اعراض نقص البوتاسيوم فى الدم

اعراض نقص البوتاسيوم فى الدم

نقص اى عنصر من العناصر المهمه فى الجسم بيأثر على الصحه بشكل كبير لأن الجسم مش بيشتغل بشكل طبيعى ويقوم بكل عملياته الحيويه بانتظام من غير ماتتوفر ليه كل الفيتامينات والمعادن والعناصر المختلفه اللى هتساعده على انه يقوم بده ، علشان كده مش لازم نستهين بنقص اى عنصر من العناصر ، وكويس ان نقص اى عنصر من عناصر الجسم المهمه بيظهر فى صورة بعض الاعراض المرضيه الواضحه اللى بتحتاج اهتمام من المريض علشان يعرف السبب ويبدأ فى علاجه فورا علشان يتجنب المضاعفات ، وواحد من اهم العناصر اللى بتسبب نقص وضرر صحى هو البوتاسيوم.

والبوتاسيوم هو واحد من المعادن المهمه جدا فى الجسم ، على الرغم من ان ناس كتير ميعرفهوش كويس ومش عارفين اهميته وهو موجود فى كل خليه من خلايا الجسم ومش ممكن يشتغل الجسم بشكل طبيعى من غيره لانه بيلعب دور مهم فى الحفاظ على توازن الميه جوه الجسم علشان كده يعتبر هو الضابط لمستوى ضغط الدم فى الجسم وكمان بيلعب دور حيوى فى عمل القلب والعضلات والجهاز العصبى كمان ومع كل المهمات الضروريه دى بيسبب نقص البوتاسيوم فى الجسم بعض الاعراض المرضيه واللى بتبدأ بسيطه وبعدين بتزيد وتوصل لمضاعفات خطيرة فى حالة منتبهناش ليها.

أعراض نقص البوتاسيوم فى الدم :

1 – خفقان القلب : خفقان القلب يعنى تسارع ضربات القلب وعدم انتظامها وخفقان القلب من أول الاعراض اللى بتظهر على المريض لان القلب بيحتاج لعنصر البوتاسيوم للنبض بشكل صحيح وضبط مستوى ضغط الدم وغيابه بيسبب اضطراب فى ضربات القلب وبالتالى بيحس المريض بخفقان القلب ومع الوقت بيزيد الاحساس ده وبيأكد الدكاتره ان نقص البوتاسيوم ممكن يسبب تعرض المريض للسكته القلبيه.

2 – الدوخه والاغماء : بيسبب نقص البوتاسيوم خلل فى عمل الكليتين ويفقد الجسم كميات كبيره من الميه واللى بيخفض مستوى ضغط الدم عند المريض فيتعرض للدوخه بشكل كبير وممكن تتطور الدوخه وتوصل لاغماء كمان.

3 – انتفاج ووجع البطن : مع انخفاض مستوى البوتاسيوم فى الدم بيعانى المريض من الانتفاخ ويحس بوجع فى البطن والمعده وممكن يوصل وجع البطن لدرجة التشنجات ونتيجة اضطراب عمل الجهاز الهضمى ممكن يلاقى المريض نفسه بيعانى من امساك مزمن من غير وجود سبب واضح وده بسبب توقف عمل ونشاط الامعاء فيكون الامساك الشديد هو النتيجه والاعراض دى بتيجى مع بعضها واللى بيشير لنقص البوتاسيوم.

4 – الخدل والوخز : بيسبب نقص البوتاسيوم احساس المريض بخدلان واضح فى الاطراف وكمان بيشتكى بعض المرضى من وخز جامد فى الايدين والرجلين كمان وده بسبب اختلال الجهاز العصبى مع نقص البوتاسيوم.

5 – العطش وكثرة التبول : بيشتكى دايما المرضى اللى بيعانوا من نقص البوتاسيوم من العطش وكثرة التبول لان الجسم بيفقد كميات كبيره من الميه نتيجة الخلل فى عمل الكليتين فيحتاج المريض للتبول بشكل كبير وزياده عن الحد الطبيعى وكمان يحس بالعطش الشديد لان الجسم بيكون محتاج للميه بدل اللى بيفقدها.

6 – وجع العضلات : بيأثر نقص البوتاسيوم على عضلات الجسم كمان بشكل كبير ونقص البوتاسيوم الشديد بيسبب تحلل لخلايا العضلات وده من اخطر الاعراض اللى بتدل على نقصه على الاطلاق ، ويحس المريض بوجع شديد فى العضلات مع الاحساس بتصلب العضلات وصعوبة تحريك عضلات الجسم المختلفه والمرحله دى بيتكون مقدمه لبداية مضاعفات صحيه خطيره بسبب نقص البوتاسيوم.

7 – الشلل : بتظهر المشكله دى بعد ظهور اغلب الاعراض اللى قولناها قبل كده على المريض من غير مايتم علاج نقص البوتاسيوم ومع حاجة العضلات والجهاز العصبى للعنصر المهم ده بيتعرض الجهاز العضلى والعصبى للتلف ويتعرض المريض لحاله اسمها الشلل الرخو وبتحتاج الحاله دى لتدخل طبى عاجل لان التأخير فى اسعاف المريض هيسبب موته بسبب توقف التنفس عنده مع بطء تدفق الدم لجسمه كله.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

خدع سهله لعلاج ألم الرقبه والكتف والظهر

خدع سهله لعلاج ألم الرقبه والكتف والظهر اتضح ان فى نقاط ضغط مشتركه ومناطق التوتر …