الحالات الطبية

علاج الهالات السوداء طبيعيا بوصفات وخلطات منزليه

علاج الهالات السوداء طبيعيا بوصفات وخلطات منزليه

النهارده هنعرف علاج الهالات السودا نهائيا وفى البيت ، ومن اسباب الهالات السودا تحت العين بتكون وراثيه أو الشيخوخه وجفاف الجلد والعياط الكتير والشغل ساعات طويله قدام الكمبيوتر والاجهاد العقلى او البدنى وقلة النوم والنظام الغذائى اللى مش صحى ، والرجاله والستات من جميع الاعمار ممكن يكون عندهم هالات سودا ، والهالات السودا مش مشكله جلديه خطيره بس بتخلى الناس يبصوا عليك بانك تعبان وهبطان ، ودلوقتى تقدر بكل سهوله تتخلص من الهالات السودا اللى تحت عينيك باستخدام بعض العلاجات المنزليه السهله والطبيعيه :

1. زيت اللوز :
زيت اللوز عنصر طبيعى مفيد جدا للبشره الحساسه حولين العين ، قبل ماتخش تنام ادهن شويه صغيره من زيت اللوز على الهالات السودا مع التدليك وتسيبه لمدة ليله والصبح تغسله بالميه الساقعه وتستمر على العلاج ده كل يوم لحد ماتختفى الهالات خالص.

2. الخيار :
الخيار بيفتح البشره وليه تأثير مهدئ ومنعش ، قطع الخيار الطازه شرايح تخينه وحطها فى التلاجه نص ساعه وبعد كده حط الشرايح على مكان الهالات لمدة 10 دقايق وبعدين اغسل وشك بالميه وتكرر الموضوع ده مرتين فى اليوم لمدة اسبوع او اكتر.
وممكن كمان تخلط عصير الخيار مع عصير اللمون بكميات متساويه وبقطنه تحط الخليط ده على الهالات وتسيبه 15 دقيقه وبعدين اغسله بالميه وتعمله كل يوم لمدة اسبوع على الاقل.

3. البطاطس الخام :
نعصر واحدة بطاطس متلجه علشان نطلع منها العصير وبلل القطنه بالعصير ده وحطها على عينيك وانت مغمض وسيبه لمدة 15 دقيقه وبعد كده اشطفه كويس بالميه الساقعه وكررها مرتين فى اليوم لعدة اسابيع وممكن بدل مانعصرها تستخدم شرايح البطاطس التخينه وتحطها على مكان الهالات.

4. مية الورد :
مية الورد بتجدد الجلد وليها تأثير مهدئ على العيون التعبانه ، انقع كرات من القطن فى مية الورد لدقايق وبعدين حطها على الجفون وانت مغمض وسيبها ربع ساعه وامشى على الطريقه دى مرتين كل يوم لمدة اسابيع.

5. الطماطم :
قلب معلقة من عصير الطماطم على معلقة صغيره من عصير اللمون وتدلك براحه الخليط ده على الهالات وتسيبها لمدة 10 دقايق وبعدين تشطفه بالميه ونكرره مرتين كل يوم لمدة اسابيع.

6. عصير اللمون :
استخدم القطن علشان تحط عصير اللمون حولين عينيك وسيبه لمدة 10 دقايق وبعدين اشطفه والطريقه دى اعملها مره واحده فى اليوم لمدة اسابيع ، وطريقه تانيه انك تعمل عجينه وتحط معلقه كبيره من عصير اللمون ومعلقتين صلصة طماطم وشوية دقيق صغيرين وشوية كركم وتحط من العجينه دى حولين العين براحه وتسيبها ربع ساعه وتشطفها بالميه الساقعه وتكررها 3 مرات فى الاسبوع ، لو لقيت ان عصير اللمون بيعملك حرقان وقف الوصفه دى فورا.

7. زيت جوز الهند :
زيت جوز الهند فعال لعلاج الهالات السودا وكمان بيرطب وبيزود نعومة البشره وبيمنع التجاعيد والخطوط الدقيقه تحت العين ، ببساطه دلك شويه من زيت جوز الهند على منطقة الهالات وسيبه لساعات وبعدين اغسله وكررها 3 مرات فى اليوم لمدة شهور او لحد ماتختفى الهالات.

8. أكياس الشاى :
الكافيين ومضادات الاكسده الموجوده فى الشاى مفيده جدا علشان نتخلص من الهالات السودا وكمان الانتفاخ تحت العينين وتقلص الاوعيه الدمويه والحد من احتباس السوائل ، هتحط اكياس الشاى الخضرا او السودا فى التلاجه لمدة نص ساعه وبعدين تحط كيس شاى واحد على كل عين وتسيبه ربع ساعه وبعدين تشيل الاكياس وتغسل وشك وتكررها مرتين فى اليوم لاسابيع.

9. الضغط البارد :
انقع فوطه فى الميه الساقعه أو اللبن الساقع وحطها على جفونك لدقايق ، وممكن كمان تلف شوية مكعبات ثلج فى منديل ناعم وتحطه تحت عينيك لدقايق ، وممكن كمان تستخدم كيس بسله مجمد أو حتى معلقة ساقعه ، وامشى على العلاجات دى كذا مره فى اليوم.

10. الكركم :
اخلط معلقتين من الكركم مع عصير الاناناس علشان تعمل عجينه سميكه وتحط العجينه دى على المنطقه المصابه وتسيبها 10 دقايق وبعدين تشيلها بقطعة قماش ناعمه وتعمل كده كل يوم لحد ما تلاقى نتايج ايجابيه.

ودى شوية نصايح اضافيه :
1. لازم تنام كويس وترتاح.
2. متفركش فى عينيك كتير لانه بيسبب تمدد الاوعيه الدمويه وده اللى بيظهر الهالات السودا تحت العين.
3. ازالة المكياج قبل النوم لانه بيسبب تهيج العين.
4. الحد من التعرض لأشعة الشمس.
5. شرب ميه كتير طول اليوم علشان نتخلص من احتباس الميه اللى بيعمل المشكله دى.
6. علشان نتجنب اكياس العين فى الجفن السفلى وتجمع السوايل ، ارفع راسك عن طريق اضافة مخدتين على بعض تحت راسك قبل ماتنام.
7. الاهتمام لنظامك الغذائي وتناول الأطعمة الغنية بالفيتامينات A، C و E.
8. اتوقف خالص عن التدخين والكحول وقلل استخدام الكافيين.

#دكتور_مفيد
#روشتة_دوت_كوم
#الدواء_بقى_أونلاين

whatsapp

مقالات ذات صلة

زر الذهاب إلى الأعلى