكتابة موضوع التعبير :
اولا : ابدئى بالاساسيات :
_لازم تتأكدى الاول ان ابنك بيجيد قواعد الهجاء والنحو المتناسب مع سنه ومستواه الدراسى واى محاوله منك علشان تتجاهلى الجزء ده من المهارات التعليميه قبل مايبدأ ابنك فى كتابة موضوع التعبير هيخلى مجهودك لمساعدته على الكتابه على الفاضى .
_بعد كده تقدرى تبدأى تشرحى معنى كتابة موضوع التعبير وتقدرى دايما تستعملى مصطلح الرساله أو الفكره الرئيسيه اللى لازم توصل للى هيقرا الموضوع ولازم يعرف الطفل كويس ان كل جمله هيكتبها لازم تكون مرتبطه بشكل مباشر بالفكره الرئيسيه اللى بيدور حوليها موضوع التعبير.
ثانيا : علمى ابنك ازاى يقدر يخلق اطار عام يخليه يقدر يكتب موضوع التعبير :
_ بالنسبه للأفكار العامه لازم يحدد الطفل لو كان بيدعم الموضوع المطلوب كتابته او بيعارضه زى مثلا اعادة التدوير عمليه نافعه.
_ بالنسبه للأفكار المساعده اللى بيستعملها الطفل علشان يدعم معلوماته ورأيه الشخصى وغالبا بتكون الافكار دى اجابه لأسئله بتبدأ بـ كيف ولماذا .
_ بالنسبه لتقسيم كتابة موضوع التعبير بينقسم الموضوع عادة لمقدمه وبعدين جسم الموضوع بيتكون من فقرتين منفصلتين بحد أدنى وبعدين فقره ختاميه.
ثالثا التعليم بالامثله والممارسه :
_ هيكون دايما سهل تعليم الطفل عن طريق امثله واضحه ليه وعرض مواضيع شبه الموضوع المطلوب كتابته والشرح النظرى بس ممكن يكون مش واضح للطفل فى المراحل الاولى وكمان مفيش مانع اطلاقا من مساعدة الطفل على الكتابه فى المواضيع الاولى اللى بتتطلب منه يكتبها باقتراح الافكار او العبارات وده علشان يقدر الطفل يستوعب فكرة الكتابه والغرض منها.
_ تقدرى كمان مساعدة ابنك بانكوا تخرجوا الافكار سوا وتقدرى تدفعيه للتفكير فى العناصر المفيده لكتابة الموضوع عن طريق طرح اسئله مباشره او غير مباشره ومفيش بديل للممارسه العمليه علشان تنمية قدرات ابنك على الكتابه حاولى تخلى الموضوع مسلى ومثير للأهتمام علشان تدفعيه لكتابة موضوعات ممكن يختار افكارها بنفسه وكمان يقدر يطبق قواعد الكتابه عليها وتقدرى تستعملى المكافأت علشان تحققى الهدف ده.
_ عودى ابنك على كتابة ملاحظاته اوالمذكرات اللى بتتعلق بالرحلات والمناسبات لأن ده هيقوى قدراته على التعبير عن افكاره وتقدرى تساعديه بتصحيح الاخطاء النحويه والهجائيه.
_ كتابة الرسايل كمان من اكتر الوسايل اللى بتساعد الطفل على الكتابه بأنك تقترحى عليه انه يكتب رساله لحد من القرايب ويوصف ليه فيها حاجه حصلت او مناسبه عائليه.
ملحوظات مهمه :
_ افتكرى ان السعى للكمال فى مرحلة التعليم مش منطقى فمتضغطيش على ابنك لتحقيق تقدم بسرعه.
_حطى فى اعتبارك ان الكتابه من اهم الوسايل اللى هتزود حصيلته اللغويه وهتساعده على تصحيح اخطائه النحويه.
_ شجعى ابنك على القراءه واعرفى انها الوسيله الأمثل لاثراء افكار طفلك واطلاق العنان لخياله واثراء قدرته اللغويه والكتابيه وبننصح دايما بتشجيع الاطفال من سن صغيره بالقراءه ليهم فى القصص المصوره واللى بيساهم فى تنمية حب القراءه عندهم.
