علاج حرقة المعده خلال صيام رمضان
علاج حرقة المعده خلال صيام رمضان
حرقة المعده أو الحموضه بتصيب صايمين كتير فى شهر رمضان المبارك ، بعضهم عنده قابليه لحرقة المعده بسبب مشاكل صحيه معينه والبعض الاخر بيعانى منها بسبب النظام الغذائى الغلط اللى ماشيين عليه فى رمضان .
والحموضه عباره عن شعور بوجع ومعاه شعور بوجود حرق فى المرئ وأسفل الصدر وسببها ارتجاع المعدى المريئى أو عودة حمض المعده للمرئ بعد فتره من تناول الأكل .
أسباب حرقة المعده فى رمضان ( الحموضه ) :
1. زيادة الوزن : بيسبب زيادة الضغط على المعده وبالتالى ارتجاع الأكل والحمض للمرئ .
2. الحمل : فالحامل بتتصاب بالحموضه بسهوله وخصوصا فى الشهور الأخيره لأن الجنين بيضغط على المعده فى المرحله دى .
3. فتق فى الحجاب الحاجز : لو كان الفتق صغير مفيش داعى للقلق أو يتعدى الـ 3سم فده بيكون سبب فى حرقة المعده .
4. تناول الأكل بعشوائيه وبكتره سبب رئيسى للحموضه اللى بتظهر فى رمضان وفى أكلات كتير بتسبب الحموضه للمعده وخصوصا مع زيادة كميتها زى الدهون والسكريات وصلصة الطماطم وحامض اللمون الصناعى أو اللمون والتوابل الحاره والكتيره ، كل ده سبب فى ظهور حرقة المعده .
5. يعتقد البعض ان تناول القهوه البودره علاج للحموضه وهيا ممكن تكون سبب رئيسى ليها وخصوصا عند شرب كميات كبيره منها .
6. فى أدويه بتسبب الحموضه زى الاسبرين وأدوية الربو والمضادات الحيويه وبعض الفيتامينات .
علاج حرقة المعده فى رمضان :
1. قبل العلاج لازم نركز على الوقايه ، لأن الاشخاص اللى مش بيعانوا من مشاكل صحيه معينه الوقايه حل جذرى لحرقة المعده عندهم ، يبقى لازم تغيير نظامهم الغذائى من الغير صحى للصحى أما اللى بيعانوا من مشاكل صحيه زى الفتق الحجابى أو الست فى فترة الحمل يبقى لازم الاستمرار على تناول الادويه المضاده للحموضه بعد استشارة الطبيب ويعتبر الوقت المفضل لتناولها بعد الفطار على طول أو بعد السحور .
2. الالتزام بتناول الطعام بطريقة صحيحه من ناحية الكميه والسرعه ، ولازم نبعد عن الكميات الكبيره مع الحرص على تقسيم الوجبات لأربع وجبات صغيره بدل من وجبه كبيره ضخمه وده مابين الفطار لحد السحور ونتجنب السرعه فى تناول الأكل ومناكلش اصناف كتير لأن المعده ليها قدرات وحدود .
3. بدء الفطار بالسوايل الخاليه من السكر الصناعى والمشروبات الغازيه وبعد الشوربه والسلطه .
4. تجنب الأكل الغنى بالدهون والأكلات المقليه .
5. تجنب الأكل الحار والتوابل الكتيره .
6. الحد من تناول المشروبات والأكلات اللى بتحتوى على الكافيين .
7. النوم بعد ساعه على الأقل من تناول الأكل ومش على طول .
8. شرب الميه بكميات وفيره .
9. ممارسة التمارين الرياضيه بعد ساعتين من الأكل .
10 . الجلوس بشكل مستقيم وقت الأكل .
11. ممكن كمان تشرب الميه الغازيه ، الميه ومعاها معلقة صودا الخبز ، البابونج واليانسون ، عصير الألوفيرا ، اللوز الني ، الموز المستوى والتفاح واللبن البارد ، الأناناس والخروب ، الجنزبيل ، كل ده بيساعد على تخفيف الحموضه .
