التبول الاارداى عند الاطفال
التبول الاارداى عند الاطفال
يا دكتوره ابني مغرقني كل يوم وبيعملها علي نفسه … الواد عنده 3 سنين ونصف ولسه بيعملها يا دكتور مع اني قطعت كل شباشب البيت عليه ومفيش فايده 
?
الاول عايز اقولك ان تخيلي ان السن الرسميه علشان نقول ان في طفل عنده تبول لا ارادي هي 5 سنين !!!! ايه بتقول ايه يا دكتور 5 سنين دا الواد توتي ابن عمت اخت خالته بيدخل الحمام وهو عنده سنه ونصف … ايوه يا ماما وكمان فيزو ابن خالت ام جارت ام جارتنا اتسلق جبل المقطم وهو عنده سنه وشهرين 
? في اختلافات بين الاطفال وكل طفل بيسبق في حاجه ويتأخر في حاجه 
?
الاول خلينا نتفق ان التبول اللارادي نوعين مهمين جدا ركزي معايا علشان تفرق اوي 
?
– الاولاني ان الطفل بعد عمر 5 سنين ميكونش مسك نفسه قبل كده يعني علطول بيتبول من ساعه ما اتولد ومكملش فتره 6 شهور علي بعض يمتنع عن التبول فيهم
– النوع التاني اللي هو الطفل فيه بيرجع للخلف يعني قعد فتره كويس بيمسك نفسه اكتر من 6 شهور علي بعض وبعد كده رجع يتبول تاني علي نفسه
ودي تفرق ايه يا دكتوره هو المتنيل علي عينه مش كده كده بيغرقنا وخلاص 
? ….. لا تفرق كتير اوي النوع الاولاني بيخلينا نفكر اكتر في اسباب العيوب الخلقيه وسوء التدريب والمشاكل اللي بتكون معاه من الاول …والنوع التاني بيخلينا نفكر اكتر في الاسباب النفسيه والاسباب اللي ممكن تجد علي الطفل 
?
خلينى اقولك بقه ايه هي اهم اسباب التبول الاارادي
1- اول واهم سبب هو سوء التدريب علي حبس البول وسوء ادارة الموضوع من الاب والام ودي علشان نتجنبها هندي شويه نصايح مهمه في طريقه تدريب الطفل 
?
2- ان الواد يشرب كولا وبيبسي وشاي وشيكولاته كتير ? ايه بتقولى ايه يا دكتوره البيبسي والكولا والشاي بيعملوا تبول لا ارادي … اه طبعا تخيلي لان الكافيين الموجود فيهم مدر للبول وخاصه لما تتشرب بالليل قبل النوم …
3- كميه الاكل الكبيره وشرب الميه الكتير قبل النوم المفروض العشا يكون خفيف علشان الطفل ميشربش كميات ميه كبيره ومحبكتش انك تترسيها للواد قبل ما ينام علشان ينام شبعان يا كبد امه 
?… المهم الفطار والغدا دول اهم بكتير …
4- مشاكل التنفس زي اللحميه وحساسيه الصدر وحساسيه الانف اللي مبتتعالجش كويس … ايه يا دكتوره يعني اللحميه تخلي الواد يعملها علي نفسه دا الواد خاربها خنفره وشخير واحنا صابرين قلنا نطنش اصل الواد صغير … لا طبعا يافندم مشاكل التنفس والكحه بتسبب الكوابيس وعدم انتظام النوم ومشاكل في ضغط البطن وتسبب التبول الا ارادي … يعني لو في لحميه تتعمل لو في حساسيه صدر تتعالج كويس 
?
5-الامساك المزمن !!!! امساك ايه يا دكتوره ? يعني هو الواد علشان ممسوكه عليه من ورا فربنا بيفكها عليه من قدام ازاي يا دكتوره 
? … اه والله ده حقيقي الامساك المزمن بيسبب تضخم المستقيم اللي هو مخزن البراز ومع مرور الوقت بيضغط علي المثانه وميديهاش براح تتمدد فيه في البطن فيحصل تبول لا ارادي …وعلي فكره حالات كتير جدا من التبول الاارادي بيكون هو ده السبب والاب والام مش واخدين بالهم … بس بصي موضوع الامساك ده بقه لوحده حكايه تانيه هنعمله موضوع لوحده قريب … اصبري انتي عليا بس ?
6-المشاكل النفسيه ودي بقه زتونه الزتونه … مثلا مشاكل الاب والام وموت حد عزيز علي الطفل وبالذات الجده ومشاكل المدرسه او الحضانه او ناس في حياة الطفل عايزه ضرب ال 
? ? … مشكله جامده وخاصه لما يكون سببها حاجه خارجه عن اراده الاب والام 
? بس كل حاجه ليها حل بس ندور ويكون عندنا عزيمه نحل المشكله 
?
?
