الطريقه الامثل لتخفيف ملابسك رضيعك فى الربيع
الطريقه الامثل لتخفيف ملابسك رضيعك فى الربيع
الدنيا ربيع والجو بديع .. على رأى سعاد حسنى
وادى فصل الربيع بدأ أهو بشكل رسمى وأمهات كتير فى الجو ده بيكونوا محتارين جدا فى تخفيف هدوم ولادهم فمثلا تلاقى الصبح الجو شمس وحر شويه وأول ماتغرب الشمس بيتحول الجول للبرد.
طيب ازاى نخفف لولادنا هدومهم بطريقه صح ؟ وأمتى ؟ وايه هي أحسن طريقه من غير مانعرض صحتهم للخطر؟
خففى طبقه فى أول الربيع :
لو كنتى لسه مخففتيش لأبنك او بنتك لحد دلوقتى من الشتا ، جه الوقت دلوقتى عشان تخففى وتقدرى تخففى طبقه واحده من فوق وتشيلى اى كلونات او بناطيل اضافيه من تحت عشان ميضايقش مع الحر بتاع الربيع.
متشيليش اكتر من طبقه واحده فى المره :
حتى لو اشتدت الحراره متخففيش لبس أبنك بأكتر من قطعه أو طبقه عشان ميحصلش عكس المطلوب ويتصاب ابنك بالبرد أو الانفلونزا.
خففى طبقة هدوم مع الاستحمام :
لما تقررى تخففى طبقة من اللبس لأبنك أعملى ده بعد مايستحمى ، ممكن تكون النصيحه دى تقليديه وسمعتيها قبل كده من جدتك أو ومامتك بس هيا فعلا منطقيه ، لأنك بكده بتحمى ابنك من الشعور بتقلب وتغيير مفاجئ بدرجة الحراره وبتعودى جسمه بالتدريج على الجو الجديد.
الغى الهدوم الصوف :
لو كنتى لسه لحد دلوقتى بتخلى ابنك يلبس الهدوم الصوف ، فخلاص ده الوقت المناسب عشان تلغيها وتبدليها بهدوم قطن تقيله عشان الهدوم دى هتدفيه بس من غير حراره زياده وده بيمشى كمان مع الهدوم المصنوعه من القطيفه.
خلى معاكى دايما جاكيت خفيف للطوارئ بعد التخفيف :
أول ماتبدأى فى تخفيف لبس أبنك لازم تاخدى معاكى الجاكيت الخفيف دايما حتى فى أيام الصيف الحر عشان تستخدميه بليل وخصوصا لو نام أبنك فى مكان فى تكييف.
متنسيش الشرابات :
أبنك غالبا متعود على لبس الشرابات طول الشتا عشان كده شيلى الشربات دى خالص وبدلى الشرابات الصوف الطويله بشربات قطن صغيره.
لو كان ابنك متعود على الطواقى بدليها بالقطن :
لو كان ابنك متعود يلبس طاقيه طول الشتا يبقا بلاش تخلعيها بشكل مباشر وبدليها فى الأول بواحده تانيه قطن ناعمه وخصوصا لو كان ابنك لسه رضيع صغير.
