خطورة المضادات الحيويه على طفلك

خطورة المضادات الحيويه على طفلك

لما بيجى لأولادنا اى مرض بسرعة بنجرى نطلب مضاد حيوى من الدكتور بسبب خوفنا الزايد عليهم ، واعتقادنا ان المضاد الحيوى هو احسن حاجه ممكن نعملها علشان نخلص على المرض بسرعة بس للأسف بالرغم ان المعتقد ده منتشر اوى الا ان هو غلط جدا وبالعكس استخدام المضادات الحيوية فى اوقات كتيرة بيضر مش بينفع.

فى الاول … ايه هو المضاد الحيوى؟
المضاد الحيوى دوا مخصوص لقتل البكتيريا او يمنعها من انها تتكاثر ، والمضادات الحيويه بتكون ضد البكتيريا وبس وملهاش اى تأثير على الفيروسات واللى بتكون هيا غالبا السبب فى نزلات البرد والرشح والتهاب الجيوب الانفيه وغيرها عند الاطفال.

ليه الخوف ده كله من المضادات الحيوية؟
قولنا ان المضاد الحيوى بيقتل البكتيريا وبيمنع تكاثرها لكن المعلومة الاهم انه مش بيقتل البكتيرا الضارة وبس لأ كمان بيقضى على البكتيريا النافعة واللى هيا مهمه اوى لجسم الطفل.
فتخيل لو كان ابنك مش مصاب من الاول بعدوى بكتيرية وخد مضاد حيوى، فهو كده مستفدتش منه وبس لكن كمان الدوا ده ممكن يسببله الضرر بانه يقضى على البكتريا النافعه فى جسمه.

اخطار تناول المضاد الحيوى من غير مانحتاج ليه :
1. بيعرض الطفل للأعراض الجانبية للدوا زى الاسهال والالتهابات الجلدية وخصوصا في منطقة الحفاضه.
2. لما بندى الطفل مضاد حيوى وهو مش محتاج بيحتاج لمضاد حيوى أقوى لو اتصاب بعدوى بكتيرية علشان بتقل دفاعات الجسم بشكل كبير.
3. بعض الابحاث كمان قالت ان المبالغة فى اننا ندى الطفل مضادات حيوية فى كل مرة بيمرض فيها من غير مانتأكد من وجود بكتيريا من عدمها ممكن يكون عامل لزيادة وزن الطفل عن الوزن الطبيعى.

امتى بيكون المضاد الحيوى مش ضرورى؟
زى ماقلت قبل كده ان المضاد الحيوى بيقتل البكتيريا وبس وملهاش اى تأثير على الفيروسات ، واغلب الامراض المنتشرة بين الاطفال فى الواقع بيكون سببها فيروسات زى نزلات البرد والانفلونزا.

طيب امتى بيحتاج طفلك للمضاد الحيوى؟
لازم نتأكد فى الاول ان المضادات الحيوية بتتاخد بس تحت اشراف الدكتور والالتزام الكامل بالجرعة اللى بيحددها ونكمل كورس العلاج كله، حتى لو لاحظت ان طفلك اتحسن فى نص المده فلازم وضرورى جدا نكمل كورس العلاج علشان البكتيريا مترجعش تانى لحالتها النشطه.
والامراض المشهورة بانها بيكون موجود معاها بكتيريا واللى فى الحاله دى بنحتاج جرعة مضاد حيوى وهما:
التهاب الحلق ، الالتهابات الجلدية البكتيرية ، التهابات الأذن ، الالتهاب الرئوي ، التهابات المسالك البولية.

وفى النهايه ليك شوية ملاحظات سريعة علشان نتجنب مخاطر المضادات الحيوية :
1. لازم تعرف ان المضاد الحيوى مش هو الحل دايما وان هو ضار لطفلك لو استخدمته من غير الحاجه وعلشان كدا لازم نستشير الدكتور الاول.
2. لو كان ابنك بيعانى من وجود فيروس معين فأحسن حل هو الصبر ومع مرور الوقت هيتخلص من الفيروس مع وجود مسكنات الألم الخفيفة اللى هيوصفها الدكتور.
3. فى حالة وصف الدكتور مضاد حيوى لطفلك اتكلم معاه واسأله عن نوع البكتيريا وايه هيا الجرعات المناسبة ومتبخلش على نفسك وعلى ابنك بالاسئلة.
4. التزم بتعليمات الدكتور والجرعات كويس اوى.
5. علشان تتجنب اصابة ابنك بالعدوى البكتيرية التزم بجدول التطعيمات الخاصة بيه وحملات التطعيم اللى بتطلقها وزارة الصحة كل فترة ، وكمان لو طلب منك الدكتور انك تدى ابنك تطعيم خارجى تانى.

#دكتور_مفيد
#روشتة_دوت_كوم
#الدواء_بقى_أونلاين

عن heba mohamed

انا هبه ويارب اقدر افيدكوا .. وأكون خفيفه على قلبكوا ... ودايما احب اشوف ارائكوا وتعليقاتكوا وتتواصلوا معايا دايما

شاهد أيضاً

حواديت ماما .. اصحى ياماما الشمس صحيت

حواديت ماما .. اصحى ياماما الشمس صحيت النوم ومعاناة النوم اللي بتمر بيها كل أم …