13 سبب لكثافة تساقط الشعر

الرجاله بيكونوا متعرضين اكتر لفقدان شعرهم من الستات ، ودى حقيقه ، لكن تساقط الشعر بقا منتشر بصوره كبيره بين الستات فى الفتره الاخيره ومن الممكن ان يكون التساقط ده لاسباب مؤقته وبسيطه أو لأسباب مرضيه دايمه وفى كل الاحوال موجودعلاج للحالات دى فى مراحلها المبكره.

ودى قايمه بأكتر الاسباب لتساقط الشعر :

1_ الاجهاد الجسمانى :
اى نوع من الصدمات النفسيه أو الجسمانيه زى حادثة عربيه أو مرض شديد أو حتى دور انفلونزا جامد ، هيسبب فى تساقط الشعر بشكل مؤقت وهيتوقف التساقط ده لما الجسم والاعصاب يحصلوا على حاله من الاسترخاء والراحه.

2_ الحمل :
الحمل واحد من اسباب الاجهاد بالاضافه كمان لتغيير الهرمونات فى الحمل وتساقط الشعر من اكتر الاعراض المصاحبه لفترة الحمل بسبب التغيرات دى وبيرجع الشعر لطبيعته بعد الولاده بشهور وبعد الاستقرار والتعود على وجود الطفل فى حياتك.

3_ المبالغه فى تناول فيتامين A :
بيعتبر سبب رئيسى فى تساقط الشعر لأن بعض الناس بيلجأوا للمكملات الغذائيه بجرعات زياده عن الحد علشان كده بننصح دايما استشارة الدكتور قبل ماناخد اى مكملات غذائيه لتحديد الجرعه المناسبه للى محتاجه جسمك منها.

4_ نقص البروتين :
لو كنت مبتاخدتش الحصه الكفايه من البروتين كل يوم هيتوقف نمو الشعر وتضعف خصلاته واللى هيسبب تساقطه ، يبقى لازم تاخد البروتينات الحيوانيه والنباتيه باعتدال خلال اليوم علشان تحصل على شعر صحى.

5_ أسباب وراثيه :
لو كنت من عيله شعرها خفيف وتساقط الشعر عارض مشترك بين أغلب افرادها يبقى ممكن يكون سبب التساقط عندك وراثى بيتعلق بالجينات.

6_ الهرمونات الانثويه :
زى ما الحمل بيسبب تغيير فى الهرمونات ، فى حاجات تانيه كتير بتأثر على الهرمونات عند الستات ومنها حبوب منع الحمل ، وفى الحاله دى لازم تتكلمى مع الدكتور بتاعك علشان يختار ليكى وسيله تانيه لمنع الحمل ، وكمان وصول الست لسن اليأس بيسبب تغيير كبير فى الهرمونات بشكل مفاجئ.

7_ الضغط النفسى والتوتر :
واحده من اكتر الاسباب المنتشره اللى بتسبب تساقط الشعر وطبعا العارض ده من الصعب تجنبه بسبب الضغوط النفسيه الكتيره المحيطه بينا، لكن على الاقل ممكن التعامل مع التوتر بأساليب بسيطه علشان حماية صحتك وشعرك.

8_ الأنيميا :
ناس كتير بتعانى من الانيميا بسبب نقص الحديد فى الجسم وعلشان تتجنب ده لازم تستشير الدكتور علشان يوصف مكملات غذائيه ليك هتساعد جسمك على انه يرجع لحالته الطبيعيه ودايما اعمل تحليل صورة الدم الكامله دوريا علشان تطمن على صحتك باستمرار.

9_ نقص فيتامين B :
دايما كلوا الأكل اللى فيه فيتامين B علشان متتعرضتش لتساقط الشعر والاطعمه دى زى الاسماك واللحوم والخضار والفواكه اللى مش حمضيه والدهون الكويسه زى الافوكادو والمكسرات لانهم مهمين جدا لشعرك ولصحتك بشكل عام.

10_ فقدان الوزن المفاجئ :
بيكون بسبب اتباع رجيم بيقلل الوزن بسرعه ويقلل من احتياجات جسمك وبيأثر تأثير سلبى على صحتك بشكل عام وشعرك على وجه التحديد ونقص عناصر غذائيه كتيره من الجسم ومن فيتامينات ومعادن بشكل مفاجئ هيسبب اكيد تدمير شعرك.

11_ استخدام العلاجات الكيميائيه بكثره :
استخدام العلاجات والبروتين وغيرها من معالجات الشعر اللى فيها مواد كيميائيه كتير ، هيسبب فى تدمير الشعر وتساقطه على المدى البعيد.

12_ التقدم فى العمر :
حاجه طبيعيه انه يحصل ، لكن ممكن نتجنبه بالمتابعه مع الدكتور واستخدام العلاجات المناسبه مع تقدم العمر.

13_ المبالغه فى غسل الشعر :
الميه فيها معادن بتسبب جفاف الشعر وتدمير بصيلاته لو اتعرض ليه الشعر كتير علشان كده من المهم عدم المبالغه فى غسيل الشعر وكفايه مرتين أو تلاته فى الاسبوع واستخدام العلاجات الطبيعيه وحمامات الكريم باستمرار.

 

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

أمراض الكلى والصيام فى رمضان

أمراض الكلى والصيام فى رمضان على مريض الكلى في رمضان مراعاة حالته الصحية واستشارة الطبيب …