للرجال فقط .. كيف تكسب حماتك ؟
للرجال فقط .. كيف تكسب حماتك ؟
وممكن تكون المشاكل دى بسبب حماتك ، فلو كانت العلاقه شائكه بينك وبين حماتك يبقى اتأكد انك هتكره نفسك وهتحاول تنهى المشاكل دى ولو بالطلاق ، لكن العاقل هوه اللى يعرف ازاى يكسب حقل حماته وقلبها ويتجنب مشاكستها وعشان يدوم الانطباع الحميد عنك من وجهة نظر حماتك ومراتك سوا .
ودى الحاجات اللى لازم تاخد بالك منها :
تتحلى بالمظهر المناسب :
يعنى وانت رايح عندهم روح لعروستك ووالدتها كأنك هتروح مقابلة وظيفه جديده من شروط اجتيازها لبس ملابس انيقه وتحط البرفان المفضل ليك والساعه الساحره والبسمه الخلابه لأنك من غير ده هتكون مفتقر لعنصر مهم اللى هوه الاتيكيت يعنى المظهر الجذاب الحسن وساعتها هتكون على أعلى قايمة الاستبعاد .
أظهر حبك لخطيبتك :
عشان تكسب حماتك طول العمر يبقى لازم تعبر عن مشاعرك ناحية خطيبتك وكمان ده هيدى علاقتكم القوه والحيويه وهيجدد روتين الحياه وكمان فى نهاية اليوم الشاق ميهمش كمية الهدايا او الخروجات لأن مفيش اى حاجه احلى من كلمات الحب والحنان اللى هتبوح بيها لحبيبتك من وقت للتانى ، وهيا دى الهديه اللى بيحتاجها كتير من البنات والستات وكمان بالنسبه لوالدتها ، لكن خلى بالك الكلمات دى مش هتكون فى مصلحتك يوم عيد الأم .
افتكر حماتك فى المناسبات المهمه العامه والخاصه :
لازم تفتكرها بالهدايا والكلمات الجميله المناسبه والرسايل الهاتفيه والزيارات واى حاجه تشوفها مناسبه ، وكمان فى المناسبات اللى زى عيد جوازها والاعياد والمواسم والمناسبات الاعتياديه .
حقق احلام بنتها :
وده لان كل أم بتسعى عشان سعادة بنتها وانها تشوفها فى حياه أفضل منها بكتير فلو شافت الام عكس ده يبقى هتبدأ المشاكسات وانت فى غنى عنها ، فحاول قد ماتقدر تحقق اللى تقدر عليه وده هيجى بالتفاهم مع خطيبتك وبالتالى حماتك بطريقه غير مباشره واياك الاعتراض قدام حماتك .
دايما وجه لحماتك العبارات المنمقه :
فبكلامك الحلو هتسحق مشاكستها يعنى لو كانت بتقول ان عندها 45 سنه وفى الحقيقه عندها 55 سنه يبقى اوعى تقولها هتعملى ايه فى عيد ميلادك الخمسه وخمسين ، ولكن بدل ده جاملها واشكر فى اكلها مثلا أو على كرمها او جمالها واناقتها لأن الكبار بيكونوا عايزين دايما يحسوا بالشباب وصغرهم وتألقهم الدايم .
وقت الخلاف بين حماتك وخطيبتك .. خليك فى صف حماتك :
لو حصل خلاف بينهم وانت موجود يبقى عليك اولا انك تنحاز لحماتك وتكون فى صفها وده مش معنا التجاهل او تزعل خطيبتك اللى هي الأولى بالاهتمام ، وثانيا اسمع كويس ليهم هما الاتنين وخليك ذكى وحاول تشوف ليه الامور سببت الخلاف وتدور على نقاط الاتفاق فى الموضوع اللى مكنتش واضحه ليهم وتركز عليها ، ده هيعوز منك مجهود على المدى القصير لكنك هتنال منزله مرموقه لراحة البال على المدى الطويل من حماتك وهتتهنى بعد كده بالراحه من المشاكل اللى ممكن تيجى من ناحيتها .
تجنب كلمات الاعتراض :
فأى كلمه هتبدأ بـ لأ هتزعزع الثقه بينك وبين حماتك وانت فى غنى عن ده وانت فى اول الطريق معاها وبعد ماكانت بتحترمك وبتعاملك زى ابنها هتحطك فى القايمه السودا لانها هتخاف على حياة بنتها معاك ، بس ده ميمنعش الهزار معاها وهيزود من حبها ليك وده هيخليها تنحازلك وقت الحاجه ضد بنتها فى بعض الظروف .
أعرض خدماتك عليها :
وده بانك تساعدها باللى بتعمله فى البيت مثلا بعد الأكل ودخل معاها الاطباق للمطبخ ، ولو كانت رايحه لمناسبه معينه زى فرح أو عزا وصلها للمكان واستنى معاها ، تاخدها معاك تتفسحوا فى المكان اللى هي بتحبه أو حتى لو كان المكان المحدد من اختيارك يبقى وجه الاهتمام ليها وهيكسبك نقاط فى صفك من غير ماتحس ، وهتحس بسعادتها وانك أنت العريس المناسب لبنتها اللى هتطمن عليها معاك .
خليك على طبيعتك :
متحاولش التكلف او المبالغه فى التصرفات والكلام لأنها هتخليك واحد تانى ، انما اتصرف بتلقائيه وخليك انت نفسك ، وهنا الامر مختلف عن حماتك لو كنت بتلاطف وتجاملها يبقى ده ميمنعش انك تكون كده مع بنتها لكن بصدق أكتر لانها هتكون شريكة حياتك فى المستقبل .
خليك منصت :
خلى ودانك مطرطقه لان الانصات والاستماع لوالدة حبيبتك بكده هتكون فتحت صندوق من الكنوز المخفيه وهو انه لو سبت حماتك تتكلم فهيكون محور كلامها عن بنتها وبالتالى تقدر تعرف اللى بتحبه خطيبتك وتكسب قلبها وعقلها وتكون قريب منها .
وبكده هتكون كسبت حماتك للأبد ومش من مصلحتك انك تتجاهل الحاجات دى كلها لأن الامهات عندهم خبره طويله ويقدروا على الحكم من أول وهله على اللى متقدم يخطب بنتها وفى ايديهم تأشيرة الدخول ، ونتمنى لك حظا سعيدا.
