أفكار لهديا عيد الأم المناسبه لشخصية أمى وحماتى

«ست الحبايب.. كل سنة وانت طيبة يا ماما»..
أد ايه بتفرحها الجمله دى ، كل ماقولتها ليها سنه ورا سنه ، وبتشارك خالاتى وصحباتها بالهدايا اللى جتلها واد ايه الهدايا جميله واد ايه دخلت عليها البهجه والسعاده واد ايه حسستها بحبنا وتقديرنا لمجهودها المستمر فى رعايتنا وحبها اللى مش بينقص ولا يقل مهما ضايقناها وتعبناها بهمومنا ومشاكلنا.
علشان كل أم تستحق هديه جميله تعكس ليها اد ايه بتحبها وفى نفس الوقت تستفيد منها ، تعالوا نتعرف على بعض الافكار للهدايا وكمان تكون مناسبه لشخصية مامتك أو حماتك :

هدايا للأم المهتمه بنفسها :
فى امهات او حموات بيحبوا يهتموا بمظهرهم والعنايه ببشرتهم وشعرهم ، الهدايا المناسبه ليهم :
1. مجموعة كريمات للعنايه بالبشره وممكن يكونوا عباره عن منظف بشره مناسب لنوع بشرتها ، كريم صباحى ، كريم مرطب للوجه ، كريم مرطب للايدين والكعبين .. ومتنساش تشترى صندوق جميل علشان تحطهم فيه وشريط ستان باللون اللى بتحبه علشان تلف بيه الصندوق.

2. المكياج ممكن يكون هديه مناسبه لكن لازم تاخد بالك فى اختياراتك للألوان وكمان لازم تشترى حاجه هتستعملها ومفيش داعى تشترى الاى شادو مثلا وهى مش بتحطه .. وحطهم فى صندوق بشكل منظم وشوف ازاى هتبهرها.

3. البرفان من الهدايا القيمه لكل أم ، بس خلى بالك من ذوقها فى اختيار البرفان المناسب ويكون مناسب لسنها كمان.

4. مجموعة العنايه بالبشره لحمام منعش ومهدئ للأعصاب ، فكرة هديه كويسه اوى وهتتفاجئ بيها مامتك بس صدقنى هتعجبها.

هدايا للأم الفنانه :
1. مجموعه من قصارى الزرع لزهور ربيعيه جميله هتكون هديه روعه لأن الزهور بتدى حياه للبيت وبتدخل البهجه فى البيت وكمان مفيش عيد أم بيخلو من الزهور والنباتات.

2. من الهدايا اللى هتفرحها وممكن تعيط من الفرحه لما تشوفها ، البراويز اللى فيها صور العيله فى مناسبات مختلفه وأراهنك بأنها هتفضى ليها احسن مكان فى البيت علشان تحطها.

3. فازه جميله او برواز بس يكون احسن انك تكون عارف هيا بتحب ايه بالظبط من الفازات والبراويز او تكون شافت حاجه معينه قبل كده وعجبتها علشان تكون مناسبه لديكور بيتها.

4. مجموعة مفارش مميزه على الموضه للسفره والبوفيه ، وخلى بالك لازم تكون الالوان مناسبه لألوان بيتها.

هدايا للأم الطباخه الماهره :
1. اى جهاز ناقصها فى المطبخ وفى كتير اختيارات زى مثلا الفرن الكهربا ، الميكروويف ، حلة الطهى بالبخار لأكل صحى ، عجانه ، غسالة الاطباق ، عصارة فواكه ، مضرب بيض ، كاتل ، فلتر ميه … وغيرها.

2. طقم سكاكين جديد ، طقم معالق وشوك وسكاكين للسفره ، طقم حلل سيراميك لأكل صحى.

3. مجموعة متنوعه من البهارات اللى بتستعمل فى الأكل وتحطهم فى سبت خوص جميل وشوف ازاى هتنبهر بالهديه.

4. فى حاجات ظهرت حديثه مصنوعه من السيلكون علشان الكيك وفى كمان مجموعه ممتازه من الاشكاله لعمايل البسكويت.

هدايا للأم المواكبه للتطور التكنولوجي :
أكيد النوع ده من الهديا بيكون تمنها غالى بس اللى هيحدد اختيارك هو ميزانيتك :

1. موبايل جديد من الماركات الحديثه.

2. آى باد لو كان نفسها فيه.

الأم اللى بتعتبرك هديتها من السما :
اد ايه انت محظوظ لانك أى هديه هتجبها هتقولك «تعبت نفسك ليه يا حبيبي؟».. أو «تعبتى نفسك ليه يا حبيبتي؟»..
بس هتكون من جواها مبسوطه بس لازم تختار ليها هدايا تكون بتحبها زى :

1. اختار ليها هديه لحاجه ناقصاها زى لبس أو عبايه أو شنطة يد جميله أو ايشارب.

2. هديه من صنع ايديك ممكن تبسطها اوى بس ده بيعتمد على قدرتك بعمايل الأعمال الفنيه أو ممكن تجيب فيديوهات على اليوتيوب وتتعلم منها تعمل حاجه فنيه جميله وتكتب اسمك واسمها عليها.

3. سلسله فضه جميله أو ذهب على حسب ميزانيتك.

4. ممكن كمان تجبلها اى جهاز للبيت يساعدها فى التنضيف زى مكنسه كهربا أو اى جهاز للمطبخ.

5. طقم ملايات بأشكال جميله ممكن تكون هديه عظيمه.

ودلوقتى قولولى اخترتوا ايه علشان يكون هديه لمامتك او حماتك وشخصية كل واحده فيهم ايه ؟؟

 

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

رائحة حديثى الولاده

رائحة حديثى الولاده الأطفال حديثى الولاده يفرز جسمهم رائحة مميزه تجذب البشر وخصوصا النساء . …