حواديت ماما .. انا والتسنين وجنه بنتى

حواديت ماما .. انا والتسنين وجنه بنتى

ورجعنالكوا تانى مع فقرة حواديت ماما كل خميس بليل 👇
طبعًا واضح من العنوان إني هاحكيلكم عن مرحلة العضعضة في حياة الطفل الرضيع، اللي بيبدأ فيها يشوف كل حاجة وأي حاجة،حاجات قابلة للعض والتفعيص ودخول الفم والريالة المفرطة، مرحلة التسنين وجمال مرحلة التسنين وتحول الأم لزومبي متحرك في البيت.

“أنا بتمرمط” 😇 .. بمنتهي الصراحة ده عنوان المرحلة..

آسفة لكل مامي جديدة لسّه على أعتاب المرحلة دي، بس كل ما عرفتي حقيقتها كل ما قدرتي تواجهيها، صدقيني تربية كائن عضاض عصبي متقلب المزاج بيسنن.. محتاجة صبر أيوب وقوة هرقليز ودعوات أولياء الله الصالحين.
في البداية، وما يسبق مرحلة بزوغ الأسنان، جنه كانت عبارة عن حنفية ريالة مفتوحة، تريل ولعاب سايل 24 ساعة حتى وهي نايمة، ومعاه زن متواصل وتقلبات نوم سيئة جدًا، وكإننا عُدنا للأسابيع الأولى بعد الولادة.. والأعراض دي استمرت 5 شهور!

آه والله.. 5 شهور بداية من الشهر الرابع، وحتى بزوغ أول سنّة مع بداية الشهر التاسع، بعدين ظهرت السنّة التانية على طول وبقى عندها سنتين مهمتهم الوحيدة -لأ مش الأكل- العض بشراسة أكبر ليّا ولأي شيء يقع تحتهم!
5 شهور مفيش خروجة بدون زن وصريخ بلا سبب، مفيش مكان في إيدي متعضش ومفيش عضاضة بترضيها، والمفاجأة إنه بعد ظهور السنّة الوضع مبقاش أحلى كتير.. لإنها بقيت عايزة تجرّبها في الرضاعة طبعًا!

جنه بترضع طبيعي، ودي مأساة مع التسنين، متخيلين طبعًا كمية العض والتعاوير اللي بتسببها ليّا والصراخ مننا إحنا الاتنين، أنا من الوجع وهي من عدم فهمها ليه بصرخ الساعة 3 الفجر وأنا برضعها.. ده يدوب عضتني بطرف سنانها يعني، هزار خفيف كده على طريقتها! حل الموضوع ده كان إني أمنعها ترضع بعد ما تعض علشان أوصل لها إنها عملت حاجة غلط، بقية أضخ اللبن في ببرونة لغاية ما التشققات والالتهاب يقل شوية، وكمان الحلمة الواقية للثدي بتساعد على تقليل الاحتكاك كتير جدًا، مع كريمات الالتهابات الطبيعية.

ومع احتمالي لمرحلة العذاب دي، صاحبها تقلبات تانية في الأكل ورفض أكلات كانت بتحبها وشهيتها بقت غريبة جدًا، عايزة ترضع 24 ساعة أو بمعني أدق تفضل لازقة في صدري 24 ساعة، ولما سألت عرفت إن ده بيحسسها بالأمان والاحتواء، ويخفف ألم التسنين عندها في المرحلة دي، فبقيت أعمل شقلبظات علشان ترضى تاكل ونمزج حاجات مالهاش علاقة ببعض على بعض، زي البرتقال على صفار البيض، والبسكويت على شوربة الخضار، وهكذا.. وأصبحت يوم تاكل وتلاتة عايشة على الرضاعة، لكن بقول مرحلة وهتعدّي.

الـ”بي بي” كمان اتحوّل، شوية أيام إسهال غريب، وشوية أيام كمان إمساك مزمن! الله طيب وبعدين.. التسنين هو السبب.

الفكرة إن المرحلة دي مستمرة معانا شوية حلوين، صحيح بعد كل سنة بتهدي نسبيًا لأيام قليلة، لكنها بترجع أشرس من الأول على الطفل والأم، مرحلة من أصعب مراحل تطور الطفل.. لكن هتهون وتعدي إن شاء الله.. دعواتكم تعدي بأقل خسائر ممكنة بس.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

مخاطر تقبيل الطفل من فمه

مخاطر تقبيل الطفل من فمه تقبيل الوالدين لطفلهم من اجمل الاحاسيس اللي بيحسوا بيها وبيظهروا …