بدائل حبوب منع الحمل

بدائل حبوب منع الحمل

تعتبر وسايل منع الحمل الحديثه من اكتر الاكتشافات الطبيه أهميه فى النصف الثانى من القرن العشرين ، وحبوب منع الحمل أشهر الوسايل دى على الاطلاق واكترها شعبيه ، ومع ذلك يفضل التركيب الهرمونى لحبوب منع الحمل اثار جانبيه سلبيه على جسم المرأه سواء على المدى القريب أو البعيد ، واللى بيخلى ستات كتير تدور على وسايل تانيه فعاله لمنع الحمل وأسهل فى استعمالها.

بتنقسم وسايل منع الحمل لـ :

أولًا: حواجز كيميائية وطبيعية، وتشمل:

1. العازل الطبى للرجال :
بيحجز الحيوانات المنويه للراجل لمنع وصولها لجسم الست وبيتصنع من مواد مختلفه زى اللاتكس وهو الأكثر انتشارًا وفعالية، وكمان البولي يوريثان ويُستخدم في حالات الإصابة بالحساسية من اللاتكس، وبيتوفر منه كمان مقاسات مختلفة.

2. العازل الطبى للنساء :
وهو عبارة عن كيس من البولي يوريثان ليه حلقتين عند كل طرف، الحلقة الداخلية بتستعمل لتثبيته داخل المهبل، والخارجية لتغطية الفتحة الخارجية للمهبل، وهوه كمان بيعزل الحيوانات المنوية ومنع وصولها جوه الرحم. تبلغ فعالية العازل الطبي للنساء في منع الحمل من 79 – 95%.

3. المستحضرات القاتلة للحيوانات المنوية:
بتشمل الجيل والسفنج والكريم، وبتتحط في مهبل الست، وهيا بتقضى على الحيوانات المنوية، وتبلغ فعاليتها في منع الحمل حوالي 78%. غالبًا لا تُستعمل المستحضرات دى لوحدها، ولازم بتستعمل مع العازل الطبي للرجال.

4- الحجاب العازل الأنثوي لمنع الحمل (Diaphragm):
_وهو مصنوع من المطاط على شكل قبة لينة مقلوبة، وبيكون جواها جيل مضاد للحيوانات المنوية، وبيُتثبت حولين عنق الرحم.
_بيجى في مقاسات مختلفة، وممكن يثبته الدكتور.
_بيمنع الحجاب العازل الأنثوي وصول الحيوانات المنوية جوه الرحم، وبيقتل الجيل اللى بيمر من الحيوانات المنوية.
_بيتحط قبل حدوث العلاقة، ومينفعش يتشال قبل مايعدى 6 ساعات بعدها.
_تبلغ فعاليته في منع الحمل من 84 – 94%.

5- غطاء عنق الرحم (Cervical Cap):
مصنوع من اللاتكس المطاط، وبيجى في مقاسات مختلفة، وبيثبته الدكتور، بيشبه الحجاب العازل كتير في طريقة استعماله، وبيضاف ليه كمان الجيل القاتل للحيوانات المنوية. تبلغ فعاليته في منع الحمل من 84-91%.

ثانياً: اللولب الرحمي (IUD):

بيتوفر منه نوعين النحاسى والهرمونى وأشهر أنواعه Mirena & Jaydess ، وبيركبه دكتور النسا وبتستمر فعاليته من 3 – 10 سنين ، وبتبلغ فعاليته فى منع الحمل 99% ، ومن أشهر اثاره الجانبيه انقطاع الطمث مع اللولب الهرمونى أو زيادة تدفق دم الطمث وزيادة الوجع مع اللولب النحاسى.

ثالثًا: موانع الحمل الهرمونية (بخلاف حبوب منع الحمل):

1- حلقة المهبل (Vaginal Ring):
وهي عبارة عن حلقة من الإستروجين والبروجستيرون، بتتحط جوه المهبل لمدة 3 أسابيع وتتشال لمدة أسبوع. وبتبلغ فعاليتها في منع الحمل من 91-99%.

2- حقن منع الحمل (Depoprovera):
وهيا عباره هرمون البروجستيرون وبتتحقن كل 12 أسبوع، وبتعمل كمانع للحمل ممتد المفعول وبتبلغ فعاليتها في منع الحمل 97 -99% ، ومن اشهر اثارها الجانبيه ان خصوبة الست مبترجعش بمجرد انها توقف تاخدها وممكن تحتاج سنه كامله علشان تقدر ترجع تحمل تانى.

3- اللاصقة الهرمونية المانعة للحمل (Contraceptive Patch):
بتتثبت على البطن أو الفخد أو على الدراع من فوق ولازم نغير مكانها كل مانيجى نغيرها كل مره وبتتغير الاصقه كل اسبوع فى نفس اليوم لمدة تلات اسابيع ورا بعض ويتاخد الاسبوع الرابع راحه علشان تنزل فيه الدوره ، وبتبلع فعاليتها في منع الحمل من 91- 99%.

4- زرع كبسولة هرمونية (Implant):
بتتزرع فى الجزء اللى فوق من الدراع وبيستمر مفعولها لمدة 3 سنين وتبلغ فعاليتها في منع الحمل 99%.

رابعًا: الطرق الطبيعية لمنع الحمل:

1- العزل:
وهو المنى ينزل بره المهبل، وتبلغ فعاليته في منع الحمل 73 – 96%.

2- انقطاع الطمث في فترة الرضاعة:

وتعتبرالطريقة دى فعالة للى بتعتمد اعتماد كلي على الرضاعة الطبيعية لتغذية مولودها، وتستمر فعاليتها لحد 6 شهور من الولادة، وتبلغ فعاليتها 98%.

3- الفترة الآمنة (Safe Period):

وتعتمد على القدرة على تحديد أيام التبويض خلال أيام الشهر، ومعرفة بعض المعلومات المهمة،زى:

– ان البويضة بتفضل قابلة للتخصيب لمدة 24 ساعة.

– ان الحيوانات المنوية ممكن انها تفضل حية وقادرة على تخصيب البويضة داخل جسم المرأة من 5 إلى 6 أيام.

– وده معناه أن إمكانية حدوث حمل بتبدأ من 6 أيام قبل التبويض ولحد يومين بعد التبويض. ومش ممكن الاعتماد على الطريقة دى إلا في حالة الدورة الشهرية المنتظمة.

– تبلغ فعالية هذه الطريقة في منع الحمل نحو 75%.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

10 حلول لتخفيف الام الثديين خلال الرضاعه

10 حلول لتخفيف الام الثديين خلال الرضاعه من أهم التوصيات اللي بتتقدم للأم الحامل فى …