ممارسة الرياضه فى رمضان

ممارسة التمارين الرياضيه مهمه فى كل وقت ولكل شخص مش للى عايزين بس فقدان الوزن ، ياترى ممكن ممارسة التمارين الرياضيه فى رمضان مع الصوم ؟ وايه هو الوقت والطريقه الأفضل لممارسة التمارين الرياضيه ؟ هقدم ليك اجابات كل الاسئله دى حالا .

فى البدايه .. ياترى فى خطوره من ممارسة التمارين الرياضيه فى رمضان ؟
طبعا ممكن ممارسة التمارين الرياضيه كل يوم فى السنه ، ولكن فى ساعات الصيام الأولى من اليوم ميفضلش ممارسة الرياضه خصوصا فى الطقس ده الحار وافتقاد الجسم فى فترات الصيام لكتير من العناصر وأهمها الميه واللى بتساعد التمارين الرياضيه فى فقدانه ومش ممكن تعويضه فى فترة الصيام .

يبقى ايه هو الوقت الأمثل لممارسة الرياضه فى رمضان ؟
1. ممكن ممارسة الرياضه قبل الفطار بساعه أو ساعه ونص بحد أقصى عشان ميتصبش الجسم بالارهاق والجفاف لفتره طويله قبل الفطار ووقتها كمان يكون الجسم على استعداد كويس لحرق أكتر من الدهون المخزنه فى الجسم وتحويلها لعضلات وده مفيد جدا اللى عايزين فقدان الوزن ، وهنا بينصح الاطباء بممارسة تمارين الكارديو والتمارين الخفيفه زى المشى وركوب العجله والبعد خالص عن التمارين المرهقه زى حمل الاثقال وغيرها ، ففى وقت الصيام مبيكنش الجسم فى أفضل حالاته لزى التمارين التقيله دى .
وهوه ده الوقت الأفضل للمارسة الرياضه بالنسبه للشباب والى هما بصحه كويسه عموما ، أما كبار السن فيفضل انهم يمارسوا الرياضه بعد الفطار عشان متتعرضش صحتهم للخطر .

2. من الاوقات الكويسه كمان لممارسة الرياضه بعد الفطار بـ 3 ساعات أو 4 ساعات ووقتها بيكون الجسم بدأ بهضم الأكل وعلى استعداد لممارسة التمارين الرياضيه حتى التقيله منها وده كمان الوقت الأفضل لكبار السن .

3. باقى أوقات الصيام ميفضلش فيها ممارسة الرياضه عشان ميتصبش الجسم بالجفاف والارهاق باقى اليوم .

ودى بعض النصايح وقت ممارسة التمارين الرياضيه فى رمضان :
1.لازم نعمل تمارين احماء خفيفه قبل مانبدأ فى التمارين الاساسيه وخصوصا وقت ممارسة الرياضه قبل الفطار .

2. الاكثار من شرب الميه وقت ساعات الفطار لتعويض الجسم عن اللى فقده من ميه فى ساعات الصيام لأن الميه هو العنصر الأهم للجسم .

3. البعد خالص عن التمارين الشاقه وحمل الاثقال خصوصا قبل الفطار .

4. عموما حتى لو ممارستش الرياضه أبعد عن تناول الكافيين ومدرات البول زى الشاى الاخضر عشان الجسم ميفقدتش كميات كبيره من الميه فى ساعات الصيام ويدخل فى حالة جفاف .

5. التغذيه الصحيحه فى الفطار واللى فيها جميع المكونات الغذائيه زى الكربوهيدرات وبروتينات ودهون مفيده واخيرا فيتامينات ومعادن وهما أكتر مايفتقده الجسم فى ساعات الصيام وممكن الحصول عليها من الخضار والفاكهه .

6. أخيرا .. لو حسيت بألم فى الصدر أو القلب أو حصلك دوخه وصداع وقت ممارسة التمارين الرياضيه يبقى لازم تتوقف حالا .

فى كل الأحوال ، متتوقفش عن ممارسة الرياضه ولكن مارسها بالطريقه الصح وفى الوقت الصح عشان تنعم بصحه جيده .

#دكتور_مفيد
#روشتة_دوت_كوم
#الدواء_بقى_أونلاين