كيف تتعاملين مع بكاء طفلك الهستيري خارج المنزل ؟

ازاى تواجهى الابتزاز العاطفى؟؟

1. لو طفلك الصغير اصيب بنوبة غضب فتأكدى الاول من السبب وانه فعلا بيحاول ابتزازك ولا هو تعبان ؟ لان الاطفال بتعانى ساعات من الخروجات الطويله وبيحتاجوا للراحه شويه ، وبيكون التعامل مع نوبة الغضب فى كل الحالات باننا نهديه ونسيب النوبه تخلص ومنستسلمش لرغباته ، ولو كان تعبان ممكن تساعديه وممكن يكون عايز ينام او تعب من المشى مسافات طويله او حتى جعان ، دايما خدى معاكى وجبات خفيفه صحيه تديله طاقه ، وتقعدوا شويه لحد مايهدى.

2. خليكى فاكره انك اكتر الناس خبره بطباع ابنك بتعرفى امتى بيتعب وايه اللى بيضايقه وايه اللى بيخوفه.

3. اكتبى القواعد فى ورقه واحتفظى بيها معاكى فى كل مكان قبل ماتخرجى من البيت واقريها بصوت عالى وكمان قبل ماتنزلى من العربيه او المواصلات والقواعد اللى لازم تكتبيها هيا :

– أنه يستجيب لطلبك من أول مرة.

– أنه يقبل كلمة لأ كإجابة.

– أنه ميرفعش صوته أويحدف الحاجات(أو أيًا كان السلوك السيء اللي متعود يعمله).

متفترضيش أنه يتحسن سلوكه فورا، بس ده على الأقل هيساعده مرة بعد التانيه.

هتتصرفى ازاى لو ابنك اساء التصرف؟؟

1. لو بدأ ابنك يسئ التصرف أو العياط خديه لمكان هادى واطلبى منه انه يبطل او هترجعوا البيت ولو فضل مستمر انهى الأمر فورا وارجعى البيت وبكدا هيفهم كويس نتيجة سلوكه الغلط.

2. لو كان ابنك صغير أوى امسكى ايديه واطلبى منه انه يهدى ولو استمر فى العياط سيبيه لحد ماتخلص نوبة الغضب وممكن كمان تعملى نفسك بتقرى كتاب او مجله علشان يفهم ان محاولته لجذب انتباهك مش مجديه ، ولو اكتشف انك مش مهتمه هيبطل يعمل الطريقه دى.

3. سيبيه فى البيت وفهميه انك مش هتاخديه معاكى لانه اساء السلوك فى المره اللى فاتت.

4. لما هتستسلمى لابتزاز ابنك كده هتعلميه ان الطريقه دى هيا طريقة حل المشاكل فمش هيحاول يدور على حلول تانيه لحل مشاكله وهيكبر وهيكون الشخص البالغ العصبى اللى بيعلى صوته وبيسئ التصرف مع مواجهة اى ضغوط.

لو عجبتكوا المقالة لايك وكومنت وشير .. وكمان شاركوني آرائكوا
#دكتور_مفيد
#روشتة_دوت_كوم
#الدواء_بقى_أونلاين