الحالات الطبية

تعانى من الشيخوخه والسمنه .. عليك بهذا العلاج

تعانى من الشيخوخه والسمنه .. عليك بهذا العلاج

دراسه امريكيه حديثه افادت ان ممارسة التمارين الرياضيه المعتدله ممكن يساعد كبار السن اللى بيعانوا من السمنه المفرطه على تحسين قدرتهم على اداء الانشطه اليوميه والحركه والانتقال بسهوله من غير الاعتماد على اى حد .

الدراسه اجراها باحثين بمركز الشيخوخه والوقايه من الزهايمر بمستشفى ويك فوريست الامريكيه ، ونشروا نتايجها فى دورية Obesity .

وعشان يوصلوا لنتايج الدراسه تابع الباحثين حالة 1635 من الرجاله والستات اللى بتتراوح اعمارهم بين 70 و89 سنه وتم اختيارهم بشكل عشوائى عشان يخشوا فى برنامج النشاط البدنى المعتدل وبرنامج التثقيف الصحى .

وكان الهدف من الدراسه هو اختبار فاعلية التمارين الرياضيه لمساعدة المصابين بالسمنه من كبار السن فى التغلب على الاعاقه فى التنقل ودى حاله بتسبب عدم قدرة المسنين على المشي لمسافة 400 متر من غير قعاد او مساعدة من شخص تانى .

وقام المشاركين بانشطه منزليه معتدله من 3 لـ 4 مرات فى الاسبوع خلال فترة الدراسه اللى استمرت سنتين واكتشف الباحثين ان الانشطه الخفيفه دى ساعدت كبار السن بشكل كبير على الحركه والمشي بشكل مستقر .

وقال قائد فريق البحث ان عدم القدره على المشي بشكل مستقل فى محيط البيت او انهم يروحوا اى محل قريب ده نوع من انواع اضطراب الحركه اللى ممكن يأثر بجد على نوعية حياة واستقلال كبار السن .

ممارسة التمارين الرياضيه المعتدله هي وسيله امنه وفعاله للحد من الخطر ده ، حتى بين الاشخاص اللى بيعانوا من السمنه المفرطه .

وكانت دراسات سابقه كشفت ان ممارسة الرياضه بانتظام يوميا وخصوصا المشي بتقلل فرص تعرض كبار السن لمشاكل فى التنقل والحركه وان الرياضه بتقلل من خطر اصابة كبار السن بمرض الزهايمر لان بتزيد من امداد المخ بالدم الكافى لعمل منطقة الادراك بالدماغ .

#دكتور_مفيد
#روشتة_دوت_كوم
#الدواء_بقى_أونلاين

whatsapp

مقالات ذات صلة

زر الذهاب إلى الأعلى