جوزى بيراقب موبايلى ايه الحل ؟
جوزى بيراقب موبايلى ايه الحل ؟
طيب لو اكتشفتى ان جوزك بيراقبك أو بيشوف رسايلك الخاصه بأى طريقه ؟ هتتصرفى ازاى؟
فى البدايه : ايه هيا الاسباب اللى تخلى الراجل يتجسس على مراته؟
_ الشك : ان الراجل يتخيل ان فى علاقات تانيه لمراته وانها بتحكى عن علاقتها بيه لصحباتها او قرايبها واللى بيخليه يقرا رسايلها ليهم.
_ انه عايز يعرف اكتر عن معاملاتها الماديه واللى بتخليه يراقب الرسايل اللى جايه من البنك واللى ليها علاقه بحسابتها.
_ التسلط : بعض الرجاله بيكونوا متسلطين وعايز يتحكم فى كل حاجه حوليه واللى بيخليه عايز يعرف كل اللى بيخص مراته.
_ انه مش حاسس بالأمان.
_ لو فى حالة تخطيط للطلاق ممكن يكون بيدور عن حاجات يستخدمها ضدك فى المحكمه.
والحل ؟؟
_ أول خطوة انك تفهمى السبب وتكونى هاديه جدا واوعى تهاجميه علشان مياخدش موقف دفاعى واللى هيصعب عليكى توصلى لحل.
_ خليكى صريحه معاه وحاولى تفهمى السبب الحقيقى.
_ الموضوع بيختلف من شخص للتانى بسبب طبيعته لو كنتى شايفه ان المصارحه مش هتجيب فايده مع جوزك يبقا كفايه تغيرى كلمة السر لكل حساباتك.
للوقايه من التجسس :
_ غيرى كلمات السر الخاصه بيكى ومتخليهاش رموز سهل انه يتوقعها زى تواريخ جوازكوا او اعياد ميلادكوا.
_ متسجليش دخول على حساباتك من موبايل جوزك.
_ متسيبيش الاكونت بتاعك مفتوح على الكمبيوتر .
_ خصصى كلمة سر لفتح موبايلك.
_ متوحديش كلمة السر لكل الحسابات واللى بيسهل على اللى يعرف واحد انه يعرف الباقى.
