قائمه بأهم تطعيمات الأطفال فى عمر المدرسة

قائمه بأهم تطعيمات الأطفال فى عمر المدرسة

 

“الوقاية خير من العلاج” علشان كده بتهتم الأمهات على حماية أطفالهم من الإصابة بالأمراض بكل الطرق الممكنة، والتطعيمات من أهم الخطوات اللي بتحمي الطفل من الإصابة بكتير من الأمراض الخطيرة على المدى البعيد.

وفى المقاله دى هقدملك أهم التطعيمات اللازمة للأطفال في سن المدرسة:

تطعيم الجدري المائي (Chicken Pox) :

التطعيم بيتاخد على جرعتين، غالبا بتكون الجرعة الأولى في الفترة ما بين الشهر 12 : 18 من عمر الطفل، أما الجرعة التانية فبتكون خلال 3 شهور من الجرعة الأولى، أما إذا كان الطفل مخدش الجرعات الوقائية في وقت مبكر ممكن ياخدها في أي وقت قبل مايبلغ 13 سنه، ولازم تفصل بين الجرعتين فترة زمنية تتراوح بين 4 : 8 أسابيع؛ وده لانتشار فرص العدوى بالمرض في المرحلة العمرية دى عند الأطفال.
تطعيم الجدري المائي مش موجود مجانا في المدارس؛ وممكن نجيبه عن طريق مركز التطعيمات بالمصل واللقاح بمقابل حوالي 300 جنيه.

التطعيم الثلاثي الفيروسي MMR :

اللقاح الثلاثي بيحتوى على فيروسات حية بتعمل على تحفيز الجهاز المناعي لإنتاج أجسام مضادة لأمراض الحصبة والحصبة الألمانية والنكاف، وبيوفر اللقاح حماية بنسبة 98%.
بندى الطفل الجرعة الأولى من لقاح MMR لما يكمل عمر سنه، وكمان جرعة منشطة في مرحلة الحضانة عند سن أربع أو خمس سنين.

اللقاح الخماسي :

عباره عن 5 لقاحات مجمعة؛ وهما (الدفتيريا – التيتانوس – السعال الديكي – الإنفلونزا البكتيرية – شلل الأطفال)
بندى الطفل تلات جرعات أساسية عند سن شهرين و4 شهور و6 شهور، وكمان جرعات تنشيطية في مرحلة قبل المدرسة عند سن 4 أو 5 سنين، وجرعة تانيه عند سن 13 : 15 سنة.

لقاح الحمى الشوكية (التهاب السحايا) :

بيوفر اللقاح ده وقاية جزئية ضد المرض علشان كده يفضل تكراره مرة كل 3 سنين، وعليك تبليغ مدرسة طفلك بتاريخ آخر مرة أخد فيها التطعيم، ممكن نجيب اللقاح ده من مركز التطعيمات بالمصل واللقاح بسعر حوالي 60 جنيه.

لقاح شلل الأطفال :

بياخد الطفل جرعات معززة ضد مرض شلل الأطفال لما بيكون عنده سبع سنين و13 سنه ، والجرعات دى ضرورية لتكوين مناعة طويلة الأمد عند الأطفال، انما الأربع جرعات الأساسية بياخدها الطفل على مدار السنة الأولى من عمره، بالإضافة للحملات القومية اللي بتقوم بيها الدولة ضد شلل الأطفال، ولازم كل طفل ياخد كل الجرعات اللي بتعلن عنها الدولة.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

مخاطر تقبيل الطفل من فمه

مخاطر تقبيل الطفل من فمه تقبيل الوالدين لطفلهم من اجمل الاحاسيس اللي بيحسوا بيها وبيظهروا …