اسباب وعلاج انيميا الفول
![](https://blog.rosheta.com/wp-content/uploads/2017/07/19642728_1948820631996998_4749242505446083933_n-1.png)
اسباب وعلاج انيميا الفول
لما بدأت أدخل الاكل لأبنى مع الرضاعه وده طبعا بالمتابعه مع الدكتور بتاعه لقيته طلب منى لو عايزه أأكله فول الاكله المفضله طبعا للشعب المصرى ، يبقى لازم أبدأ بفوله واحده ولو مظهرتش عليه أى اعراض يبقى خلاص اقدر ازود لفولتين فى اليوم التانى مع الملاحظه وهكذا لحد ماأتاكد من انه مش بيعانى من أنيميا الفول ، وخصوصا ان المرض ده شائع فى الاولاد عن البنات عشان كده نخلى بالنا ونكون عارفين كل حاجه عن انيميا الفول .
ايه هيا انيميا الفول ؟
انيميا الفول مرض وراثى شائع فى كل انحاء العالم واتصاب بيه حوالى 400 مليون شخص على مستوى العالم ، وهو عباره عن نقص انزيم «جلوكوز6 – فوسفات دى هيدروجيناز» أو«G6PD»، واللى بيساعد خلايا الدم الحمرا عشان تعمل بشكل صحيح وفى الوقت نفسه بتحمى خلايا الدم الحمرا من بعض المواد المؤكسده لانه فى حالة نقص الانزيم ده عند الطفل واتعرض الطفل ده لبعض المواد المؤكسده فالمواد دى بتكسر خلايا الدم الحمرا .
ايه اللى بيسبب نقص إنزيم «G6PD»؟
عندنا الجين المسئول عن تكوين الانزيم ده على الكروموسوم «X» ، فلو حصل خلل او طفره فى الجين ده بيسبب نقص تكوين الانزيم ده وزى ماهو معروف فكروموسومات الإنثى «XX»، وكروموسومات الذكر «XY»، فلو حصل خلل فى الجين الموجود على الكروموسوم «X»، بالنسبة للذكر بيتصاب على طول بالمرض انما بالنسبه للانثى فوجود كروموسوم «X» تانى بيعوض الخلل ده ومتتصابش بالمرض ، وده بيفسر اصابة الذكور أكتر من الاناث بالمرض ده .
ازاى بيتم تشخيص انيميا الفول ؟
بيتم ده عن طريق عمل فحص دم بسيط فنلاقى ان نسبة «الهيموجلوبين» بتكون منخفضه ونسبة «البيلوروبين» بتكون عاليه ، وبعدها ممكن التأكد بعمل فحص خاص بإنزيم «G6PD».
ايه هيا اعراض انيميا الفول ؟
الطفل المصاب بالمرض مش بيكون عنده أى أعراض الا لو اتعرض لأى من المواد المؤكسده اللى بتسبب تكسير خلايا الدم الحمرا والاعراض دى بتعتمد على نوع المواد المؤكسده دى ، وعلى الكميه المأخوذه منها ، فأحيانا لو اتناول كميه بسيطه منها مش بيكون عنده أى أعراض ولو اتناول كميات كبيره ممكن يوصل الموضوع لانحلال الدم أو التدمير السريع لخلايا الدم الحمرا واللى بتكون أعراضه :
شحوب الوجه.
التعب.
ضيق فى التنفس.
سرعة ضربات القلب.
إصفرار الجلد والعنين، خاصة لو كان الطفل حديث الولادة.
تلون لون البول بلون الشاى.
ولو حصل لطفلك اى اعراض من دى .. يبقى لازم انك تروحى بيه للمستشفى فورا لانه ممكن يحتاج نقل دم ، ولو تم السيطره على الحاله وابتعد عن السبب هتختفى الاعراض تلقاء نفسها .
ايه هيا المواد المؤكسده اللى بتسبب انيميا الفول ؟
1. بعض الاطعمه زى البقوليات بجميع انواعها وفول الصويا .
2. بعض الادويه المسكنه او الخافضه للحراره زى الاسبرين .
3. بعض المضادات الحيوية اللى بتحتوى على المصطلح «Sulf» فى اسمها العلمى.
4. بعض الأدوية المضادة للملاريا اللى بتحتوى على المصطلح «Quine» فى اسمها العلمى.
5. بعض المواد الكيميائية زى «المنثول».
والمواد دى لازم البعد عنها تماما .. لا تأكل ولا تلمس ولا تشم، ولو كان طفلك مصاب بانيميا الفول فالدكتور المعالج هيديك قايمه مفصله بالممنوعات .
ازاى تعتنى بطفلك المصاب بأنيميا الفول ؟
1. المعرفه الجيده بقايمة المواد الممنوعه والاحتفاظ بيها معاكى فى كل وقت ومكان ، لأن انيميا الفول سهل السيطره عليها لو اتجنب المواد الممنوعه .
2. مراجعة اى حاجه بتتقدم لطفلك والتأكد انها مفيهاش اى حاجه ممنوعه .
3. التأكد من ان قرايبك او اى حد من اللى بيقدم الرعايه للطفل زى مثلا مدرسة الحضانه لازم تكون على علم بالقايمه دى .
4. عمل فحص دوري لطفلك عشان التأكد من نسبة «الهيموجلوبين».
5. لو اتعرض طفلك لأى مرض .. يبقى لازم مراجعة الدكتور لأخذ العلاج المناسب .
6. لما يسمح سن طفلك الكلام معاه كلمه عن أنيميا الفول عشان تزود وعيه وعرفه انه هيعيش حياه طبيعيه زى اخواته لو أهتم بالموضوع وابتعد خالص عن المواد الممنوعه .
أخيرا .. أتمنى انكوا متقلقوش فالموضوع بسيط وممكن السيطره عليه باتباع التعليمات بدقه ، شفى الله أطفالنا جميعا.