8 أسرار لطرد الطاقه السلبيه من المنزل

8 أسرار لطرد الطاقه السلبيه من المنزل

الطاقه السلبيه مصطلح بيعانى منه الكتير من الناس ، الضغوط النفسيه اللى بيحسوا بيها بسبب الظروف الاجتماعيه والاقتصاديه بتولد ليهم فى الغالب الطاقه دى، وتنعكس بالسلب على العلاقات بين الناس مع انهم بيدوروا على الافضل فى حياتهم .
وبتسبب الطاقه السلبيه الخمول الاكتئاب والضيق ، على عكس الطاقه الايجابيه اللى بتدى الطمأنينه والراحه النفسيه والطاقه الفعاله والمنتجه فى العمل ، لكن ده مرتبط كمان بالناس اللى بتتعامل معاهم ، ممكن تكون طاقتك سلبيه وتقعد مع اصحابك او قرايبك وتحس بالراحه وتنعكس طاقتك من سلبيه لايجابيه بسبب الروح المرحه واللى كلها نشاط ، وفى شخصيات تانيه طاقتهم سلبيه ولما بتقعد معاهم بتحس انك بقيت زيهم حتى بعد ماتسيبهم بيملكك الضيق والملل والكابه.
خبراء الطاقه قدموا نصايح كتيره حولين الطاقه السلبيه ، وكل اللى عليك دلوقتى انك تتبع شوية خطوات سهله واللى هتقودك للطاقه الايجابيه سواء فى المنزل او فى الشغل ، علشان كده لو كنت من الناس دول اللى بيحسوا بالسلبيه خليك هنا معانا وكمل قراية المقاله :

اولا : دهان الحيطه باللون الاصفر :
بيغير اللون الاصفر من الطاقه السلبيه للايجابيه لأن اللون ده بيدى العينين الراحه والاحساس بالعمق والاتساع وبيدى الاوضه كمان الجو الدافى.

ثانيا : ترتيب السرير أول مانصحى من النوم :
من أسهل الخطوات اللى بتقتل الطاقه السلبيه وتولد الايجابيه هي ترتيب السرير اول ماتصحى مباشرة ، ولما تيجى بليل وتلاقى سريرك نضيف ومترتب هيديك الانطباع الايجابى اللى هيساعدك كمان على انك تعمل العادات الكويسه فى حياتك ، وكشفت مدربة الصحه والسعاده سيليفا كرست مان ، انه لازم كمان تنفيض المخدات ومفارش السرير.

ثالثا : فتح الشبابيك الصبح بدرى:
بعد ترتيب السرير ، افتح شبابيك الاوضه او البيت بشكل عام عشان دخول الهوا النضيف بيديك الاحساس الايجابى حتى ولو كان الجو برد بره.

رابعا : ولع البخور :
بتضيف مدربة الصحه والسعاده ان ريحة البخور بتزود طاقة الجسم وبتدى الشخص أجواء الراحه والهدوء النفسى.

خامسا : رش الملح :
بينصح خبراء الطاقه برش الملح على زوايا الاوضه الاربعه لمدة 48 ساعه عشان يمتص الطاقه السلبيه وبعد كده ممكن نشيله بسهوله بالمكنسه الكهربا ، وكمان بيمنع ملح البحر دخول الطاقه السلبيه وممكن نحطوا تحت السجاده فى البيت.

سادسا : تنضيف البيت :
تنضيف البيت باستخدام منظفات ليها ريحه من اختيارك انت بيزيل الطاقه السلبيه ويديك الايجابيه جوه البيت ، وكمان تصليح الحاجات المكسوره من اثاث وغيره أو التخلص منها لانه بيؤذى العين.

سابعا : حط مرايات كتير جوه الاوض :
المرايا بتدى الطاقه الايجابيه وبتصفى الذهن زى مابيقول علم الـ فانغ شوي ، عشان كده ممكن تعلق مرايات أكتر فى اوض البيت بشرط تبعد عن الزوايا الحاده.

ثامنا : ازرع نباتات :
بتجدد النباتات الطبيعيه طاقة المكان ، وفى نباتات محدده بننصح بزراعتها جوه البيت منها الريحان والميرميه ، وتبعد خالص عن الصبار واللى زيه من الفصيل ده لانه بيسيب الطاقه السلبيه فى المكان.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

رائحة حديثى الولاده

رائحة حديثى الولاده الأطفال حديثى الولاده يفرز جسمهم رائحة مميزه تجذب البشر وخصوصا النساء . …