اضرار النقود الورقيه الخطيره على الصحه

اضرار النقود الورقيه الخطيره على الصحه

الدراسات والابحاث الطبيه اثبتت ان الفلوس وخصوصا القديمه منها ممكن تسبب فى نقل عدد كبير من الامراض الخطيره للأنسان ، عشان الورق ده بيتداوله كتير من اللى ايديهم مش نضيفه وملوثه بالميكروبات ومسببات الامراض ، واللى بيسبب نقل بعض الامراض بين الناس زى الانفلونزا وبعض امراض الجهاز الهضمى والتنفسى وبعض الامراض الجلديه وغيرها.

ممكن ميخطرش على بال حد مننا أد ايه الفلوس خطيره على صحتنا وبالرغم من اهميتها فى حياتنا الا ان الابحاث الطبيه أكدت انها وسط ممتاز لنقل الجراثيم والميكروبات.

ودلوقتى أسال نفسك : اد ايه من الفلوس الورق لمستها ايديك النهارده ؟ كام عدد الايدين اللى مسكت الورق ده واتبدلوها بينهم ؟ ياترى كانت ايديهم نضيفه ؟ وايه هيا الريحه الغريبه المتغيره للفلوس ؟ ياترى فى فعلا خطوره حقيقه على صحة الانسان بسبب تداول العمله بين الايدين الملوثه ؟ ومين هو ده الحبيب المتيم اللى كتب كلمات حبه على الفلوس الورق ، بس الايام ارغمته على خيانتها وصرفها من غير تردد؟ ودلوقتى عندى سؤال عايزه اسألهولك : فى الوقت اللى بتوفر ليك الفلوس كل احتياجاتك وطلباتك ، ياترى ممكن تتحول من نعمه لـ نقمه؟

ليك الحقيقه : بالرغم ان الناس مش بياكلوا الفلوس ، الا ان العملات الورق بتشكل خطوره كبيره على صحة الانسان وبسبب سوء استعمالها بتكون وسيله فاعله لنقل الامراض الخطيره.

واللى بيأكد ده تقرير طبى نشرته مجلة ساذرن ميديكال الامريكيه المتخصصه وقالت فيه : ان الفلوس ممكن تنقل اكتر الانواع من الامراض الخطيره ، وبين الباحثين بعد ماجمعوا ورق الفلوس وفحصوها ان 94% منها تحمل فيروسات لالتهابات خطيره بتصيب الجهاز التنفسى وبتسبب انواع مختلفه من الحساسيه ، ويعتبر الاكتشاف ده هو اساس لاقتراح اعتماد العمله الذكيه عن طريق مجموعه من الاضافات تخلى الفلوس الورق اكتر مقاومه للميكروبات.

مش حاجه مستخبيه ان البياعين بيحطوا الفلوس فى ادراج خشب مش نضيفه أو اكياس فيها تراب ومنهم اللى بيحطها فى اطباق معدن بتتجمع عليها الحشرات وخصوصا عند تجار الخضار والفواكه واللحوم والاسماك ، واكتر الفئات تلويث للفلوس هما العاملين فى محطات الوقود والتشحيم والعمال فى المصانع وورش الصيانه وتصليح العربيات وغيرها من الانشطه ، ولو راقبنا حاله واحده من الحالات دى هنعرف فورا اللى بتتعرض ليه الفلوس من ملوثات وازاى بتتنقل العدوى للأنسان بسهوله.

وفى كمان حاجه تانيه بتخلى الفلوس وسيله فاعله فى نقل عدوى الامراض وهوه سطحها الخشن ، بحسب استشارى الباطنيه والامراض المعديه الدكتور محمد عامر واللى قال ، “نظراً لتداول العملات الورقية بين فئات متعددة عن طريق الأيدي، ونظراً لخشونة سطح بعض العملات الورقية، فإن التصاق الميكروبات والطفيليات بها يكون أسهل، ومن ثم نقل الأمراض بأسرع وأسهل الطرق للبشر، وأخطرها الأمراض الجلدية والأمراض الوبائية مثل الالتهاب الكبدي الوبائي وميكروبات الحمى التيفودية”.