7- مشاكل مؤقته زي التهابات مجري البول والاملاح ودي بقي عن المانجو والفراوله والمخلل و الشيبسيات والدوريتوس والاسناكس نتحدث وحدث ولا حرج ….. اعمل ايه يا دكتووووره مش عايزه احرم الواد من حاجه …. كده طيب خدي دي 
? ?
8- مشاكل بقه عايزه دكتور زي العيوب الخلقيه في مجري البول ومشاكل الكلي ومشاكل في المخ ومشاكل في الهرمونات زي امراض السكر ونقص الهرمون المضاد للتبول ودي الدكتور بيدور عليها وبيستثنيها وفي دي ادي العيش لخبازه وسيبيها للدكتور 
?
?
ما كفايه بقه يا دكتوره وقوليلى اتصرف ازاي واعمل ايه ? في حل تاني غير اني انسل الشبشب
? علي الواد و ? … يا ستي ارحمي الواد انتي كده هتخلي عنده مش بس تبول لا ده تبول وتبرز لا ارادي ? استني بقه وخلينى اقولك نعمل ايه:
1- نقلل من شرب السوايل والميه والعصاير بالليل وقبل النوم ?
2- ممنوع الماكولات اللي فيها املاح زي الشبسيات والحمضيات لانه بتسبب الاملاح في البول وكمان التهاب مجري البول وكمان بتعطش الطفل وتخليه يشرب ميه كتير … 
?
3- ممنوع الاكل والشرب اللي فيها نسبة كافيين وكاكاو زي الشيكولاته 
?والبيبسي
? والكولا والشاي
? والقهوه 
☕ والاطفال اللي بتحب تظبط دماغها 
? معلش بقه اظبط دماغك بكوبايه لبن يا عم الشطور 
?
4- ممنوع منعا باتا معاقبة الطفل وافضل طريقه للتعامل مع الموضوع ده هو انك تطنشي ولا اكنه عمل حاجه ومتعلقيش علي الموضوع بعد ما يصحي مباشره والكلام معاه في الموضوع يكون بينك وبينه ويجب التنبيه علي اخواته او اقرانه عدم ذكر الموضوع قدامه من الاساس واعتبار الموضوع ده خط احمر 
?
5- يدخل الحمام قبل ما ينام ويعمل حمام وهو قاعد الله يكرمكم بلاش شغل اننا نروي الزرع ده 
? لان المثانه مبتفضاش كليا الا في الوضع قاعدا اي والله قاعدا وياريت نعود اولادنا علي كده علطول… 
?
6- معلش هتتعبي نفسك شويه وهتتناوبي انت وبباه وتصحوه بالليل كل 3 ساعات علشان يدخل الحمام يعني تقريبا مرتين وهو نايم…
?
7- غطي الواد كويس بالليل وهو نايم وبلاش يتعرض للبرد وميكونش نايم وهو زعلان ..
?
8- ياريت نعمل مكافاه للطفل لو قدر يقعد كذا يوم ميعملش ونعامله بالترغيب مش بالترهيب … ولو الطفل كبير يا ريت نخليه يغسل هدومه بنفسه ونطنش تماما ونديله فرصه للخصوصيه …
9- تدريب الطفل علي انه يمسك نفسه شويه قبل ما يدخل الحمام وممكن نطول المده اكتر شويه كل اسبوع وياريت الطفل يمارس اي نوع رياضه لانها بتقوي عضلاته وبتديله ثقه في نفسه
??
10- ممنوع منعا باتا لبس البامبرز لاي طفل فوق الخمس سنين لانه هيديله احساس بالامان لو عملها علي نفسه وهيتهاون في انه يمسك نفسه … ومسموح اننا نفرش مشمع تحت الملايه وان كان مش مستحب لاننا هنعمل علامه تميزه عن غيره من الاطفال وده مش كويس بس ما باليد حيله ?
11- حل المشاكل النفسيه للطفل والبحث عما يخيفه او اي سبب للارق او الخوف وعلاجه وده ربنا يعين كل اب وكل ام انها تعمله ?
12- حل المشاكل العضويه زي التهاب مجري البول ومشاكل التنفس والامساك والعيوب الخلقيه وغيرها من الاسباب اللي ذكرناها فوق ودي عند الدكتور ? وفي دي ادي العيش لخبازه ?
– كل ده يا دكتوره دا انا ادخل الجيش اسهل ? مفيش دوا نديه للواد وخلاص ونخلص …
– طبعا في ادويه بس دي بتكون اخر حاجه بنلجالها بعد حل كل المشاكل واتباع كل التعليمات السابقه وفي ادويه حديثه جدا دلوقتي والدكتور المتخصص يختارلك المناسب وباذن الله يكون في نتيجه ? بس هتتفاجئي لو عرفتي ان 10 في الميه فقط من حالات التبول الا ارادي بتحتاج ادويه ومعظم الحالات بتتحل باذن الله باتباع التعليمات وبعزيمة الاب والام ?✌
