تنظيم نوم الرضيع من اول يوم

تنظيم نوم الرضيع من اول يوم

فى الاسابيع الاولى بعد الولاده بيكون نوم البيبى مش منتظم خالص وبيطلع عينيا بس متقلقيش هنقدر ننظم نومه علشان تقدرى تنامى انتى والبيبى كويس بس الموضوع ده محتاج منك صبر شويه كتيره كده ومحاولات متكرره مع روتين نوم يومى.

التلات شهور الاولى :

فى الشهور دى لسه ابنك مش فاهم الفرق بين النهار والليل ده غير مشاكل المغص والانتفاخ وصعوبة الهضم كل ده بيأثر على نومه وبيخلى صعب تنظيم نوم حديثى الولاده بس الموضوع هيهدى بالتدريج اول مايكون عنده شهرين وهيبدأ ينام ساعات اكتر بليل بس هيفضل نومه متقطع بالنهار ، كل ما عليكى فى الشهور الاولى دى هو انك تعتبري نفسك لسه حامل واستغلى نوم البيبى فى اى وقت ونامى جمبه وتقدرى تهدى الاضاءه بليل وتزوديها بالنهار علشان يقدر يميز بين وقت النوم ووقت اللعب.

الشهور من الرابع الى السادس :

هيقدر ابنك يميز بين الليل والنهار اول مايبلغ الشهر الرابع وهينتظم نومه كتير عن قبل كده ، وهتقل بالتدريج اعراض المغص والانتفاخ المزعجه وده هيساعده على النوم ساعات متواصله بليل وتقدرى تعملى روتين للنوم :

_ خلى النهار لممارسة الانشطه واللعب مع ابنك ودخلى ضوء الشمس للبيت او الخروج بأبنك لو أمكن.
_ خلى وقت القليوله بتاعة الصبح قبل الساعه 6 علشان يقدر ينام بدرى بليل.
_ تقدرى تدى ابنك حمام دافى ورضعة مشبعه وتهدى الاضاءه وطبطبى عليه وغنيله علشان يفهم ان هوه ده وقت النوم.
_ كررى الروتين كل يوم لحد مايتعود عليه واتوقعى انه يرفض فى البدايه لكن بسرعه هيستسلم فى اليوم التالت او الرابع من تطبيق الروتين.
_ لو صحى ابنك بليل متفتحيش النور او تتكلمى بصوت عالى ، طبطبى عليه بس وخديه فى حضنك وغنيله لحد مايرجع ينام تانى.

الشهور من السابع الى التاسع :

ابنك كبر دلوقتى ودخل مرحلة الأكل الصلب ونومه انتظم كتير جدا عن الشهور الاولى.
_ عودى ابنك على النوم فى السرير لوحده معاكى فى الاوضه علشان متقوميش بليل تروحى اوضته كل مايصحى بليل للرضاعه.
_ حضرى وجبة عشا مشبعه لابنك بجانب الرضاعه قبل النوم على طول مع حمام دافى والاستمرار على الروتين اللى قولنا عليه.
_ متسبيش ابنك ينام اكتر من ساعه ونص بالنهار علشان يقدر ينام بدرى بليل بسهوله.

الشهور بين العاشر لحد عمر سنه :

_ هينتظم نوع ابنك كتير فى نهاية السنه الاولى وبيناموا بليل بشكل طبيعى لمدة 10 – 12 ساعه تقريبا مع قيلولة الصبح.
_ تقدرى الاستمرار على الروتين اللى قولنا عليه مع فطام ابنك من الرضاعه بليل علشان تساعديه على النوم العميق المنتظم.
_ حضرى ازازة ميه او كوباية عصير جمبه علشان لو قلق ابنك بليل يشرب ميه مع طبطبه خفيفه علشان يرجع للنوم.

بعد مرحلة الفطام الكلى هينام ابنك زيك بالظبط وهيبقى روتين النوم سهل عليكوا انتوا الاتنين.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

مخاطر تقبيل الطفل من فمه

مخاطر تقبيل الطفل من فمه تقبيل الوالدين لطفلهم من اجمل الاحاسيس اللي بيحسوا بيها وبيظهروا …