4 أسباب لتأخر النطق عند الاطفال

4 أسباب لتأخر النطق عند الاطفال

فى ستات كتير مننا بتسأل نفسها ليه صغنونى مش قادر يكمل جمله واحدة وزمايله فى الحضانه ماشاء الله بيتكلموا ميه ميه وبطلاقة ، طيب ياترى سبب التأخيرعلشان هو ولد والبنات اسرع منهم فى الكلام والتعبير؟ وياترى ابنى فعلا متأخر فى الكلام ؟ اسئله كتيره بتشغل بال الامهات

وعلشان نجاوب عن الاسئلة دى لازم نعرف الاتى :
ان الطفل فى سن سنه ونص فى العادة بيستخدم حوالى عشرين كلمة ، والطفل فى عمر السنتين بنتوقع وصول عدد الكلمات لـ ميه وممكن يجمع بين كلمتين علشان يوصل المعنى.

واسباب حدوث تأخر النطق :
1. فى كتير من الاوقات بتتطور مهارات حركية عند الطفل الصغير زى النط والتسلق وغيرها من المهارات المختلفة وده بيأخر مهارة الكلام.
2. الاستجابه السريعه للى عايزة الطفل من غير مانديله الفرصه للتعبير عن نفسة.
3. الكلام بأكتر من لغة فى البيت.
4. عدم وجود تواصل كفايه بين الاهل والطفل الصغير.

وعلشان نتجنب حدوث اى تأخير لازم تتكلمى مع ابنك على طول بشكل مستمر وتشرحيله كل اللى بتعمليه طول اليوم علشان ياخد منك مفردات جديده بصورة يوميه وكمان القرايه من اكتر الوسايل المهمه.
ومن اهم العلامات اللى تطمنك ان تأخير الكلام عند ابنك مش حاجة خطيره هيا ان ابنك يستخدم الاشارة ويستجيب لأسئلتك او طلباتك بالتنفيذ زى انه يديكى الكوباية لما تقوليله ناولنى الكوبايه.
والدراسات الاخيرة اللى اتعملت للموضوع ده بتأكد ان اى تأخير فى النطق من غير اسباب مرضيه بيختفى خالص فى عمر الخمس سنين.

وعلشان تتأكدى من سلامة ابنك الصغنون لازم تراجعى الحاجات دى :
1. ان مفيش اى مشاكل فى السمع.
2. ان الطفل مش بيخرج منه غير عدد قليل جدا من الاصوات.
3. مبيرددش الكلمات وراكى.
4. مش بيستمتع باللعب مع الاطفال التانيه.
5. التأكد ان مفيش اى تاريخ مرضى للعيله متعلق بتأخير النطق والتعليم.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

5 طرق لتقديم الحليب لطفلك

5 طرق لتقديم الحليب لطفلك شرب كوباية لبن على الفطار لطفلك ، ممكن يكون مشهد …