مخاطر قاتله :

سلسة الامراض اللى بتنقلها العملات الورق طويله بتحددها اخصائية علم الميكروبات والامراض المعديه الدكتوره هناء عبد الفتاح فى نوعين من الامراض : اولهم الامراض البكتريولوجيه ، واللى بتمثلها الميكروبات اللى بتعيش فى فم الانسان المصاب وبتتنقل عن طريق وضع العملات فى فم الانسان المصاب زى مثلا انه يحط الفلوس الورق بين شفايفه وتنقل العملات دى الامراض البكتريولوجيه المعديه ومنها فيروس الالتهاب الكبدى ، وميكروب الحمى التيفودية، وميكروب النزلات المعوية الحادة زى السالمونيولا، والدوستناريا التناسلية، والميكروبات السبحية والميكروبات العنقودية.
اما النوع التانى فهيا الامراض الطفيليه زى بويضات الدوده الدبوسيه وبويضات الدودة الشريطية القزمة والأكياس الجيارديا والأكياس الأميبية المسببة للدوسنتاريا المعوية والنزلات المعوية وبويضات الإسكارس، وبتسبب العملات كمان مع النوعين دول من الامراض بعض الامراض الفطريه اللى بتصيب الجلد والصوابع زى التينيا والجرب.

ملوثات متعدده :

السواد الاكبر بقا ان فى ناس مش مقتنعين بانهم يحطوا الفلوس فى محافظ او شنطه خاصه ، وكتير منهم بيحطوا الفلوس فى ملابسهم الداخليه او حتى تحت السجاد ومنهم اللى بيحطها فى علب الاكل المعدن ، وفى اسباب تانيه كمان فى تلويث الفلوس ومنها اللى بيتبادلوا عبارات الحب والغزل والتهانى عن طريق الفلوس لأ وبعضهم كمان بيعطرها وخصوصا العطور الزيتيه اللى بتسيب اثرها على الفلوس وتديها ريحه متغيره كل مااتنقلت من ايد لأيد تانيه ، وفى ناس تانيه بتهتم انها تحط شعار او ختم او بصمه خاصه على العملات ، وكتير من الشباب بيلطخ الفلوس بدم من صوباعه تعبير عن الحب وتقوم البنت بقا وتطبع شفايفها على الفلوس بالروج بتاعها.

العملات المعدن أقل خطر من الورقيه لنعومة ملمسها وعدم تعرضها للصدأ او التأكسد زى مابيحصل لنوعيات المعادن زى النحاس مثلا لكن العملات دى ليها خطورتها على الاطفال لو حطوها فى بؤهم وخدها واحد تانى وحطها فى بؤه لأنها بتنقل بسهوله اى مرض من الطفل المصاب للسليم ، وممكن تتزحلق العمله وتسد القصبه الهوائيه للطفل وتسبب الوفاه بعد مايحصله اختناق انما بلع العمله أقل خطوره واتمكن الطب من علاج المشكله دى وغالبا بتخرج مع عملية البراز.

حلول مؤقته :

المشلكه بالصوره دى خطر وبيقلق اللى عارفين خطورة الموقف علشان كده ضرورى البحث فى طرق التخفيف من حدة الخطوره دى ، اسباب التلوث والعدوى هي مشكلة البشر علشان كده لازم حلها والقضاء عليها حتى لو كان التحكم فيها صعب ولازم توقيع الكشف الطبى الدورى على العاملين فى الاماكن الجماهيريه مع التركيز على الباعه الجائلين والعاملين فى محطات البنزين والاسواق على اختلافها.
وبالنسبه للعملات يفضل ان تكون مادة تكوينها بلاستيك خفيفه تمنع تشربها للميه وبالتالى هتقل فرص التصاق الميكروبات بيها زى ماهو حاصل فى بعض الدول المتقدمه وهو انهم بيتعاملوا بالفيزا كارد ، وعلى الرغم من ده بتفضل اصابع الاتهام موجهه للناس نفسهم باعتبارهم الملوث الرئيسى للعملات.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

اسباب رفة العين وعلاجها

اسباب رفة العين وعلاجها بيعانى كتير من الناس من رفة العين أو تشنج العين أو …