8 أخطاء فى تعديل سلوك الاطفال

8 أخطاء فى تعديل سلوك الاطفال

الطفل بيتولد على الفطرة النقية البريئة، زى ورقة ناصعة البياض، بيحلم باباه ومامته بتنشئته نشأة سليمة، ووبيعملوا كل اللى يقدروا عليه من جهود لتربيته وتقويم سلوكه، فيبدأوا في نقش الورقة البيضاء دى بطريقتهم الخاصة ورؤيتهم في الحياة، فاكرين أنهم بيحسنوا تربيته وتقويمه، إلا إنهم بيقعوا فى أخطاء تربوية كتيرة نتيجة اختلاف المفاهيم من جيل لجيل، أو لعدم معرفتهم للطرق الصحيحة للتعامل مع الطفل في الأوقات المختلفة، واللى بيؤدي لاكتساب الطفل سلوكيات غير مرغوب بيها،ممكن تزيد وتبقا من صفات الطفل الأساسية اللي بيصعب تغييرها، وتكون سبب شكوى الآباء والأمهات، من غير مايفهموا أنها نتيجة لمعاملتهم الغلط لأطفالهم.

علشان كده جمعنا بعض الأخطاء اللي ممكن تقعى فيها وانتى بتحاولى تقويم سلوك طفلك، علشان تتجنبيها في تربيتك ليه:

1. الكذب على طفلك

اوعى تستهينى أبدًا بذكاء طفلكِ، ممكن تلاقى نفسك بتخلقى كذبة بيضا لتوجيه طفلك علشان يعمل حاجة معينة ، أو انه ميعملش حاجة معينه بطريقة غير مباشره ، زى انك تقوليلة: “لو اتأخرتَ في لبس هدومك هنمشي ونسيبك”، ممكن ينخدع فى الاول ويلبس هدومه بسرعة علشان خايف تسيبة وتمشى، لكن مع تكرار الكذبة هيفهم انك مش هتسيبة ابدا، واللى هيوصله لاهتزاز ثقتة فى كلامك.
خليكى صادقة دايما مع طفلك، والأفضل أنك تعرفية النتايج اللي هتحصل في حالة تأخركوا، زى مثلا تقوليله لو تأخرت في لبس هدومك مش هيبقى عندنا وقت كفاية نشترى كل اللى عايزينة، وده هيساعده على تحمل المسؤولية بشكل أكبر، لما يقرر عدم التأخير بنفسه لإدراكه أهمية الأمر، ومش خوف من انك تسيبية وتمشى.

2. مكافأة الطفل أكتر من اللازم

لما تكافئى طفلك على كل حاجة يعملها، زى انه خلص واجب المدرسه، هيتعودعلى أن يكون فيه مقابل في كل مرة يخلص فيها الواجب، والأفضل هنا أنك تخلى مكافأتك لطفلك مكافأة معنوية وتشجيعية، زى انك تقوليله ازاى انتى فخورة بيه انه خلص اللى وراه، أو بحضن دافى حنين، وخلى تقديرك ليه معنوي ومش مادى في كل الأوقات، هتكون نظرته للحياة بعد كدا بعمق روحاني ومعنوي ومش نظرة مادية مستنية مقابل لكل حاجة.

3. كسر القواعد اللي حطتيها بنفسك

متحطيش قاعدة وبعدين تكسريها لأي سبب، زى انك تسمحي لطفلك بانه يتفرج على الكارتون لمدة أطول من اللي حددتيها ليه لأنك تعبانه وعايزة ترتاحي لوقت أطول. وخلى بالك، فلو كسرتى قاعدة مره واحدة، اعرفى أن طفلك فهم المفتاح دة، ومش هيبطل انه يستخدمه علشان تكسري اكتر من القواعد.

4. الاختلاف في طريقة التربية

لو كان فى حد بيشاركك في تربية طفلك، زى جوزك أو والدتك، فاتفقي معاهم على الالتزام بنفس القواعد التربوية، وعدم كسرها أو التراجع عنها مهما كانت الظروف، فمينفعش تمنعي طفلك من حلوى معينة، وجدته تجبهاله لما يروح عندها،لأن ده هيأثر على ثقته بيكى، وممكن ينفر منك ويتعلق بجدته أكتر لأنها بتلبي ليه رغباته ومش بتمنعه من أكل الحلوى اللذيذة.

5. التخويف والترهيب

بعض الأمهات بيستخدموا أسلوب الترهيب لمنع أطفالهم من انهم يعملوا حاجات معينه، زى اختلاق أساطير عن كائنات مرعبة هتاكل رجليهم لو مناموش بدرى، الأسلوب ده يعتبر من أسوأ الأساليب التربوية، لان نتيجته غرس الخوف والجبن بداخل الطفل، وكمان فقد الثقة في أمه لما يكبر ويفهم حقيقة عدم وجود الكائنات دى.لازم تنشأ العلاقة بين الأم وطفلها على الثقة والصدق والتفاهم والاحترام ومش على التخويف والترهيب.

6. العصبية وعدم القدرة على ضبط النفس

لما بتزهقى وتتعصبى، ابنك بيمسك زمام الامور،علشان كده حافظي على هدوئك واتحكمي في أعصابك علشان تكونى أنتى المسيطرة، وافتكرى ان طفلك ذكي جدًا ومش هيبطل استخدام الأساليب اللي تخليه هوه المسيطر.

7. إطالة الوقت بين الخطأ والعقاب

اتأكدي أن القواعد اللي حطتيها مش هتتطبق زى ماانتى عايزه إلالو كان فى تأديب وعقاب،لما يغلط طفلك، متطوليش الوقت بين الغلط والعقاب، ولازم يكون العقاب سريع وحازم بعيدعن الضرب أو العقاب البدني، وبعد تحذير الطفل وتوجيهه للفعل الصحيح.

8. الشرح أكثر من اللازم

الطفل أقل من خمس سنين، مش فاهم ازاى يتصرف بشكل صحيح إلا بعد ماتوضحى ليه ده بطريقة بسيطة وواضحة، وضحي ليه المفاهيم السلوكية بأقل عدد من الكلمات، ومن غير شرح طويل وتفاصيل معقدة مش هيفهمها طفلك.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. دودى اخيرا لبست توكه

حواديت ماما .. دودى اخيرا لبست توكه كل الستات بتحلم إنها تخلف بنات عشان تسرح …