حواديت ماما .. كوميديا بنج الولادة

حواديت ماما .. كوميديا بنج الولادة

“إنتوا مبتفهموش حاجة كلكواااا”، “أنا عاوزة مسكن”، “مش عاوزة أشوفها”…

أول 3 جمل قلتها لما فقت من البنج الكلي بعد عملية الولادة القيصرية، اللي يومها جات جنتى للدنيا، ويومها أنا كرهت الدنيا، وده ميمنعش إني لما هديت رجعت أحب الدنيا من جديد!

اللي يقول لك الولادة دي حاجة سهلة وهتعدي بسرعة متسيبيهوش يكمل كلامه، انتي تسيبيه وتمشي على طول، لأنه إما بيستعبطك أو مخلفش قبل كده، وفي الحالتين مش لازم تسمعيه!

الحقيقة أنا ولادتي كانت كوميدية جدا، فجأة الدكتور قال لي تعالي بكرة علشان تولدي.. أنا مش سامع نبض الجنين كويس، كلمت جوزي في التليفون، وقلت له أنا هولد بكرة! تخيل! كانت لحظات مرعبة جدا وتقريبا مانمتش ليلتها.

أول مرة أدخل أوضة العمليات، وأول مرة أولد، وأول مرة أشوف بنتي، وأول مرة أحس إني هموت وأكتب وصيتي وحاجات كتير قلبت تراجيدي، لدرجة إني قعدت أكتب مين هيربي بنتي ويربوها إزاي كمان، يعني هموت ومش هسيبهم في حالهم برضه هيربوها على مزاجي.

طبيبة التخدير حاولت تديني بنج نصفي وفشلت لأني كنت مرعوبة وبرتعش، ففي النهاية قررت تديني بنج كلي، وفجأة محستش بأي حاجة غير وأنا بفتح عيني في الأوضة وجوزى ماسك إيدي، وماما واقفة جنبي تقول لي شوفي بنتك جميلة إزاي.. أجيبها لك تشوفيها؟ وهنا طلعت الصرخة من البنت الكيوت المحترمة: “هاتولي مسكن أنا تعبانة”.

طبعا ألم الجرح كان بالنسبة لي لا يحتمل رغم إنهم كانوا طبعا حاطين لي مسكن في المحلول لكن مأثرش معايا! أنا وبلا فخر مدمنة الكافيين والبنادول إكسترا!

وجوزى يقول لي الدكتور حاطط لك 2 مسكن في المحلول، وأنا أرد عليه في وسط جمع من الأهل والدكاترة وأقول له: “أنت متعرفش حاااااجة، أنا تعبانة هاتولي مسكن”.

هما طبعا حكوا لي كل ده، بعد ما الدكتور حط لي 3 جرعات مسكن في المحلول، علشان أهدى وأسكت ولساني يتلم شوية، والحمد لله هديت 😀

كان يوم عظيم عمري، ما هنساه في حياتي كلها، يا عيني أهلي اتعذبوا معايا وصرخت في وشهم كتير، ما علينا ولادة وراحت لحالها!

المهم إني عاوزة أقول لكم يا حوامل أو يا اللي ناويين تبقوا حوامل، خففوا الكافيين والمسكنات اللي بتاخدوها، علشان متتعبوش زيي، وعلشان متشتموش حد يوم الولادة، وعلشان تقدروا تشوفوا عيالكم بعد الولادة عادي وتحسوا بمشاعر الأمهات اللي بيحكوا عنها دي، واللي أنا شخصيا محستش بيها غير تاني يوم، مكذبش عليكم مكنتش طايقة أبص للبنت المفعوصة دي 😀

الولادة تجربة صعبة بس متخافوش، بعد كام يوم كل الألم بيعدي، وفعلا مع الوقت بنقدر ننساه، لكن دايما المواقف الطريفة اللي بتحصل يوم الولادة بتفضل ذكرى حلوة، حتى لو كانت مواقف تفضح زي اللي حصلت لي دي، وعموما أنا بقيت بشرب كوباية قهوة واحدة في اليوم، ومبقيتش أبلبع مسكنات زي زمان، علشان لو غلطت وخلفت تاني ميحصلش اللي حصل!

#دكتور_مفيد
#روشتة_دوت_كوم
#الدواء_بقى_أونلاين

 

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

مخاطر تقبيل الطفل من فمه

مخاطر تقبيل الطفل من فمه تقبيل الوالدين لطفلهم من اجمل الاحاسيس اللي بيحسوا بيها وبيظهروا …