أهم المعلومات عن النقرس

أهم المعلومات عن النقرس

النقرس هو نوع من التهاب المفاصل بسبب تراكم بلورات حمض اليوريك فى المفاصل اللى بيتم انتاجه فى الجسم كجزء من عملية تحليل البيورين ودى ماده موجوده بشكل طبيعى فى الجسم وفى انواع معينه من الاغذيه ، وتراكم حمض اليوريك فى المفاصل ممكن يسبب التهاب المفاصل المؤلم وحصى الكلى وانسداد انابيب التصفيه فى الكلى واللى بيسبب الفشل الكلوى.
اعراض النقرس :

نوبات النقرس بتكون حاده وفجائيه ومعاها حراره ، تورم وتلون مايل للأحمرار ، والمفصل الصغير اللى فى صوباع الرجل الكبير هو المكان الاكتر تعرض للنوبات ، وكمان المفاصل التانيه ممكن تتأثر زى الركبتين والرسغين والصوابع والكوعين ، وفى ناس بيكون الوجع شديد وقوى لدرجة ان لمس الرجلين لأى حاجه بيحصل وجع شديد.

عوامل الخطر لمرض النقرس :

السمنه والوزن المفرط ، الاكثار من الكحول ، ارتفاع ضغط الدم ، ووظائف الكلى الغير طبيعيه ، دول من عوامل الخطر لتطوير النقرس وبعض الادويه والامراض ممكن بردوا تسبب ارتفاع مستويات حمض اليوريك.

ازاى نقلل من نوبات النقرس ؟؟

الحفاظ على كميات كفايه من السوايل بيساعد على منع نوبات النقرس الحاده وبيقلل من خطر تكوين حصى الكلى عند الاشخاص اللى بيعانوا من مرض النقرس ، ومعروف ان الكحول ليه تأثير مدر للبول وممكن يساهم فى الجفاف ويسرع حدوث نوبات النقرس الشديده ، والتغيير فى النظام الغذائى ممكن انه يساعد فى التقليل من مستويات حمض اليوريك فى الدم عن طريق تجنب الأكل الغنى بالبيورين زى المحار واللحوم والكبده والمخ والكلى ، والباحثين أكدوا ان أكل اللحوم أو المأكولات البحريه بيزود من خطر نوبات النقرس وتناول الالبان بيقلل من المخاطر دى ، وتخفيف الوزن ممكن انه يقلل من خطر النوبات المتكرره للنقرس.

علاج النقرس بالادويه :

بعض الادويه بتقلل من الوجع والالتهاب فى نوبات النقرس زى الادويه المضاده للألتهاب الكولشيسين Colchicine والستيروئيدات القشريه ، ومتوفر ادويه تانيه بتقلل من مستوى حمض اليوريك فى الدم وبتمنع تراكمه فى المفاصل وفى الكلى وفى الانسجه واللى بيساعد على منع المزيد من النوبات والمضاعفات زى الوبيورينول Allopurinol وفيبوكسوستاتFebuxostat وبروبينسيد Probenecid

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

خدع سهله لعلاج ألم الرقبه والكتف والظهر

خدع سهله لعلاج ألم الرقبه والكتف والظهر اتضح ان فى نقاط ضغط مشتركه ومناطق التوتر …