حيل ذكيه للأحساس بالدفء بعد الاستحمام
حيل ذكيه للأحساس بالدفء بعد الاستحمام
طبعا قرار الشاور فى الشتا من اصعب القرارات اللى ممكن ناخدها وخصوصا لو كان فى موجه شديده من البرد وبتفكر فى السقعه اللى هتحس بيها بعد الشاور وازاى تقدر تتغلب عليها علشان كده بقدم ليك فى المقاله دى حيل ذكيه علشان تحس بالدفا بعد الشاور.
الحيله الاولى :
اول حاجه دفى الحمام بانك تفتح الميه السخنه قبل ماتبدأ فى الشاور بخمس دقايق علشان تقضى على تيارات الهوا الساقعه اللى بتيجى من كل ناحيه بعد خلع الهدوم واتأكد ان الفوطه بتاعتك موجوده جوه الحمام علشان تلفها على جسمك بسرعه بعد ماتخلص الشاور ومتحسش بالبرد الشديد.
الحيله التانيه :
قلل درجة حرارة الميه بالتدريج قبل ماتخلص الشاور علشان ده بيساعدك على تهيئة جسمك انه يتقبل درجة الحراره بره الحمام علشان متحسش بالبرد.
الحيله التالته :
بعد الشاور وقبل ماتخرج من الحمام ارفع درجة حرارة الميه لحد ماتكون سخنه جدا بس بالدرجه اللى جسمك يتحملها وبالطريقه دى هيحتاج جسمك للميه الساقعه كرد فعل وبعد ماتخلص هتفضل درجة حرارة جسمك دافيه لحد ماتخلص لبس هدومك.
الحيله الرابعه :
قبل الشاور هات نص كوباية مكعبات تلج وبعد ماتخلص الشاور حط مكعبين تلج فى بؤك لدقايق ده هيساعدك على موازنة درجة حرارة جسمك مع درجة الحراره اللى حواليك وهيخلى عقلك يتخيل ان الجو اللى حواليك دافى.
الحيله الخامسه :
بعد ماتخلص الشاور البس هدومك بس سيب منفذ للهوا قبل ماتخرج من الحمام وممكن تفتح الباب شويه صغيره او تفتح الشباك علشان ده هيساعدك على تهيئة جسمك لتقبل درجة الحرارة بره الحمام.
