6 أمور تقتل العلاقة بين الزوجين

مفيش اى علاقه مهما كانت ناجحه بتخلى من المشاكل لكن سر نجاح العلاقات مبيكنش فى خلوها من المشاكل ، لأ بيكون فى ازاى نتغلب عليها من غير مانسبب شرخ كبير فى العلاقه يهدد استمرارها.
بس مينفعش ابدا نسمح بالاساءه فى اى علاقه والاساءه ممكن متكنش ليها شكل او سلوك مباشر وصريح ، لأ هيا مجموعه من السلوكيات والمواقف المسيئه اللى بتخلى استمرار العلاقه مستحيل وبتكسر اى ألفه أو موده بين الشريكين ، ودلوقتى هقولك 6 حاجات بتقتل العلاقه بين الزوجين.

أولًا: النقد:
النقد المستمر والانتقاد الاذع لأى تصرف بيعمله شريك الحياه ده بيكون سبب انهيار اى علاقه مهما كانت ناجحه لانه بيدل على عدم التقدير ، وفى فرق جوهرى بين الانتقاد اللطيف على تقصير معين وبين القسوه والتركيز على العيوب سواء كان بينكوا او قدام الناس ، والانتقاد بيدمر العلاقه الزوجيه لأن كل شخص ليه طباعه وعاداته المختلفه اللى اتربى عليها وصعب تغييرها علشان كده لازم على الطرفين مواجهة الاختلافات دى بلطف ولين والصبر على التعامل معاها وتوجيه النصايح بطريقه يقبلها من غير اساءه او تجريح لمشاعره والامتناع خالص عن توجيه اللوم أو النصيحه قدام الناس مهما كانوا قريبين.

ثانيًا: التهديد أو الابتزاز العاطفي
الابتزاز العاطفى بين الزوجين يقدر ياكل طاقة الحب بين الزوجين وكمان يقتله بالتدريج لانه بيقوم على الاجبار من غير حريه وليه صور زى مثلا طلب واحد من التانى حاجه هو مش عايز يعملها او ميقدرش يعملها ويبدأ الطرف التانى يظهر مشاعر الضيق او يحس بالذنب وتحميله مسؤولية مشاعره كنوع من انواع الضغط ، يقوم التانى يستجيب بس حاسس بالضيق أو حتى من باب الشفقه مش الحب ، ومع مرور الوقت والمواقف هتزيد الفجوه وتختفى طاقة الحب بالتدريج.

ثالثًا: عدم إعطاء الشريك مساحة من الحرية
الجواز والارتباط مش معناه العزله والابتعاد عن الحياه والعلاقات الاجتماعيه ومينفعش ان الطرفين يتصرفوا كانهم خايفين من فقد العلاقه ولازم ندى للتانى قدر من المساحه متخليهوش يحس بانه جوه سجن كبير ويجبره على انه ميتعاملش مع أشخاص بعينهم او على تغيير البريد الالكترونى الخاص بيه وتغيير رقم المحمول وحرمانه انه يزور قرايبه واصحابه علشان خايف يخسره لان ده هيخليك تخسره فعلا ، ولازم تسيب قدر من الحريه فى العلاقه ليه وتسمح بخلق بيئه صحيه لمشاعر قويه من غير محاولة الغاء كيان الاخر بدافع الحب والتملك وعدم الثقه.

رابعًا: الثقة
وهوه فى أى علاقه هتنجح من غير وجود ثقه بين الطرفين ؟ فما بالكم بالجواز !
فقدان الثقه بين الزوجين من أخطر المشاكل الاسريه لانه مش مشكله هينه لكن ممكن تدمر الجواز وللأسف من السهل فقدان الثقه فى الطرف التانى ولكن صعب اعادة بناء الثقه دى من تانى ، ويعتبر الكذب السبب الرئيسى لهدم الثقه بين الطرفين فالمصارحه والمكاشفه أساس الثقه بين الزوجين ، والجواز الناجح بيقوم على الثقه المتبادله ووقت ماينتهى الشعور بالامان والثقه انتهت الحياه الزوجيه المستقره وحلت محلها مشاكل ملهاش نهايه.

خامسًا: إفشاء الأسرار والخلافات
طبيعى ان يحصل خلافات زوجيه من وقت للتانى بين الازواج وغلط كبير جدا نقل تفاصيل الخلافات دى للغير وخاصة الأهل لانها بتزود من تفاقم المشكله لأن الحكم عمره هايكون عادل لكن احكامه هتكون قايمه على العاطفه والتعصب للأبن أو الابنه واللى هيأثر على الثقه بين الطرفين وممكن كمان يسبب الطلاق فى كتير من الاحوال علشان كده لازم حل الخلافات بين الزوجين بسرعه ومن غير تدخل من اى شخص تانى ، لتأسيس علاقه قايمه على التفاهم والثقه واحترام الخصوصيه.

سادسًا: الصمت والتجاهل
ممكن يكون الصمت مؤذى اكتر من الكلام ، ولازم نعرف امتا يكون السكوت ضرورى وامتى بيسبب جرح مشاعر الطرف التانى ، فهو سلاح ذو حدين ، فالتركيز مع الموبايل أو الكمبيوتر أو الفرجه على التليفزيون لما بتكون بتتكلم مع الزوج او الزوجه ومش مهتم للى بيقوله الطرف التانى مهما كانت درجة اهميته واختيار السكوت والتجاهل كطريقه للتعامل مع المشاكل والخلافات الزوجيه مش حلول ، انما هيا قنابل موقوته بتسبب للوصول لمرحلة الانفجار لأتفه الاسباب لأن الحوار من أهم عناصر التفاهم بين الزوجين ، والازواج اللى بيفقدوا لغة الحوار بينهم بيعيشوا زى الاغراب فى بيت واحد ميعرفوش عن بعض اى حاجه غير اللى عارفنها.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

10 أكاذيب يقع فيها الأزواج السعداء

10 أكاذيب يقع فيها الأزواج السعداء جوزك بيكدب عليكى ؟؟ 🙄 دايما بتشك الزوجه بان …