الجاثوم ، شلل النوم

الجاثوم ، شلل النوم

ممكن تكون عدت عليك تجربة انك تصحى مفزوع وحاسس بتقل على صدرك ومانعك من الحركه ومش قادر تحرك اى عضله فى جسمك ولا حتى لسانك علشان تصرخ وحد يلحقك من اللى عايشين معاك فى البيت ، انت صاحى ومتأكد من ده وشايف كل اللى حواليك فى الاوضه بشكل طبيعى وسامع صوت اللى جنبك فى الاوضه التانيه بس انت مهما حاولت مش قادر تقوم من على السرير وتهرب من اللى انت فيه ده المفزع اللى بيفترسك من اول رجليك لاخر شعر راسك ، وفجأه ، بوووم بيتحرر جسمك زى الزنبلك !..

الحاله دى اسمها بالعاميه الجاثوم أو الرابوص ، طبعا كانت على مر التاريخ فرصه للأفكار الشعبيه وحللوها تحليلات خرافيه ان فى كائن قاعد على الصدر وبيمنع النايم من انه يقوم ، بس كالعاده العلم بيهرش كل الخزعبلات الهشه دى وبيحلل وبيبحث عن الاسباب والمسببات.

علميا الحاله دى اسمها شلل النوم Sleep Paralysis وبتحصل بسبب اقتحام الحواجز بين عالم اليقظه والنوم ، وممكن تكون بعد النوم او قبله بس غالبا بعد دخول حالة النوم ، وبيتكون فيها حاسة السمع والنظر فعاله بشكل عادى وعلشان اخوفكوا أكتر ممكن الحاله دى كمان يكون معاها هلاوس سمعيه أو بصريه احيانا ، يعنى ممكن تسمع اصوات مش موجوده فى الحقيقه وهتحس انها فعلا موجوده ! ..

الاليه والسبب :

النوم بينقسم لدفعات من المراحل وطورين اسمهم الـ NREM و REM الاولى هي الحاله اللى مفيهاش احلام والتانيه هي حالة الانخراط فى الاحلام ، المصطلح التانى بيشير هنا لحركة العين السريعه والاولى من غير الحركه دى ، نقدر نقول بثقه ان الانسان اللى بيدخل طول الـ REM هو فى الواقع بيحلم لأن الحركه العشوائيه دى للعين هى فعلا محاكاه لحركة العين اللى شايفه المشاهد فى الاحلام ، يعنى لو كنت بتحلم ورفعت نظرك بتشوف مشهد معين فى سماء حلمك هيتحرك نن عينيك الحقيقه لفوق !.. والمرحلتين دول بيتناوبوا على دفعات بحيث يكون لكل واحده مايقارب ال 90 دقيقه فى طور الاحلام وبيحصل فصل بين الدماغ والعضلات الاراديه بعمومها ، وده لغرض مهم وهو عدم قيام الجسم وعضلاته بالتفاعل فعليا مع الاحداث اللى بينخرط فيها الدماغ الحالم ، تخيل لو كنت بتحرك ايديك ورجليك فى الواقع علشان تتماشى مع اللى بيدور فى احلامك وانت نايم ، هيكون فى خطر عليك من الحركات اللاواعيه دى .

مربط الفرس :

فى بعض الحالات بيصحى الشخص قبل نهاية مرحلة الـ REM علشان كده بيلاقى عضلاته مشلوله ومفصوله عن نشاطه الواعى وخارج نطاق سيطرته مع ان سمعه وبصره وادراكه للى حوليه سليم مبدئيا !.. علشان كده بيكون واعى بس مش قادر يتحكم فى جسمه.
ولاحظوا من الدراسات ان شلل النوم بيكون غالبا مرتبط بالنوم على الضهر والوش بيكون لفوق ، علشان كده النقطه دى بتزود اقناع بعض الناس بوجود مخلوق مخيف بيقعد على صدرهم !

ومن أسباب الحاله دى :

1_ عدم الانتظام فى النوم.
2_ تراكم الضغوط والقلق.
3_ تعاطى المهلوسات.

اجراءات وقائيه : اتباع عادات نوم منتظم ، محاولة الحد من القلق قبل النوم ، الابتعاد عن العقاقير المهلوسه .
ونصيحه اخيره : لو دخلت فى شلل النوم وحصل واتحررت منه مترجعش تنام تانى فى ساعتها لانه هيرجع ويمسك فيك علشان يرعبك مره تانيه.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

نصائح لتجنب العصبيه فى رمضان

نصائح لتجنب العصبيه فى رمضان كتير مننا بتتملكه العصبيه وقت الصيام فى رمضان واللى بيخليهم …