اسباب وعلاج ظهور الشعر تحت الجلد

اسباب وعلاج ظهور الشعر تحت الجلد

لاحظت يوم البثور الصغيره اوى اللى ممكن تظهر على وشك او ايديك او اى مكان فى جسمك ؟ دى ممكن متكونش حبوب زى اللى بتظهر على البشره عند الناس اللى بيعانوا من حب الشباب ، انما هيا مجرد جراب منتفخ لشعره مش طالعه موجوده تحت الجلد.

الشعر اللى مش طالع ده هو شعر صغير لف على نفسه وبينمو باتجاه معاكس للاتجاه الطبيعى وبدل مايطلع لبره بينمو لجوه تحت سطح الجلد ، واحيانا بتسد خلايا الجلد الميته مسامات البشره وتقفل جراب الشعره وده بيجبر الشعره على النمو لتحت وللجوانب بدل ماينمو لفوق ولبره. وساعات ممكن يحصل ده بسبب قص الشعر المجعد باداة بتلامس سطح البشره فبتطلع الشعره المقصوصه والحاده مجعده وتخترق سطح البشره لجوه.

ومع ان الشعر تحت الجلد مش مشكله معقده وخطيره الا انها ممكن تكون محرجه شويه وكمان ممكن تسبب تهيج واحمرار البشره فى مكان الاصابه.

كيف تبدو الشعرة غير النامية تحت الجلد؟؟

بتسبب الشعره اللى مطلعتش تهيج موضعى لمنطقة البشره اللى موجود فيها جراب الشعره وتظهر انتفاخات حمرا صغيره جدا تبان زى الحبوب ، وساعات بتسبب الشعره اللى مطلعتش انتفاخات مؤلمه شبه القرحه الجلديه ، وممكن يكون مكان الشعره دى مثير للحكه وخاصة لما بيكون موجود شعر كتير مطلعش فى الجلد وممكن تلاحظ وجود صديد فى البثور اللى ظهرت او تشوف الشعره ملفوله حولين نفسها ، وبتظهر عند الرجاله والستات باشكال مختلفه:
فى الرجاله : غالبا بيظهر الشعر تحت الجلد على شكل بثور صغيره وبتظهر فى مناطق الدقن والخدود والرقبه وخصوصا بعد الحلاقه.
فى الستات : غالبا بيظهر الشعر تحت الجلد على شكل بثور صغيره فى مناطق الرجلين والدراعين والابطين .

أسباب حالة الشعر تحت الجلد :

ممكن تحصل الحاله دى لأى شخص لكنها منتشره اكتر بين :
_ اللى كان الشعر عندهم مجعد بطبيعته وده علشان الشعر المجعد والخشن قابل اكتر للانحناء وخرم الجلد ويرجع ليه وينمو جوه بعد قصه او حلاقته.
_ الناس اللى عندهم مستوى مرتفع من بعض الهرمونات الجنسيه واللى بيخلى فرص ظهور الشعر تحت الجلد اكبر خصوصا بعد الحلاقه.

علاج الشعر تحت الجلد :

غالبا بتخف المناطق المصابه من الجلد من غير علاج او تدخل طبى ، ولكن لو مخفتش منطقة الشعره مع الوقت ممكن تسبب حدوث التهابات واسمرار فى البشره او تسبب ندوب لو حكيت المنطقه المصابه او اللعب فى البثور الموجوده فيها.

لو كان عندك شعر تحت الجلد فى بعض المناطق من جسمك وكنت مضايق او حصلك التهاب فى بشرتك ، يقدر الدكتور يعمل شق بسيط فى البشره لاطلاق سراح الشعر المحبوس تحت الجلد ، وفى حلول تانيه ممكن يقترحها الدكتور زى استعمال واحد من الادويه دول :
1. أدوية ستيرويد (Steroid) : ممكن تدهنه على بشرتك لتقليل الاحمرار والالتهاب.
2. كريم ريتين أ (Retin A) : بيخلص البشره من الخلايا الميته وبيقلل كمان من التصبغات اللى سببها الشعر تحت الجلد.
3. مضادات حيويه : بتتاخد اما بالفم او دهنها على المناطق المصابه لعلاج الالتهاب.

ممارسات تجنبنا نمو الشعر تحت الجلد :

علشان تتجنب الاصابه بالحاله دى حاول تمشى على الخطوات دى فى كل مره تلجأ فيها لحلاقة الشعر :
_ افرك بشرة وشك كل يوم باستخدام فوطه رطبه وبحركه دائريه او باستخدام مقشر للبشره هيخلى الشعر اللى مطلعش يخرج على سطح الجلد وينمو لبره من تانى.
_ استخدام شفره احاديه حاده للحلاقه.
_ قبل الحلاقه لازم تعمل ترطيب لبشرتك بميه دافيه ويفضل استعمال جل حلاقه.
_ الحلاقه فى نفس اتجاه نمو الشعر.
_ غسل وتنضيف شفرة الحلاقه بالميه بعد كل ضربة حلاقه.
_ اتجنب ملامسة الشفره للبشره وحاول تبعدها عنها وانت بتحلق ولو بسيط.
_ بعد ماتخلص حلاقه حط فوطه رطبه على البشره للتخفيف من اى تهيج.

وممكن تستعمل وساايل تانيه لازالة الشعر زى كريمات ازالة الشعر ، الات ازالة الشعر بالليزر اللى بتزيل الشعره مؤقتا من جذورها بدل من قصها.

 

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

4 انواع للصداع وطرق علاجها

4 انواع للصداع وطرق علاجها مهم انك تعرف نوع الصداع اللى بيصيبك عشان تقدر تتعامل …