8 وصفات لازالة اثار حبوب البشرة

نقاء البشره من اكتر الحاجات اللى بتهتم بيها كل ست لكن فى ستات كتير بيعانوا من ظهور الحبوب اللى بتعكر مزاجهم وبيدوروا ليها دايما عن حلول فعاله فى وقت قصير تساعد على خفيانها ومحو اثارها المزعجه جدا اللى بتسببها وراها بعد مانخلص من الحبوب نفسها.
علشان كده اهتميت انى اقدملك الوصفات اللى هتساعدك فى انك تتخلصى من الحبوب دى واثارها والندب نهائى وعلشان ترجعى جمال بشرتك ونضارتها وتفوزى ببشره صافيه زى بشرة الاطفال.

النشا ومية الورد :
اخلطى ربع معلقة كبيره من النشا مع معلقه كبيره من مية الورد وحطى الخليط ده على الحبوب والندوب وسيبيه لحد ماينشف وبعدين اغسلى وشك بميه فاتره وكررى الوصفه دى كل يوم.

صودا الخبز أو بيكربونات الصوديوم :
اخلطى معلقة من صودا الخبز مع شوية ميه صغيره لحد ماتبقا عجينه تقدرى تحطيها على الجلد لمدة 15 دقيقه وبعدين اشطفى وشك وكررى الخطوات دى 3 مرات فى الاسبوع ، لأن صودا الخبز مبتحميش بس من اثار الحبوب انما بتقلل كمان ظهور البثور فى الوش وبتقشره وتنضفه.

الشاى الأخضر :
اغلى نص كوبايه من الشاى الاخضر وسيبيه لحد مايبرد وبعدين بلى قطنه بالشاى وادهنى الاماكن اللى فيها اثار الحبوب وكررى الطريقه دى كل يوم وهتلاقى نتايج سريعه.

زيت الزيتون :
اغسلى بشرتك كويس ونشفيها وبعدين دليكها بزيت الزتون الخام وخصوصا الاماكن المصابه بحركات دائريه لمدة 5 دقايق وبعد ماتشبيعها بالزيت شيلى الزيت الزياده بفوطة نضيفه دافيه واغسلى وشك كويس اوى بصابونه طبيه وميه دافيه وبعدين بالميه الساقعه علشان تقفلى المسام واستمرى على الخلطه دى كل يوم لحد ماتختفى اثار الحبوب لأنه بيعتبر من أفضل العلاجات الطبيعيه المستخدمه فى علاج حب الشباب وبيقضى على اثاره نهائى.

الخميره :
اخلطى معلقه كبيره خميره ومعلقة لبن بودره وفنجان ميه وبعدين حطى الخليط على البشره لمدة 20 دقيقه واشطفى وشك بالميه الفاتره وبعدين الميه الساقعه واستمرى على الوصفه دى وهتلاقى نتايج سريعه.

البطاطس :
قطعى شرايح رفيعه من البطاطس الطازه ودلكى بيها بشرتك بشكل دائرى فى الاماكن الغامقه وسيبى اثار سائل البطاطس تنشف على البشره ومتغسلهاش قبل 15 دقيقه وكررى الطريقه دى اكتر من مره فى الاسبوع وهتلاقى نتايج روعه لأن البطاطس بتحتوى على مضادات للجراثيم بتعالج حب الشباب وبتساعد فى ازالة خلايا الجلد الميته وبيحفز ولادة خلايا صحيه جديده وبيساهم فى ازالة ندوب حب الشباب.

صفار البيض :
اخلطى صفار بيضه مع معلقتين عصير لمون ومعلقة عسل صغيره وحطيها على اماكن البقع الغامقه وتوزيعها بالصوابع براحه وتسيبى الخليط على وشك لمدة 20 دقيقه وبعدين تشطفيه بميه فاتره وكررى الخلطه دى 3 مرات فى الاسبوع.

خل التفاح :
الخل بيساعد على ازالة الخلايا الميته فى مسام الجلد وتطهير وعلاج ندبات حب الشباب ، كل اللى عليكى تخلطى شويه من الخل على شويه ميه صغيره وحطى الخليط على الندوب بقطنه وسيبيه لدقايق وبعدين اغسليه بميه عاديه.

لو عجبتكوا المقالة لايك وكومنت وشير .. وكمان شاركوني آرائكوا
#دكتور_مفيد
#روشتة_دوت_كوم
#الدواء_بقى_أونلاين

 

عن admin

أنا دكتور مفيد .. هكتبلكم كل يوم مقالتين جداد واتمنى انهم يكونوا مفيدين وتستفادوا منهم يا حبايبي .

شاهد أيضاً

صيام الحامل فى الشهور الأولى

صيام الحامل فى الشهور الأولى بتلعب التغذيه فى فترة الحمل دور مهم ، وازاى نتعامل …