طرق تكثيف الرموش

كل واحده مننا أول ماتتفرج على اعلان ماسكرا بتكثف الرموش تجرى بسرعه تشترى واحده ورا واحده يمكن تنجح معاها بعض الانواع ولكن كلها بتكون حل مؤقت !
ايه رأيك فى حلول طبيعيه بتزود كثافة الرموش بس بشكل دايم ومن غير أى أذى مع مرور الوقت زى مابتعمل المواد الكيميائيه اللى فى الماسكرا ؟؟

أول حاجه زيت الخروع :
زيت الخروع من الزيوت المفيده اللى بتحفز نمو الشعر وبيساعد على محاربة الكائنات الدقيقه اللى بتعوق نموه.
طريقة استخدامه : استخدمى فرشه نضيفه أو حتة قطنه وحطى بيها الزيت على الرموش قبل ماتنامى وممكن تضيفى قطرات من زيت فيتامين E مع زيت الخروع قبل ماتحطيه على الرموش .وسيبيه على الرموش ليله كامله وبعدين اغسليه بالميه الصبح واعملى الطريقه دى كل يوم لمدة 3 شهور .

زيت الزيتون البلدى :
بيعتبر علاج طبيعى معروف لتطويل الشعر وزيادة نموه وهوه كده برضه بالنسبه للرموش لانه بيساهم فى تكثيفها لانه غنى بفيتامين E وحمض الأوليك اللى بيغذى الرموش وبيحافظ على كثافتها وسوادها .
طريقة استخدامه : استخدمى فرشة ماسكرا قديمه ونضيفه أو قطنه وبليها بزيت الزيتون الدافى ووزعيه على الرموش قبل ماتنامى على طول وسيبيه لحد الصبح واغسليه بالميه وكررى الطريقه دى كل يوم لمدة شهور لحد ماتوصلى للنتيجه اللى انتى عايزاها.

قشر اللمون :
غنى بالفيتامينات B و C و حمض الفوليك والمواد المغذيه التانيه اللى بتعزز نمو الرموش ولما تخلطيه بزيت الزيتون وزيت الخروع هيساعد على تكثيف الرموش عن طريق الخصائص المحفزه لنمو الشعر اللى بتملكها الزيوت دى .
الطريقه : حطى معلقه كبيره من قشر اللمون المجفف فى طبق صغير وصبى عليه زيت الزيتون أو زيت الخروع بحيث انك تغرقى القشر تحت السائل وتسيبيه يتنقع أسابيع قبل ماتستخدميه ، وبعد ماتخلص الفتره حطيه على الرموش بفرشة ماسكرا قديمه ونضيفه قبل النوم وسيبيه على الرموش لحد الصبح وأغسليه بميه دافيه ، ومدة العلاج هتوصل لشهور علشان توصلى للنتايج اللى نفسك فيها .

تسريح الرموش :
تنضيف الرموش انك بتسريحها عشان تساعديها على النمو والعمليه دى بتساعد على التخلص من التراب والأوساخ ومنع انسداد المسام ، ده غير كمان تشجيع الدوره الدمويه عشان يوصل أكتر من المواد الغذائيه لبصيلات شعر الرموش .
الطريقه : حطى شوية قطرات من زيت فيتامين E أو الفازلين الطبى على فرشة ليها شعر ناعم عشان تكون سهله فى تسريح الرموش ، ونضفى الرموش براحه وأبدأى من جذور الرموش واتحركى ببطء لفوق لحد أطراف الرموش ، وافضلى سرحى الرموش لمدة 5 دقايق مرتين كل يوم لحد ماتوصلى للنتيجه اللى انتى عايزاها .

#دكتور_مفيد
#روشتة_دوت_كوم
#الدواء_بقى_أونلاين