أسباب وعلاج أكياس المبيض
أسباب وعلاج أكياس المبيض
كيس المبيض هو كيس مليان بسائل بينمو على المبيض وهى حاله شائعه جدا وعادة مش بيسبب اى أعراض ، وبتتشكل اغلب اكياس المبيض طبيعى وبتختفى فى بضعة اشهر من غير الحاجه لاى علاج .
والمبيضين هما عضوين صغيرين ليهم شكل حبة الفول وهما جزء من الجهاز التناسلى للأنثى ، ولكل ست مبيضين كل واحد على جنب من جوانب الرحم.
وللمبيضين وظيفتين رئيسيتين :
1_ اطلاق بويضه كل 28 يوم كجزء من دورة الطمث.
2_ افراز الهرمونات الجنسيه الانثويه ، الاستروجين والبروجيسترون واللى ليها دور مهم فى التكاثر.
3_ ممكن تصيب التكيسات المبايض الاتنين فى نفس الوقت او تصيب مبيض واحد.
أعراض أكياس المبيض :
بيسبب كيس المبيض اعراض بس فى حالة انفجاره أو لو كان كبير جدا أو بيمنع التروية الدموية للمبيض.
وفى الحالات دى هتعانى من :
1_ الام بالحوض وهتحسى بتقل وبعدين وجع مفاجئ وشديد وحاد.
2_ ألم وقت الجماع.
3_ صعوبه فى الاخراج .
4_ الحاجه المتكرره للبول.
5_ غزارة الدوره او عدم انتظامها او ان تكون كمية الدوره اقل من العادى.
6_ انتفاخ البطن.
7_ الاحساس بالامتلاء بعد الاكل بكميات قليله.
8_ صعوبة حدوث حمل.
انواع أكياس المبيض :
أكياس المبيض الوظيفيه : وهي أكياس المبيض اللى بتتكون كجزء من دورة الطمث وهى عادة مش ضاره وعمرها قصير ، والنوع ده هو المنتشر اكتر.
أكياس المبيض المرضيه :وهي اكياس المبيض اللى بتنشأ بسبب نمو خلوي مش طبيعى والنوع ده مش منتشر اوى.
وممكن يكون سبب اكياس المبيض حاجات تانيه زى بطانة الرحم المهاجره على سبيل المثال.
وبتكون الاغلبيه العظمى من اكياس المبيض حميده ( غير سرطانيه ) انما فى عدد قليل منها بيكون خبيث ( سرطانى).
علاج اكياس المبيض :
لما بيكون كيس المبيض محتاج علاج فده بيعتمد على الاتى :
_ حجم الكيس وشكله.
_ لو كانت المريضه بتعانى من اى اعراض ولا لأ.
_ وكمان لو كانت المريضه فى سن انقطاع الدوره ولا لأ.
وفى اغلب الحالات الكيس بيختفى تلقائيا فى شهور قليله وبتستخدم المتابعه بالمسح بالاشعه فوق الصوتيه علشان تتأكد من ده.
بعد سن انقطاع الدوره بتكون الستات متعرضين اكتر لسرطان المبيض وبالتالى وجود كيس فى السن ده بيحتاج مسح بالاشعه فوق الصوتيه بانتظام وكمان تحاليل للدم لمدة سنه لمراقبة الكيس ده.
وممكن نحتاج للعلاج الجراحى علشان نشيل الاكياس فى حالة كانت كبيره وبتسبب اعراض او انها ليها احتمالية تحولها لسرطان.
أكياس المبيض والخصوبه :
اكياس المبيض عادة مش بتمنع الحمل ولكن فى بعض الاحيان بتخليه صعب.
فلو كنتى محتاجه لجراحه لازالة الاكياس ، يبقا الجراح هيكون هدفه الحفاظ على خصوبتك قدر الامكان عن طريق ازالة الاكياس بس ويسيب المبيضين أو يشيل مبيض واحد بس.
وفى بعض الحالات بيكون ازالة المبيضين ضرورى ، وفى الحاله دى مش هتقدرى على انتاج اى بويضات وبالتالى لازم تتكلمى مع الجراح حولين تأثير الجراحه على خصوبتك قبل اجراء العمليه.
