طرق امنه لعلاج زيادة الشمع فى اذان الاطفال
طرق امنه لعلاج زيادة الشمع فى اذان الاطفال
مشاكل الودان من أخطر الحاجات اللى بيتعرض ليها الاطفال لأنه بيكون صعب نكتشفها بسهوله فى سن صغير وممكن يمتد اثارها الضاره على الطفل طول حياته لو مخدتش العلاج المناسب .
غالبا بتلاقى الأم مواد شمعيه جوه ودان ولادها وبتكون عايزه تنضفها باستمرار ، لكن ضرورى معرفة ان الشمعغ ده مش ضار انما العكس هو مفيد فى حماية الودان من الفطريات والبكتيريا اللى بتضر الودان .
لكن خطورة المواد الشمعيه دى بتظهر لو كانت زياده أوى لأنها هتسبب مع الوقت أنسداد القناه السمعيه والاصابه بالالتهابات … يبقى ايه هيا الطرق الامنه اللى لازم تعمليها لازالة المواد الشمعيه من ودان ولادك من غير ماتسببى أى ضرر ؟
أول سؤال هنسأله ياترى أعواد الودان القطنيه المخصصه للتخلص من الشمع صحيه ولا لأ ؟
الاطباء المتخصصين مبينصحوش بازالة شمع الودان بالأعواد دى ، لأن استخدامها ممكن يسبب مشاكل زى انها تدخل الشمع لجوه واللى هيترتب عليه انسداد الاذن الخارجيه أو خروج المواد الشمعيه بطريقه غلط وحرمان الودان من فوايدها أو الاصابه بجرح فى جدار الأذن وده هيسبب سهولة حدوث الالتهابات والفطريات .
ايه هيا الطرق الامنه لازالة الشمع الزياده من الودان ؟
_ حطى نقطتين زيت زيتون فى الودان لانه بيساعد على اذابة الشمع بسرعه .
_ ممكن استخدام قطرات الودان الطبيه المتوفره فى جميع الصيدليات لأنها بتساعد فى التخلص من الشمع وتخفيفه بالتدريج .
_ ممكن وقت الاستحمام السماح للميه تدخل فى الودان من غير توجيه الميه مباشر فى الودان وبعدين يميل راسه على جنب وهيبدأ الشمع يخرج لوحده وهيفضل يخرج من الودان بكميات صغيره طول اليوم .
_ فى أدويه مخصصه لعلاج الحاله دى واللى لازم ياخدها بعد استشارة الدكتور.
ودان الطفل من الأماكن الحساسه فى جسمه واللى محتاجه عنايه خاصه وضرورى مراقبتها بانتظام للتأكد من نضافتها وعدم وجود أى التهابات أو حبوب خصوصا أن الودان عندها القدره على التنضيف الذاتى .
لو كانت المواد الشمعيه لونها أصفر يبقى لازم تنضفيها بقطنه نضيفه مبلوله بشوية من لوشن الأطفال أو اى زيوت طبيعيه ، انما لو لاحظتى ان لونها أتحول للبرتقالى أو البنى أو فى حبوب أو التهابات يبقى لازم تستشيرى الدكتور فورا .
