أشهر احلام الحامل ومخاوفها

الاحلام ترجمه للمشاعر ، والحمل من اكتر الفترات اللى بتتغير فيها مشاعرك وساعات بتكون غريبه بسبب تغيير الهرمونات واحساسك بحاجات جديده لأول مره فهيا تجربه مثيره وجديده ، علشان كده حبيت اقدملك شوية من احلام اليقظه والنوم كمان اللى راودت امهات من ثقافات مختلفه فى فترة حملهم واللى كانت هواجس بتطاردهن فى فترة الحمل كلها.

1_ الورد والخضره والفاكهه والميه ، من أكتر الحاجات اللى بتحلم بيها الست فى التلات شهور الأولى من الحمل لأن التفاؤل والأمل والفرحه من اكتر المشاعر المشتركه بين الستات فى بداية الحمل وده بينعكس على احلامهم وبالأخص لما بيحلموا بالميه اللى بتعوم فيها السمكه وكأنه انعاكس للجنين اللى بيعوم جوه الرحم 😌.

2_ اما فى التلت التانى من الحمل بتبقى الاحلام انعكاس للتغيرات اللى بتحصل فى جسم الام والجنين ومن العناصر المشتركه فى أحلام الامهات الحيوانات الصغيره اللى قريبه من حجم الجنين فى الفتره دى ، وكمان حب شكلها القديم يعنى انها مش راضيه عن شكل جسمها الحالى وعندها تخوفات من شكلها قدام جوزها.

3_ فى التلت الاخير من الحمل بيكون التفكير الأكبر فى نوع المولود والخوف من تغيير نوعه أو ان يكون السونار غلطان مثلا.

4. كمان فيه هواجس بتعانى منها الامهات فى فترة الحمل أو اللى بنسميه بـ أحلام اليقظه ، ومنها هواجس حقيقه قالتهالنا بعض الامهات : زى ان الجنين يتولد باعاقه معينه أو يكون طفل منغولى لأن الاطفال دول كانوا بيصعبوا عليا بجد من نظرة الناس ليهم.

5_ كان عندى خوف من ولادة طفلى مصاب بشفه أرنبيه من كتر القرايه عن الحاله دى .

6_ كنت بخاف من أى مرض بيجيلى أو شعور سلبى واتصبت ببكتيرا ايكولاي وده عرض منتشر فى الحمل وكنت منهاره وبعيط وخايفه على البيبى لغاية ماتعالجت واكتشفت انها حاجه بسيطه.

7_ فى بعض الاوقات بتصيب الهواجس الازواج كمان ، وقالت واحده من الامهات : جوزى كان عنده هاجس دائم انى هموت وأنا بولد عشان شاف حاله قريبه منه حصلها كده ، ويقعد يعيط وانا اللى أطمنه.

8_ أم تانيه قالت مصدقتش خبر الحمل بسبب هاجس دائم انها مش هتقدر تخلف وبعد التأكد من حملها اتحول الهاجس لموت الجنين واستئصال الرحم ! وده تعبير واضح عن مأساة اكتئاب الحمل.

9_كنت خايفه أخلف قطه أو اى حيوان أليف ، وكنت دايما بحس انى هلاقى كائن غريب لما أولد ! 😂

10 _ بصراحه كنت خايفه من اللى هقوله عن جوزى تحت تأثير البنج فى الولاده 😶.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

10 حلول لتخفيف الام الثديين خلال الرضاعه

10 حلول لتخفيف الام الثديين خلال الرضاعه من أهم التوصيات اللي بتتقدم للأم الحامل فى …